វគ្គបណ្តុះបណ្តាលគ្រូបង្ហាត់កីឡាវាយសីកម្រិត១ និងជំរុញឱ្យគ្រូនៅតាមបណ្តាខេត្តក្លាយជាគ្រូមាន សមត្ថភាពបង្ហាត់ត្រឹមត្រូវតាមបច្ចេកទេស
(ភ្នំពេញ)៖ លោក ព្រំ សារ៉ាវុធ ជំនួយការសហពន្ធកីឡាវាយសី ទទួលការងារបណ្តុះ បណ្តាល និងកិច្ចបរទេស បានគូសបញ្ជាក់ថា វគ្គបណ្តុះបណ្តាលគ្រូបង្ហាត់កីឡា វាយ សីកម្រិត១ ដែលរៀបចំដោយសហព័ន្ធកីឡាវាយសីកម្ពុជា ផ្តល់ដោយសហព័ន្ធកីឡាវាយសីពិភពលោក ដែលដំណើររយៈពេលរយៈ៦ថ្ងៃចាប់ពីថ្ងៃទី២៤ដល់ថ្ងៃទី២៩ ខែ តុលា ឆ្នាំ២០២៤ គឺជាវគ្គមួយផ្តល់ជូននូវចំណេះជំនាញដែលបង្ហាត់ដោយគ្រូឧទ្ទេសមកពីសហព័ន្ធកីឡាវាយសីអាស៊ី ដើម្បីជំរុញឱ្យគ្រូកីឡាវាយសីតាមបណ្តាក្លឹបមកពីរាជធានី -ខេត្ត ទទួលបាននូវគរុកោសល្យបង្ហាត់កីឡាករកីឡាការិនីវ័យក្មេងត្រឹមត្រូវតាមបច្ចេកទេសស្តង់ដាររបស់សហព័ន្ធកីឡាវាយសីពិភពលោក ។
ជំនួយការសហព័ន្ធកីឡាវាយសីខាងលើ បានអះអាងទៀតថា វគ្គបណ្តុះបណ្តាលមួយនេះ គ្រូឧទ្ទេសបានបង្ហាត់បង្ហាញទាំងអស់ អំពីក្បួនច្បាប់បច្ចេកទេសរបស់សហព័ន្ធកីឡាវាយសីពិភពលោក បានចងក្រមបង្រៀន និងជាចំណុចសំខាន់របស់គ្រូក្នុងការវិវឌ្ឍខ្លួនពីកម្រិតដំបូងទៅដល់កម្រិតខ្ពស់។ ហើយវគ្គបណ្តុះបណ្តាលនេះសិក្ខាកាមដែលជាគ្រូបង្វឹកធ្វើតេសជាប់និងបន្តទៅកាន់វគ្គបណ្តុះបណ្តាលគ្រូបង្ហាត់កីឡាវាយសីកម្រិត២នៅប្រទេសម៉ាឡេស៊ីទៀត។
លោក បានគូសបញ្ជាក់ទៀតថា វគ្គបណ្តុះបណ្តាលកម្រិត១នេះ គ្រូឧទ្ទេសបានបង្ហាត់នូវមូលដ្ឋានមុខវិជ្ជា៥គោល មានដូចជាៈ១.ការហ្វឹកហាត់កាយសម្បទា ២.ការហ្វឹកហាត់លើផ្នែកបច្ចេកទេសបង្ហាត ៣.ហ្វឹកហាត់លើផ្នែកកលល្បិច ៤.ផ្នែកចិត្តសាស្រ្តរបស់កីឡាករកីឡាការិនី ៥.ការជ្រើសរើសរបបអាហារនិងការរស់នៅរបស់កីឡាករ ដែលមុខវិជ្ជាគោលទាំង៥នេះហើយជាផ្នែកជំរុញជួយឱ្យគុណផលកីឡាករកីឡាការិនីឈានទៅដល់កម្រិតពិភពលោក។
លោក thana arikristan ប្រធាននាយដ្ឋានឣភិវឌ្ឍន៌ សហពន្ធកីឡាវាសីឣាស៊ី បានលើកឡើងថា វគ្គបណ្តុះបណ្តាលរៀបចំឡើងដោយសហព័ន្ធកីឡាវាយសីពិភពលោកនេះ ដើម្បីចូលអភិវឌ្ឍសមត្ថភាពគ្រូបង្ហាត់កីឡាវាយសីឱ្យមានការបង្ហាត់ត្រឹមត្រូវទៅតាមបច្ចេកទេសរបស់ពិភពលោក ដែលជួយឱ្យប្រទេសមានការអភិវឌ្ឍវិស័យកីឡាវាយសីកាន់តែខ្លាំង។លោកថា វគ្គបណ្តុះបណ្តាលនេះ ជាផ្នែកមួយនឹងជួយអភិវឌ្ឍចំណេះជំនាញគ្រូក្លាយជាគ្រូបង្ហាត់ដ៏មានគុណភាពប្រចាំប្រទេស។
លោក មាន ណូរ៉ា សិក្ខាកាមគ្រូបង្វឹកមកពីមណ្ឌលគីរី និង លោក ភី ណា គ្រូបង្វឹកកីឡាវាយសី សសយក រាជធានីភ្នំពេញ បានចូលរួមវគ្គបណ្តុះបណ្តាល បានរៀបរាប់ថា វគ្គបណ្តុះបណ្តាលគ្រូបង្ហាត់កីឡាវាយសីកម្រិត១នេះ បានជួយផ្តល់នូវចំណេះថ្មីៗជាច្រើនលើជំនាញបង្ហាត់ ដែលចំណេះដឹងទាំងអស់នេះ និងជួយឱ្យពួកគាត់បង្ហាត់សិស្សនៅតាមក្លឹបកាន់តែមានគុណភាពនិងរួមចំណែកឱ្យសិស្សក្លឹបបណ្តាខេត្តកាន់តែមានសក្កានុពល។
សូមបញ្ជាក់ថា វគ្គបណ្តុះបណ្តាលគ្រូបង្ហាត់កីឡាវាយសីកម្រិត១នេះមានសិក្ខាកាមមកពីរាជធានីខេត្តចូលរួមចំនួន១៥នាក់ សម្រាប់កម្ពុជាទទួលបានជាលើកទី៣ហើយ ដែលផ្តល់ដោយសហព័ន្ធកីឡាវាយសីពិភពលោក ហើយ គិតមកដល់ពេលនេះ វគ្គបណ្តុះបណ្តាលមួយនេះ បានបណ្តុះបណ្តាគ្រូតាមបណ្តាប្រទេសអាស៊ីអាគ្នេយ៍ និងពិភពលោកបានចំនួន១៤០ប្រទេស ៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
