ពិធីបុណ្យអុំទូកនៅខេត្តបន្ទាយមានជ័យ បញ្ចប់ក្រោមក្តីសប្បាយរីករាយ
បន្ទាយមាន៖បន្ទាប់ពីដំណើរការដោយរលូន និងក្រោមស្នាមញញឹមពីអ្នកចូលរួមយ៉ាងច្រើនកុះកររួចមក ពិធីបុណ្យអុំទូកចំនួនពីរថ្ងៃពីថ្ងៃទី២៦និងទី២៧ ខែតុលា ឆ្នាំ២០២៤ នាដងស្ទឹងទឹកថ្លា ក្រុងសិរីសោភ័ណ ខេត្តបន្ទាយមានជ័យបានបញ្ចប់ដោយម្នាក់ៗ
ដក់ជាប់នូវក្តីសប្បាយរីករាយ។
ឯកឧត្តម អ៊ុ រាត្រី អភិបាលខេត្តបន្ទាយមានជ័យដែលអញ្ជើញចូលរួមជាអធិបតីក្នុងពិធីបិទបុណ្យអុំទូកកាលពីល្ងាចថ្ងៃទី២៧ ខែតុលា បានលើកឡើងពីព្រឹត្តិការណ៍ប្រកបដោយស្នាមញញឹម ផ្សាភ្ជាប់ជាមួយសុខសន្តិភាព និងការអភិវឌ្ឍដែលកម្ពុជាកំពុងទទួលបាន ។លោកពណ៌នាថា ដូចជាពេលនេះមានប្រជាពលរដ្ឋជិតឆ្ងាយ និងមកពីខេត្តដទៃ ព្រមទាំងទេសចរបរទេសចំនួនជាង៤ម៉ឺននាក់ បានមកទស្សនាការប្រណាំងទូក និងពិព័រណ៍នានា ។នេះគឺជាចំនួនមួយដ៏ច្រើន។
សូមជម្រាបថា ក្នុងពិធីអុំទូកឆ្នាំនេះដែរ ក៏មានរៀបចំការតាំងពិព័រណ៍ ភូមិមួយ ផលិតផលមួយ និងស្តង់ទំនិញទូទៅចំនួន ៧៤ ស្តង់ ដែលរៀបចំនៅសួនមានជ័យ នៅមិនឆ្ងាយប៉ុន្មានពីទីប្រារព្ធការប្រណាំងទូក ។ដោយឡែកពេលរាត្រីមានការបណ្ដែតប្រទីបរបស់រដ្ឋបាលខេត្ត ស្រុក មន្ទីរ អង្គភាពនានាចំណុះរដ្ឋបាលខេត្តចំនួន៤០ផងដែរ ។
ឯកឧត្តមអភិបាលខេត្តបានបញ្ជាក់ថា ពិធីបុណ្យអុំមិនត្រឹមបង្កលក្ខណៈសប្បាយរីករាយដល់ប្រជាពលរដ្ឋប៉ុណ្ណោះទេ តែបានបង្កើនការថែរក្សាទំនៀមទម្លាប់ប្រពៃណីវប្បធម៌ជាតិឱ្យគង់វង្ស ។
គណៈកម្មការរៀបចំបុណ្យអុំទូក បណ្ដែតប្រទីប និង សំពះព្រះខែ អកអំបុក ខេត្តបន្ទាយមានជ័យបានឱ្យដឹងថា ពិធីប្រណាំងទូកឆ្នាំនេះមានទូកចំនួន៣៥ទូកចូលរួម ។ការប្រកួតមានចម្ងាយ ៦ ៥០០ ម៉ែត្រ តាមបណ្ដោយដងស្ទឹងទឹកថ្លា ក្រុងសិរីសោភ័ណ ដោយប្រកួតជ្រើសយកចំណាត់ថ្នាក់ពីលេខ១ ដល់លេខ៣ ។តាមរយៈការប្រកួតរយៈពេលពីរថ្ងៃ ទូកចំណុះ៧០នាក់ ចំណាត់ថ្នាក់លេខ ១. បានទៅលើទូកឈ្មោះ សុវណ្ណរាជសីហ៍បារមីបន្ទាយមហានគរ ។ លេខ២. ទូកឈ្មោះ ពិសីមានជ័យបារមីស្រីស្អាត។
ចំណែកទូកចំណុះ ៤៥នាក់ ជ័យលាភីលេខ១. បានទៅលើទូកឈ្មោះ តេជោសែនជ័យបារមីមានរិទ្ធ ,លេខ២.ទូកឈ្មោះ ព្រះពន្លាមានជ័យស្រីក្រឡេកញញឹម ។
រីឯទូកមានចំណុះ២២នាក់ ចំណាក់ថ្នាក់លេខ១. ទូកឈ្មោះ សន្ទុះនាគរាជសែនជ័យបារមីមានរិទ្ធ ,លេខ២.បានទៅលើទូកឈ្មោះអធិរាជឥន្ទ្រីសែនជ័យបារមីភ្នំស្វាយ និងលេខ៣.ទូកឈ្មោះសន្ទុះនាគខ្មៅ។
ចំណែកទូកចំណុះ៥នាក់លេខ១.បានទៅលើទូកឈ្មោះបុរសសង្ហាមានជ័យបារមីភូមិតាទង់,លេខ២.ទូកកន្ទោងខៀវមានរិទ្ធិ និងលេខ៣.ទូកឈ្មោះសុវណ្ណរតនាបុប្ផាព្រះពន្លា ៕
អត្ថបទនិងរូបភាព៖គៀន ច័ន្ទហ៊ីន
