ឯកឧត្តម ជា ច័ន្ទបរិបូរណ៍ ជំរុញឱ្យកីឡាករ កីឡាការិនី សម្រួចសិទ្ធផល គុណភាពបច្ចេកទេស ត្រៀមដណ្តើមមេដាយ ស៊ីហ្គេម លើកទី៣៣ នៅថៃ
(ភ្នំពេញ)៖ ឯកឧត្តម ជា ចន្ទបរិបូរណ៍ ប្រធានសហព័ន្ធកីឡាអេឡិចត្រូនិកកម្ពុជា (EFC) បានជំរុញលើកទឹកចិត្តឱ្យកីឡាករ កីឡាការិនីអេឡិចត្រូនិកកម្ពុជា ប្រឹងប្រែងហ្វឹកហាត់ដុសខាត់សមត្ថភាព ដើម្បីត្រៀមការប្រកួតអន្តរជាតិនានា ជាពិសេសត្រៀមកីឡាស៊ីហ្គេម លើកទី៣៣ នៅប្រទសថៃ ពីថ្ងៃទី០៩-២០ ខែធ្នូ ឆ្នាំ២០២៥ខាងមុខ។
ថ្លែងក្នុងសន្និសីទសារព័ត៌មាន នៅទីស្តីការក្រសួងព័ត៌មាន ឯកឧត្តម ជា ចន្ទបរិបូរណ៍ មានប្រសាសន៍ថា អោយកីឡាករ កីឡាការិនី សម្រួចសិទ្ធផល គុណភាពបច្ចេកទេសត្រៀមខ្លួនឱ្យបានល្អប្រសើរ ដើម្បីដណ្តើមមេដាយជូនប្រទេសជាតិ ក្នុងព្រឹត្តការណ៍កីឡាស៊ីហ្គេម លើកទី៣៣ នៅប្រទេសថៃ បន្ទាប់ពីទទួលបានជោគជ័យ និងមោទនភាព ដែលប្រភេទកីឡាអេឡិចត្រូនិកកម្ពុជាឈ្នះមេដាយមាស លើសពីផែនការយុទ្ធសាស្ត្ររបស់ក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា ក្នុងនាមជាម្ចាស់ផ្ទះ ស៊ីហ្គេម លើកទី៣២ កាលពីឆ្នាំ២០២៣កន្លងទៅ» ។
ប្រធានសហព័ន្ធរូបនេះ ស្នើឱ្យកីឡាករ កីឡាការិនីអេឡិចត្រូនិកទាំងអស់ត្រូវគោរពឱ្យបាននូវក្រមសីលធម៌ វិន័យកីឡាឱ្យបានខ្ជាប់ខ្ជួន ជាពិសេសគឺត្រូវជៀសឱ្យឆ្ងាយពីសារធាតុញៀន ឬសារធាតុហាមឃាត់ក្នុងកីឡា ដូប៉ា ឬសារធាតុលើកកម្លាំងជាដើម។
ឯកឧត្តមបានលើកទឹកចិត្តដល់កីឡាករ កីឡាការិនី ដែលត្រៀមចូលរួមប្រកួតកីឡាអេឡិចត្រូនិក ជ្រើសរើសជើងឯកថ្នាក់ជាតិ ក្នុងខែវិច្ឆិកាឆាប់ៗខាងមុខនេះ ត្រូវប្រឹងប្រែងឱ្យអស់ពីសមត្ថភាព ដោយកាលណាយើងឈ្នះជើងឯកក្នុងប្រទេស ត្រូវចូលរួមតំណាងជាតិចេញទៅប្រកួតនៅក្រៅប្រទេស។
ឯកឧត្តម ជា ចន្ទបរិបូរណ៍ កត់សម្គាល់ថា ថ្វីដ្បិតតែកីឡាអេឡិចត្រូនិកកម្ពុជាត្រូវបានបង្កើតឡើងនៅក្រោយគេ ក្នុងតំបន់អាស៊ីអាគ្នេយ៍ ប៉ុន្តែដំណើររបស់យើង គឺមិនយឺតនោះទេ។ វិស័យកីឡានេះដើរមិនយឺតទេ អាស្រ័យដោយគោលនយោបាយរបស់រាជរដ្ឋាភិបាលខិតខំអភិវឌ្ឍ ហើយវិស័យអេឡិចត្រូនិកនេះមិនអន់ថយទេ ដោយវិស័យនេះគួបផ្សំនឹងរឿងជាច្រើន ដែលទី១ គោលនយោបាយរបស់រាជរដ្ឋាភិបាល ទី២ ការវិវឌ្ឍរបស់វិស័យបច្ចេកវិទ្យា ទី៣ ធនធានមនុស្សរបស់យើង ដែលយើងសូមកោតសរសើរដល់កីឡាករ កីឡាការិនីរបស់យើងដែលដើរទាន់នូវសម័យកាលនៃបច្ចេកវិទ្យានាពេលបច្ចុប្បន្ន។
ឯកឧត្តម លន់ សាមឌី អគ្គលេខាធិការ EFC បានឱ្យដឹងថា សហព័ន្ធកីឡាអេឡិចត្រូនិកកម្ពុជាគ្រោងបញ្ជូន ក្រុមកីឡាការិនីមកពីក្រុម CFU Serendipity (MLBB) តំណាងក្រុមជម្រើសជាតិ (ANGKOR WARRIORS) ចូលរួមប្រកូតជើងឯកពិភពលោក លើកទី១៦ នៅរាជធានីរីយ៉ាត ព្រះរាជាណាចក្រអារ៉ាប់ប៊ីសាអូឌីតពី ថ្ងៃទី១១-១៩ ខែវិច្ឆិកា ឆ្នាំ២០២៤។
ក្នុងពេលនេះ សហព័ន្ធនឹងចូលមហាសន្និបាតប្រចាំឆ្នាំរបស់សហព័ន្ធកីឡាអេឡិចត្រូនិកអន្តរជាតិ (IESF)ផងដែរ។ បន្ទាប់មក ក្រុមកីឡាករនិងកីឡាការិនី ជម្រើសជាតិ (ANGKOR WARRIORS ) នឹងទៅចូលរួមប្រកួត ASIAN ESPORTS GAMES 2024 ដែលសហព័ន្ធនឹងបញ្ជូនកីឡា២វិញ្ញាសា គឺMLBB FEMALE និង eFootball Mobile នៅប្រទេសថៃពី ថ្ងៃទី២៣-៣០ ខែវិច្ឆិកា ឆ្នាំ២០២៤ ប៉ុន្តែវិញ្ញាសា eFootball Mobile ប្រកួតដល់ថ្ងៃទី២ ខែធ្នូ ឆ្នាំ២០២៤៕
អត្ថបទ-រូបភាព ៖ លោក ចាន់ វិចិត្រ – ងីមឆៃហួត
