សមាគមកាយឫទ្ធិនារីកម្ពុជាសាខាខេត្តបាត់ដំបងបោះជំរំប្រចាំឆ្នាំ២០២៤ នៅស្រុកសំឡូត
បាត់ដំបង៖ “ យុវតីយើង អនាគតអ្នកដឹកនាំយើង” ជាប្រធានបទសម្រាប់សមាគមកាយឫទ្ធិនារីកម្ពុជាសាខាខេត្តបាត់ដំបង បានរៀបចំកម្មវិធីជួបជុំការបោះជំរំប្រចាំឆ្នាំរបស់ខ្លួនដែលប្រព្រឹត្តទៅនៅស្រុកសំឡូត ខេត្តបាត់ដំបងក្នុងសប្ដាហ៍នេះ។
ពិធីបោះជំរំប្រចាំឆ្នាំរបស់សមាគមកាយឫទ្ធិនារីកម្ពុជាសាខាខេត្តបាត់ដំបងបានដំណើរការរយៈពេល៣យប់ ៤ថ្ងៃ ចាប់ពីថ្ងៃទី២៦ដល់ថ្ងៃទី២៩ ខែតុលានៅក្នុងរីសតហែបភីណែសឡុងប្រ៊ីត នៃស្រុកសំឡូត ។សកម្មភាពចម្បងៗ នៅក្នុងការបោះជំរំ បានផ្ដោតលើសកម្មភាពការងារជាក្រុម,ការកម្សាន្ត ការរៀនពីបំណិនជីវិត ការបណ្ដុះស្មារតីជាក្រុម និងការដឹកនាំ និងចុងក្រោយគឺការយល់ដឹងអំពីអត្ថន័យនៃការដុតភ្លើងគប់ជំរំ។
ការបោះជំរំនេះដែរប្រព្រឹត្តទៅក្រោមអធិបតីភាពឯកឧត្តម សុខ លូ អភិបាលខេត្តបាត់ដំបង និងលោកជំទាវ ម៉េត រ៉ាវីចិត្រ សុខ លូ ប្រធានកិត្តិយសសមាគមកាយឫទ្ធិនារីកម្ពុជាសាខាខេត្តបាត់ដំបង ។
លោកស្រី កែវ ដាណា ប្រធានក្រុមប្រឹក្សានៃសមាគមកាយឫទ្ធិនារីកម្ពុជាសាខាខេត្តបាត់ដំបងបានឱ្យដឹងថា សមាគមកាយឫទ្ធិនារីកម្ពុជាសាខាខេត្តបាត់ដំបងមានសមាជិកគាំទ្រ ចំនួន៨០រូប និងសមាជិកសកម្ម និងគ្រូបង្គោលសរុបចំនួន១២០រូប។ពួកគេបានរួមគ្នា បំពេញការងារស្របតាមទស្សនៈវិស័យបេសកកម្ម និងទិសដៅរបស់សមាគមកាយឫទ្ធិនារីកម្ពុជា ក្នុងការលើកកម្ពស់ និងអភិវឌ្ឍន៍ នូវថាមពលកុមារី យុវតី ឱ្យក្លាយទៅជាពលរដ្ឋល្អ ដែលមានទំនួលខុសត្រូវខ្ពស់ ចំពោះខ្លួនឯង គ្រួសារ សហគមន៍ និងប្រទេសជាតិ របស់ខ្លួន។លោកស្រីបានបន្តថា ក្នុងរយៈពេលមួយឆ្នាំកន្លងមកនេះ សាខាខេត្តបាត់ដំបង បានរៀបចំនូវកម្មវិធីជាច្រើន ក្នុងនោះមាន កម្មវិធីអប់រំបណ្ដុះបណ្ដាល,កម្មវិធីបរិស្ថាន,កម្មវិធីសិល្បៈហត្ថកម្ម,កម្មវិធីសុខភាពនិងសុវត្ថិភាព និងកម្មវិធីចូលរួមសកម្មភាពផ្សេងៗ។ លើសពីនេះសមាជិកាសកម្មរបស់សាខាខេត្ត ក៏បានទទួលនូវឱកាសក្នុងការចូលរួមកម្មវិធីជាអន្តរជាតិនានា នៅក្រៅប្រទេសផងដែរ ។
លោកស្រី កែវ ដាណា បានបញ្ជាក់ទៀតថា ក្រោមការដឹកនាំប្រកបដោយគតិបណ្ឌិតរបស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការនៃសមាគមកាយឫទ្ធិនារីកម្ពុជានៅក្នុងឆ្នាំ២០២៤នេះសាខាខេត្តបាត់ដំបងបានទទួលនូវកិត្តិយសរៀបចំការបោះជំរំប្រចាំឆ្នាំនៅលើទឹកដីនៃខេត្តរបស់ខ្លួនផ្ទាល់។
ក្នុងឱកាសនេះដែរ ឯកឧត្តម សុខ លូ អភិបាលខេត្តបាត់ដំបង បានបង្ហាញក្ដីសង្ឃឹមថាសម្រាប់ឆ្នាំនេះ និងឆ្នាំបន្តបន្ទាប់ទៀតខាងមុខសមាគមកាយឫទ្ធិនារីកម្ពុជាសាខាខេត្តបាត់ដំបង នឹងធ្វើការបោះជំរំរបស់ខ្លួនជាលក្ខណៈទ្រង់ទ្រាយធំនិងដោយមានការចូលរួមពីយុវតី កាន់តែច្រើនឡើង ខណៈគោលបំណងនៃការបោះជំរំនេះ គឺដើម្បីពង្រឹងប្រាជ្ញាស្មារតី និងភាពក្លាហានរបស់យុវតីដើម្បីឱ្យក្លាយជាអ្នកដឹកនាំបន្តវេន ព្រមទាំងផ្ដល់នូវឱកាស ឱ្យយុវតីបានយល់ដឹងបន្ថែមទៀត អំពីរបៀបរស់នៅជាមួយនឹងធម្មជាតិ បំណិនជីវិត ការធ្វើការងារជាក្រុម និងទទួលបាននូវបទពិសោធន៍ ចំណេះដឹងថ្មីៗបន្ថែមទៀត ដើម្បីយកមកអភិវឌ្ឍខ្លួន៕
( អត្ថបទ-រូបភាព៖ អ៊ុក សំអាន បប.)
