បរទេស៖ ថ្មីៗនេះ មហាសេដ្ឋីពិភព លោក Elon Musk មេធំក្រុមហ៊ុនឡានអគ្គិសនី Tesla បានឆ្លើយតបទៅនឹងអ្នកចូលចិត្តរថយន្តម្នាក់ ដែលបានផលិតរថយន្ត Cybertruck មានមុខងារពេញលេញ ធ្វើពីឈើ ដោយលោកបានឆ្លើយតបជាមួយនឹងអត្ថន័យកោតសរសើរខ្លាំង នេះបើតាម The Truth International កាលពីថ្ងៃពុធ។

កាលពីដើមឆ្នាំនេះ អ្នកបង្កើតមាតិកា YouTube ឈ្មោះ ND-WoodArt បានបង្ហោះវីដេអូអំពីស្នាដៃផលិតរថយន្ត Cybertruck ធ្វើពីឈើ ដោយបានចំណាយ១៥,០០០ដុល្លារអាមេរិក ចាយពេល ១០០ថ្ងៃ លើសិល្បៈហត្ថកម្ម ដ៏ប្រណិតនេះ។ ក្រោយមក ND-WoodArt តាមរយៈប្រព័ន្ធផ្សព្វផ្សាយសង្គម បានផ្ញើលិខិតចំហមួយទៅកាន់លោក Musk នៅលើវេទិកា X ។

ក្នុងសារ បានបង្ហាញពីចំណង់ចំណូលចិត្តរបស់ពួកគេ ចំពោះរថយន្តឈើ និងការកោតសរសើររបស់ពួកគេ ចំពោះលោក Musk និង Tesla ។ គេបានបន្ថែមថា «ខ្ញុំមានទំនុកចិត្តថា យានជំនិះដ៏អស្ចារ្យនេះនឹងទទួលបានជោគជ័យ នៅទីបំផុត»។

ជាការឆ្លើយតបនឹងសារនេះ លោក Musk បានឆ្លើយតបយ៉ាងសាមញ្ញថា «ប្រាកដណាស់ សូមកោតសរសើរជាខ្លាំង»។

អ្នកប្រើប្រព័ន្ធផ្សព្វផ្សាយសង្គមម្នាក់បានពណ៌នាអំពីលទ្ធផលនេះថា ជារថយន្ត Cybertruck ដែលមានរូបរាងល្អបំផុតមួយដែលពួកគេមិនធ្លាប់ឃើញ ហើយបានណែនាំថា ឡាននេះគួរត្រូវបានដាក់បង្ហាញនៅទីស្នាក់ការរបស់ Tesla។

រថយន្ត Cybertruck ធ្វើពីឈើនេះ មិនត្រឹមតែបានទាក់ទាញចំណាប់អារម្មណ៍របស់ Elon Musk ប៉ុណ្ណោះទេ ថែមទាំងបានទាក់ទាញអ្នកទស្សនាយ៉ាងទូលំទូលាយ ដោយអបអរសាទរការច្នៃប្រឌិត និងសិល្បៈហត្ថកម្ម នៅក្នុងពិភពរថយន្ត៕

ប្រភពពី The Truth International ប្រែសម្រួល៖ សារ៉ាត