រតនគិរី៖លោក ខាត់ សាម៉ាល់ ប្រធានមន្ទីរអប់រំយុវជន និងកីឡាខេត្តរតនគិរីកាលពីព្រឹកថ្ងៃទី៣១ ខែតុលា ឆ្នាំ២០២៤បានអម ដំណើរ ឯកឧត្តម ញ៉ែម សំអឿន អភិបាលខេត្តអញ្ជើញប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅវិទ្យាល័យសម្តេចឪ សម្តេចម៉ែ ។

ជាលទ្ធផលបង្ហាញថា សម័យប្រឡងសញ្ញាបត្រមធ្យមសិក្សាទុតិយភូមិថ្ងៃទី៨ខែតុលា ២០២៤ ឆ្នាំសិក្សា២០២៣-២០២៤ ខេត្តរតនគិរីមាន​បេក្ខជន​ប្រឡងចំនួន ១៦៨៨នាក់ (ស្រី ៨៥៥នាក់)។ក្នុងនេះប្រឡង​ជាប់ស្ថាពរចំនួន ១.៣៨០នាក់(ស្រី ៧២៣នាក់)ស្មើ៨១. ៧៥​ភាគរយ(ស្រី ៨៤. ៥៦%)។សិស្សប្រឡងជាប់និទ្ទេស A ចំនួន ៩នាក់ (ស្រី៥នាក់), និទ្ទេស B ចំនួន ៩៣នាក់ (ស្រី៥៣នាក់), និទ្ទេស C ៣០៧នាក់ (ស្រី ១៧៥នាក់), និទ្ទេស D ៥២៦នាក់ (ស្រី ២៩១នាក់),និង និទ្ទេស E ចំនួន ៤៤៥នាក់( ស្រី ១៩៩នាក់)។

ក្នុងឱកាសនេះឯកឧត្តម ញ៉ែម សំអឿន អភិបាលខេត្តរតនគិរី បានអបអរសាទរជាមួយអាណាព្យាបាលនិងបេក្ខជនទាំងអស់ ដែលទើបប្រឡងជាប់ និងអរគុណលោកគ្រូ អ្នកគ្រូ ដែលបាន​ខិតខំយកចិត្តទុកដាក់ក្នុងការបង្ហាត់បង្រៀនសិស្សឱ្យទទួលបាន លទ្ធផលល្អនាពេលនេះ។ឯកឧត្តមអភិបាលខេត្តសន្យាថានឹង​មានរង្វាន់លើកទឹកចិត្តសម្រាប់ក្មួយៗ ដែលជាប់និទ្ទេសA ទាំង ៩នាក់ផងដែរ៕
ដោយ៖ គតិ យុត្ត