បរទេស៖ អតីតប្រធានាធិបតីអាមេរិក លោក ដូណាល់ ត្រាំ បានវិលត្រឡប់មកក្នុងបញ្ជីអ្នកមានបំផុតចំនួន៥០០នាក់ នៅលើពិភពលោក ឡើងវិញ ខណៈដែលភាគហ៊ុន ក្រុមហ៊ុនរបស់លោក បានកើនឡើង ពីរសប្តាហ៍ ពោលគឺមុនការបោះឆ្នោតប្រធានាធិបតីអាមេរិក មកដល់នៅខែវិច្ឆិកា។

ទ្រព្យសម្បត្តិសុទ្ធរបស់លោក Trump បានកើនឡើង ១១២% នៅឆ្នាំនេះ ពោលគឺរហូតដល់ ៦.៥ពាន់លានដុល្លារ គិតត្រឹមថ្ងៃពុធ ដែលធ្វើអោយគាត់ក្លាយជាអ្នកមានបំផុតទី៤៨១ នៅក្នុងសន្ទស្សន៍មហាសេដ្ឋី Bloomberg ឬ Bloomberg Billionaires Index ។ លើកចុងក្រោយ ដែលលោកស្ថិតនៅក្នុងបញ្ជីនេះ គឺ ១១សប្តាហ៍មុន។

ទ្រព្យសម្បត្តិរបស់លោក Trump គឺបានមកពីភាពជាម្ចាស់ លើអង្គភាព Trump ដែលជាក្រុមហ៊ុនអចលនទ្រព្យអន្តរជាតិ និង អាជីវកម្ម ផ្តល់អាជ្ញាប័ណ្ណ។ ជាការកត់សម្គាល់ ទ្រព្យសម្បត្តិរបស់គាត់បានកើនឡើង នៅពេលដែលក្រុមហ៊ុន Trump Media & Technology Group Corp មានតម្លៃហ៊ុនកើនជិតបីដង ចាប់តាំងពីចុងខែមុន។

ថ្មីៗនេះ អង្គភាព Trump បានប្រកាសពីការវិនិយោគចំនួន ១.៥ពាន់លានដុល្លារ បង្កើតកន្លែងវាយកូនហ្គោល, សណ្ឋាគារ និងលំនៅដ្ឋាន នៅភាគខាងជើង ប្រទេសវៀតណាម តាមរយៈភាពជាដៃគូ ជាមួយក្រុមហ៊ុនក្នុងស្រុកមួយ៕

ប្រភពពី VNexpress ប្រែសម្រួល៖ សារ៉ាត