បរទេស ៖ ដើម្បីជំរុញភាពគ្រប់គ្រាន់នៃស្បៀងអាហារ ប្រទេសឥណ្ឌូនេស៊ីមានបំណងទាក់ទាញកសិករ
ជំនាន់ Y និង ជំនាន់ Z ប្រើបច្ចេកវិទ្យាទំនើប ជាមួយនឹងប្រាក់បៀវត្សរ៍អប្បបរមា ៦៤០ដុល្លារអាមេរិក ក្នុងមួយខែ ពោលគឺកើនឡើង ជិត៥ដង ធៀបនឹងប្រាក់ឈ្នួលរបស់កសិករ ជាមធ្យម ហើយអាចរកបានដល់ជាង១២៧០ដុល្លារ ក្នុងមួយខែ។

«ភាពគ្រប់គ្រាន់នៃស្បៀងអាហារ» គឺជាគោលដៅសំខាន់ របស់ប្រធានាធិបតីថ្មី លោក Prabowo Subianto ដែលបាននិយាយថា ប្រទេសនេះគួរតែផលិតអាហារគ្រប់គ្រាន់ សម្រាប់ប្រជាជនរបស់ខ្លួន ហើយ «មិនអាចបន្តពឹងផ្អែក លើអាហារដែលនាំចូល» ។

កាលពីថ្ងៃពុធ រដ្ឋមន្ត្រីក្រសួងកសិកម្ម លោក Andi Amran Sulaiman បាននិយាយថា «រដ្ឋាភិបាលនឹងបង្កើតក្រុមកសិករ ជំនាន់ Y និង ជំនាន់ Z ដើម្បីគ្រប់គ្រងដីស្រែចំការ ២០០ហិកតា អភិវឌ្ឍន៍តំបន់កសិម្មថ្មីៗ ហើយកសិករម្នាក់ៗ អាចរកចំណូលយ៉ាងតិច ៦៤០ដុល្លារ ក្នុងមួយខែ ហើយអាចរកបាន ដល់ជាង១២៧០ដុល្លារ»។

គួរឲ្យដឹងថា ជំនាន់ Y គឺជាក្រុមមនុស្សដែលកើតក្រោយឆ្នាំ១៩៨១ ខណៈជំនាន់ Z គឺជាក្រុមជំនាន់ក្រោយសហស្សវត្សរ៍ ដែលកើតនៅចន្លោះចុងទសវត្សរ៍ឆ្នាំ១៩៩០ និងដើមទសវត្សរ៍ឆ្នាំ២០១០។

គួរបញ្ជាក់ថា វិស័យកសិកម្ម រុក្ខាប្រមាញ់ និងនេសាទ ផ្តល់ការងារដល់ប្រជាជនប្រមាណ ៤០,៧២ លាននាក់ ស្មើនឹង២៨,៦ ភាគរយ នៃកម្លាំងពលកម្មសរុប នៅឥណ្ឌូនេស៊ី៕

ប្រភពពី CNA ប្រែសម្រួល៖ សារ៉ាត