ភ្នំពេញ៖ គណៈកម្មការអន្តរ រដ្ឋាភិបាលអាស៊ានទទួលបន្ទុកសិទ្ធិមនុស្ស (អាយឆា) បាន​រៀបចំកិច្ចសន្ទ​នា ថ្នាក់តំបន់ស្តីពីការចែករំលែកការអនុវត្តល្អៗ ក្នុងការពង្រឹង​សិទ្ធិមនុស្ស ក្នុងអំឡុងពេលនៃការរីករាលដាល ជំងឺកូវីដ-១៩ក្នុងតំបន់អាស៊ាន ដែល​បានប្រព្រឹត្តទៅនាថ្ងៃទី២៨-២៩ ខែតុលា ឆ្នាំ២០២៤ នៅសណ្ឋាគារ Sun and Moon Riverside រាជធានីភ្នំពេញ ។

កិច្ចសន្ទនារយៈពេលពីរថ្ងៃនេះ គឺផ្អែកតាមចក្ខុវិស័យសហគមន៍អាស៊ានឆ្នាំ២០២៥ ផែន​ការ​លម្អិត សហគមន៍នយោបាយ-សន្តិសុខអាស៊ានឆ្នាំ២០២៥ និងផែនការ​សកម្មភាព​របស់ពេល៥ឆ្នាំរបស់អាយឆា។ បន្ថែមពីនេះ កិច្ចសន្ទនានេះគឺជា​វេទិកា​ដែលប្រមូលផ្តុំអ្នកជំនាញមកពីវិស័យនិងស្ថាប័នផ្សេងគ្នា ចូលមក ធ្វើការផ្លាស់ប្តូរ និងចែករំលែកនូវការអនុវត្តល្អៗ ចំណេះដឹង និងបទពិសោធន៍នានា ពាក់ព័ន្ធនឹង​ការឆ្លើយតប ចំពោះជំងឺកូវីដ-១៩ និងវិបត្តិនានា ព្រមទាំងការចងក្រងជាឯកសារ​នៃការ​អនុវត្តល្អៗ ក្នុងការលើកកម្ពស់ និងការការពារសិទ្ធិមនុស្ស អំឡុងពេលជំងឺ​រាតត្បាតក្នុងតំបន់អាស៊ាន និងចំពោះវិបត្តិ ឬស្ថានភាពបន្ទាន់ ណាមួយនា​ពេលអនា​គត ។

ឯកឧត្តម កែវ រ៉េមី ទេសរដ្ឋមន្ត្រី ប្រធានគណៈកម្មាធិការសិទ្ធិមនុស្សកម្ពុជា និងជា​តំណាង កម្ពុជាប្រចាំអាយឆា បានលើកឡើងពីកិច្ចខិតខំរបស់រាជរដ្ឋាភិបាលកម្ពុជា ក្នុងការការពារអាយុជីវិតប្រជាពលរដ្ឋ តាមរយៈការដាក់ចេញនូវវិធានការជាច្រើន ជាពិសេសគោលនយោបាយវ៉ាក់សាំង ដោយមិនមានការរើសអើង ដែលទទួលបាន​ជោគជ័យ និងការកោតសរសើរពីអង្គការសុខភាពពិភពលោក។

ទន្ទឹមនេះ ឯកឧត្តមទេសរដ្ឋមន្ត្រី បានរម្លឹកអំពីការទទួលយកវានា Westerdam ចូលចតក្នុងប្រទេសកម្ពុជា នៅពេលដែលគ្មានប្រទេសណាមួយ ហ៊ានទទួលយក ដែលជាការឆ្លុះបញ្ចាំងពីការយកចិត្តទុកដាក់របស់ប្រទេសកម្ពុជាចំពោះការលើកកម្ពស់ និងការការពារសិទ្ធិមនុស្ស ជាពិសេសសិទ្ធិរស់រានមានជីវិត។

ឯកឧត្តមទេសរដ្ឋមន្ត្រី បានគូសបញ្ជាក់បន្ថែម ពីការជួយគាំទ្រពីប្រទេសចិនដល់​ប្រ​ទេស​កម្ពុជា តា​មរយៈការផ្តល់នូវបរិក្ខាវេជ្ជសាស្ត្រ និងវ៉ាក់សាំង ដែល ជួយជីវិតប្រជា​ពលរដ្ឋជាច្រើនលាននាក់ និងបានឆ្លុះបញ្ចាំងពីសាមគ្គីភាព និងកិច្ចសហប្រតិបត្តិការ​រវាង ប្រទេសកម្ពុជានិងប្រទេសចិន។

