បន្ទាយមានជ័យ៖លោកយឹម សំណាង អភិបាលរងខេត្តបន្ទាយ​មាន​ជ័យ លោក ស្រេងសុផល អភិបាលក្រុងសិរីសោភ័ណ លោកឈួ ប៊ុនរឿង ប្រធានមន្ទីរអប់រំ យុវជននិងកីឡាខេត្តបន្ទាយមានជ័យ​នៅ​ព្រឹកថ្ងៃទី៣១ ខែតុលានេះបានអញ្ជើញចូលរួម ប្រកាសលទ្ធផល​ប្រឡង​សញ្ញាបត្រមធ្យមសិក្សាទុតិយភូមិឬបាក់ឌុប សម័យប្រឡង៨ តុលាឆ្នាំ២០២៤។

លទ្ធផលបង្ហាញថា ខេត្តបន្ទាយមានជ័យសិស្សប្រឡងជាប់ចំនួន ៤.៨៣៩នាក់(ស្រី២.៩៤៨នាក់)។ក្នុងនេះ សិស្សទទួល និទ្ទេសអេ(A) ចំនួន៧៤នាក់(ស្រី៤៦នាក់),និទ្ទេស B ចំនួន៤១៦នាក់ (ស្រី២៤២​នាក់), និទ្ទេស C១.០០៣នាក់(ស្រី៦៥៣នាក់),  និទ្ទេស D ១.៦៣០​នាក់(ស្រី១.០៥៩នាក់)និង និទ្ទេស E១.៧១៦នាក់ (ស្រី៩៤៨នាក់)។

ដោយឡែកយោងតាមប្រភពក្រសួងអប់រំ យុវជន និងកីឡា បានឱ្យ​ដឹងថា លទ្ធផលនៃការប្រឡងមធ្យមសិក្សាទុតិយភូមិ (បាក់ឌុប)ឆ្នាំ​២០២៤ តាមនិទ្ទេសនីមួយៗ មានដូចជា សិស្សទទួលបាននិទ្ទេស A ចំនួន ២.២១៦នាក់, និទ្ទេស B ចំនួន ៩.៧០១នាក់, និទ្ទេស C ចំនួន ២២.៦៧៥នាក់, និទ្ទេស D ចំនួន ៣៦.៦៨៣នាក់ និងនិទ្ទេស E ចំនួន ៣៥.០៧៦នាក់។

សូមជម្រាបថា ការប្រឡងបាក់ឌុបរយៈពេល២ថ្ងៃគឺថ្ងៃទី៨ និងទី៩ ខែតុលា ខេត្ត​បន្ទាយ​​មានជ័យមានបេក្ខជនសរុបចំនួន ៦.២៣៥នាក់ (ស្រី៣.៥៦៨នាក់) បានចូលរួមប្រឡងទាំងអស់និងមានមណ្ឌល​ប្រឡង​ចំនួន៨និងបន្ទប់សរុបចំនួន១៧៦បន្ទប់។

លោក យឹម សំណាង អភិបាលរងខេត្តបន្ទាយមានជ័យ​បានចូល​រួម​អប​អបអរសាទរជាមួយបេក្ខជនទាំងអស់ដែលបាន ប្រឡងជាប់និង​លើកទឹកចិត្តដល់បេក្ខជនប្រឡងធ្លាក់ថាកុំអស់សង្ឃឹមហើយខិតខំតស៊ូរៀនសូត្រឡើងវិញដើម្បីប្រឡងជាប់នៅឆ្នាំក្រោយឬក៏អាចចូលរៀនតាមសាលាបណ្តុះបណ្តាលវិជ្ជាជីវៈ, រៀននៅថ្នាក់បរិញ្ញាប័ត្ររង​ក៏​បាន។

លោក ឈួ ប៊ុនរឿង ប្រធានមន្ទីរអប់រំខេត្តបានឱ្យដឹងថា ការប្រឡង​សញ្ញាប័ត្រមធ្យមសិក្សាទុតិយភូមិឬបាក់ឌុបឆ្នាំសិក្សា២០២៤ នេះបានប្រព្រឹត្តទៅប្រកបដោយភាពល្អប្រសើរ និងមានការយក​ចិត្តទុកដាក់ក្នុងការបំពេញតួនាទីភារកិច្ច និងទំនួលខុសត្រូវ​ខ្ពស់ពី​សំណាក់គណៈមេប្រយោគទូទាំងខេត្តព្រមទាំងការចូលរួមសង្កេតការណ៍ពីអង្គភាពប្រឆាំងអំពើ ពុករលួយ សហភាពសហព័ន្ធយុវជន​កម្ពុជា មន្ទីរសុខាភិបាល និងអាជ្ញាធរមានសមត្ថកិច្ចពាក់ព័ន្ធ ៕

ដោយ៖ឃិន គន្ធា