បាងកក៖ ប៉ូលីសកំពុងរៀបចំការចោទប្រកាន់ធ្ងន់ធ្ងរបន្ថែមទៀត រួមទាំង «ការលាងលុយកខ្វក់, ការផ្តល់ប្រាក់កម្ចីខុសច្បាប់ និងការជាប់ពាក់ព័ន្ធ ក្នុងអង្គការឧក្រិដ្ឋកម្ម» ប្រឆាំងនឹងនាយកប្រតិបត្តិរបស់ក្រុមហ៊ុន The iCon Group នេះបើតាមការចេញផ្សាយរបស់ កាសែតថៃ The Nation។

សេចក្តីរាយការណ៍របស់ប៉ូលីសបានប្រកាសបែបនេះ កាលពីថ្ងៃអាទិត្យ ពោលគឺអនុលោមតាមការណែនាំ របស់ការិយាល័យស៊ើបអង្កេតកណ្តាល សម្រាប់ផ្នែកបង្រ្កាបឧក្រិដ្ឋកម្មសេដ្ឋកិច្ច ហៅកាត់ ECD ទាក់ទងនឹងការចោទប្រកាន់ លើបុគ្គលសំខាន់ៗ ចំនួន១៨រូប របស់ The iCon ។

បើតាម The Nation ដដែល បានឲ្យដឹងថា ការចោទប្រកាន់បន្ថែមថ្មីៗ លើជនសង្ស័យទាំងអស់ដែលកំពុងឃុំខ្លួននោះ ត្រូវបានគេរំពឹងថា នឹងត្រូវបញ្ចប់រួចរាល់ នៅចុងសប្តាហ៍នេះ។

គួរបញ្ជាក់ថា ថ្នាកដឹកនាំ Icon Group រួមមានទាំងតារាសិល្បៈល្បីៗរបស់ថៃ ត្រូវបានចាប់ឃាត់ខ្លួន ជាប់ពាក់ព័ន្ធនឹងការឆបោក ដោយយកភាពល្បីល្បាញរបស់តារាល្បីៗទាំងនោះ បោកប្រាស់សាធារណជន។

មនុស្សប្រហែល ៥,៦០០នាក់បានអះអាងថា បានខាតបង់​ តាមរយៈអាជីវកម្មលក់ផ្ទាល់របស់ iCon Group និងដាក់ពាក្យប្តឹង នេះបើតាមកាសែត BangkokPost។ ប្រភពបានបន្តថា មនុស្សជាច្រើននាក់ទៀតនៅក្នុងប្រទេសថៃ និងប្រទេសផ្សេងៗទៀតកំពុងប្រមូលភស្តុតាងដើម្បីត្រៀមខ្លួនសម្រាប់ដាក់ពាក្យបណ្តឹងនៅ ពេលខាងមុខ ក្នុងករណីនេះ ដូចគ្នា៕

ប្រភពពី The Nation ប្រែសម្រួល៖ សារ៉ាត