បរទេស៖ កាសែត VNexpress បានចេញផ្សាយ នៅក្នុងសប្តាហ៍នេះថា បុរសម្នាក់បានទិញ iPhone 16 Pro Max តម្លៃ ១,៤០០ដុល្លារអាមេរិក តាមអ៊ីនធឺណិត ប៉ុន្តែ ទទួលបានត្រឹមតែប្រអប់ទទេ។

ប្រភពថា បុរសម្នាក់នេះមានឈ្មោះ Hoang Tung រស់នៅទីក្រុងហាណូយ បានទិញ iPhone ទំហំ 256GB មួយគ្រឿងនេះ តាមហាងអនឡាញផ្លូវការ របស់ Apple។ ប្រអប់វេចខ្ចប់ត្រូវបានដឹកជញ្ជូន ទៅឲ្យគេ កាលពីចុងសប្តាហ៍មុន តាមរយៈក្រុមហ៊ុន Giao Hang Tiet Kiem គ្រប់គ្រងការដឹកជញ្ជូនភាគច្រើន សម្រាប់ Apple តាមអនឡាញ។

ក្រោយដឹងដំណឹង គេបានទាក់ទងទៅក្រុមហ៊ុនដឹកជញ្ជូន និង Apple។ ក្រោយមក Apple បានទាក់ទងទៅគេវិញ ហើយនិយាយថា ក្រុមហ៊ុននឹងផ្ញើទូរស័ព្ទឱ្យ បូកបន្ថែមនឹងប័ណ្ណ តម្លៃ១លានដុង ឬ ប្រមាណ៤០ដុល្លារ ប្រើប្រាស់ទិញទំនិញអនឡាញ។ ការដឹកជញ្ជូន iPhone ១គ្រឿងនេះ នឹងធ្វើឡើង នៅដើមខែក្រោយ នេះបើតាម Apple។

Apple និងក្រុមហ៊ុនចែកចាយមិនបាននិយាយថា ហេតុអ្វីបានជា កញ្ចប់ទទេ នោះទេ ប៉ុន្តែ ក្រោយមក ពួកគេបាននិយាយថា នឹងរាយការណ៍ទៅប៉ូលិស ប្រសិនបើមានការបង្ហាញពីសកម្មភាពខុសច្បាប់ណាមួយ៕

ប្រភពពី VNexpress ប្រែសម្រួល៖ សារ៉ាត