បរទេស៖ លោកប្រធានាធិបតីអាមេរិករៀបនឹងចប់អាណត្តិ Joe Biden បាននិយាយថា ការផ្ទេរអំណាចទៅឱ្យលោក Donald Trump នឹងដំណើរការដោយ «សន្តិភាព និងមានរបៀបរៀបរយ»។

ប្រធានាធិបតីអាមេរិក លោក Joe Biden កាលពីថ្ងៃព្រហស្បតិ៍ បានស្នើឱ្យអ្នកគាំទ្ររបស់ លោកស្រី Kamala Harris សូមកុំចុះចាញ់ បន្ទាប់ពីការបរាជ័យ ខណៈដែលលោកបានសន្យាពី «ការផ្លាស់ប្តូរដោយសន្តិភាព និងរបៀបរៀបរយ» នៃអំណាច ទៅកាន់ប្រធានាធិបតីជាប់ឆ្នោត លោក Donald Trump ។

លោក Biden បាននិយាយ ក្នុងសុន្ទរកថាសាធារណៈដំបូងរបស់លោក ចាប់តាំងពីការចាញ់ឆ្នោតថ្នាក់ជាតិ ដ៏គួរឲ្យភ្ញាក់ផ្អើល សម្រាប់គណបក្សប្រជាធិបតេយ្យរបស់លោកថា «កាលពីម្សិលមិញ ខ្ញុំបាននិយាយជាមួយប្រធានាធិបតីជាប់ឆ្នោត លោក Trump ដើម្បីអបអរសាទរគាត់ ចំពោះជ័យជម្នះរបស់គាត់ ហើយខ្ញុំធានាដល់គាត់ថា ខ្ញុំដឹកនាំរដ្ឋបាលទាំងមូលរបស់ខ្ញុំ ឱ្យធ្វើការជាមួយក្រុមរបស់គាត់ ដើម្បីធានាឱ្យមានការផ្លាស់ប្តូរ ដោយសន្តិភាព និងរបៀបរៀបរយ» ។

លោក Biden ក៏បានធានាដល់ប្រទេសប្រកបដោយសុចរិតភាព នៃប្រព័ន្ធបោះឆ្នោត ផងដែរ។ លោក Biden បានបន្តថា «ជាការបោះឆ្នោតស្មោះត្រង់ យុត្តិធម៌ ហើយវាមានតម្លាភាព ហើយវាអាចទុកចិត្តបាន ឈ្នះ ឬ ចាញ់»៕

ប្រភពពី scmp ប្រែសម្រួល៖ សារ៉ាត