ចំពោះឯកឧត្តម Yong Chanthalangsy ប្រធាននិងជាតំណាងប្រទេស​ឡាវប្រចាំ​អាយ​ឆា បានលើកឡើង ពីការយកចិត្តទុកដាក់លើការពង្រឹងសមត្ថភាពថ្នាក់តំបន់ ដើម្បី​ទប់ស្កាត់និងដោះស្រាយផលប៉ះពាល់ចំពោះ សេដ្ឋកិច្ច សង្គម វប្បធម៌ និងសុខ​ភាព ក្នុងករណីដែលវិបត្តិបែបនេះអាចកើតឡើងនាពេលអនាគត។ បន្ថែមពីនេះ ឯកឧត្តមក៏បានថ្លែងអំណរគុណចំពោះការជួយគាំទ្រពីសំណាក់ប្រទេសចិនក្នុងអំឡុងពេលរីករាលដាលនៃ ជំងឺកូវីដ-១៩។

ទន្ទឹមនឹងនេះ លោក Chang Jian អនុប្រធានការិយាល័យស្ថានបេសកកម្មនៃស្ថាន​ទូតប្រទេសចិន ប្រចាំប្រទេសកម្ពុជា បានគូសបញ្ជាក់ពីការគាំទ្ររបស់ប្រទេសកម្ពុជា​ចំពោះប្រទេសចិន ពីសំណាក់ព្រះមហាក្សត្រ ព្រះវររាជមាតាជាតិខ្មែរ សម្តេចអគ្គ​មហាសេនាបតីតេជោ ហ៊ុន សែន និងប្រជាជនកម្ពុជា នាដើមឆ្នាំ២០២០។

កិច្ចសន្ទនានេះ បានគូសបញ្ជាក់ពីការអនុវត្តល្អៗ និងបញ្ហាប្រឈម ចំពោះការពង្រឹង​សិទ្ធទទួលបានការអប់រំ សិទ្ធិការងារ សិទ្ធិទទួលបានសុខភាពល្អ សិទ្ធិទទួលបាន​ព័ត៌មាន និង ឯកជនភាព និងការគាំពារសង្គម ក្នុងអំឡុងពេលនៃការរីករាល​ដាល​នៃជំងឺកូវីដ-១៩ ។

លោកជំទាវ ឡុង សូនីតា តំណាងរងរបស់ប្រទេសកម្ពុជាប្រចាំអាយឆា បានថ្លែង​សុទ្ទរកថាបិទកម្មវិធីថា វេទិកានេះនឹងបន្តពង្រឹងកិច្ចសហប្រតិបត្តិការថ្នាក់តំបន់លើ វិស័យសិទ្ធិមនុស្សទាំងក្នុងអំឡុងពេលនិងក្រោយ ការរីករាលដាលនៃជំងឺនេះ។

សូមបញ្ជាក់ថា កិច្ចសន្ទនានេះ គឺរៀបចំដោយអោយឆា-កម្ពុជា និងទទួលបាន​ការ​គាំទ្រផ្នែកថវិកាពី មូលនិធិអោយឆា និងមូលនិធិកិច្ចសហប្រតិបត្តិការអាស៊ាន-ចិន និងមានការអញ្ជើញចូលរួមពី តំណាងប្រទេស សមាជិកអាស៊ានប្រចាំអាយឆា បណ្តា​ស្ថាប័នតាមវិស័យរបស់អាស៊ាន លេខាធិការដ្ឋានអាស៊ាន តំណាង មកពីប្រទេស​សមា​ជិកអាស៊ាន ស្ថាប័នសិទ្ធិមនុស្សជាតិ វិទ្យាស្ថាននីតិអន្តរជាតិ នៃបណ្ឌិត្យ​សភា​វិទ្យាសាស្ត្រ សង្គមចិន ការិយាល័យឧត្តមស្នងការទទួលបន្ទុកសិទ្ធិមនុស្សអង្គការ​សហ​ប្រជាជាតិប្រចាំកម្ពុជា បណ្តាភ្នាក់ងាររបស់ អង្គការសហប្រជាជាតិ អង្គការ​មិន​មែនរដ្ឋាភិបាល និងតំណាងក្រសួងស្ថាប័នពាក់ព័ន្ធនានា ចំនួនជិត ១០០នាក់ ៕

ដោយ / គ្រី សម្បត្តិ