លទ្ធផលប្រឡងបាក់ឌុប ៖ខេត្តកំពង់ឆ្នាំងនិទ្ទេស អេ កើនជាង១០០ភាគរយ
កំពង់ឆ្នាំង៖លទ្ធផលប្រឡងសញ្ញាបត្រមធ្យមសិក្សាទុតិយភូមិផ្លូវការនៅខេត្តកំពង់ឆ្នាំងបានបង្ហាញថ្ងៃទី៣១ ខែតុលា ឆ្នាំ២០២៤នេះ។អ្វីជាការកត់សម្គាល់អត្រាប្រឡងជាប់មានចំនួនកើនឡើងបើធៀបនឹងសម័យប្រឡងឆ្នាំ២០២៣។ ពិសេសសិស្សទទួលចំណាត់ថ្នាក់និទ្ទេសអេ ( A)បានកើនឡើងខ្លាំងរហូតដល់ទៅជាង១០០ភាគរយ។
លោក សឹម ប្រឹម ប្រធានមន្ទីរអប់រំ យុវជន និងកីឡាខេត្តកំពង់ឆ្នាំងបានឱ្យដឹងនៅរសៀលថ្ងៃទី៣១ ខែតុលាថាឆ្នាំនេះបេក្ខជន ប្រឡងសញ្ញាបត្រមធ្យមសិក្សាទុតិយភូមិទទួលចំណាត់ថ្នាក់និទ្ទេស A រហូតដល់ទៅ ៤៨ នាក់ បើប្រៀបធៀបឆ្នាំ២០២៣ បេក្ខជនប្រឡងជាប់និទ្ទេសAមានចំនួន ២២ នាក់ប៉ុណ្ណោះ។គឺបានកើនឡើងចំនួន២៦ នាក់។
លោកប្រធានមន្ទីរបន្តថា បេក្ខជនដែលបានប្រឡងជាប់និទ្ទេស A និងនិទ្ទេសផ្សេងទៀតមានចំនួនកើនឡើងបែបនេះដោយ
សារតែកត្តាសិស្ស បានប្រឹងប្រែងរៀនសូត្រផងនិងដោយមានការយកចិត្តទុកដាក់បង្ហាត់បង្រៀនពី លោកគ្រូ អ្នកគ្រូ នៅតាម វិទ្យាល័យក៏ដូចជាក្រសួងបានពង្រឹងសមត្ថភាពដល់លោកគ្រូអ្នកគ្រូផងដែរ។
សម្រាប់ខេត្តកំពង់ឆ្នាំងសម័យប្រឡងថ្ងៃ៨ តុលា សិស្សប្រឡងជាប់ពីនិទ្ទេស A រហូតដល់និទ្ទេសE មានចំនួន ៣.២៦៤
នាក់ស្មើនឹង ៧២,៦៦ភាគរយបើប្រៀបធៀបឆ្នាំ២០២៣សិស្សប្រឡងជាប់ស្មើនឹង៦៧,២២ ។
សូមបញ្ជាក់ថា បេក្ខជនប្រឡងឆ្នាំ២០២៤នេះមានចំនួន៤.៤៩២នាក់ប្រឡងជាប់៣.២៦៤នាក់។ ក្នុងនោះ និទ្ទេស ចំនួន Aចំនួន៤៨នាក់,និទ្ទេសB ចំនួន២៣៨នាក់ ,និទ្ទេសC ចំនួន ៦៥៥នាក់ ,និទ្ទេស Dចំនួន ១.០៦៨នាក់ និង និទ្ទេស E ចំនួន ១.២៥៦នាក់៕
ដោយ៖សុខ គឹមសៀន
