(ភ្នំពេញ)៖ ការប្រកួតកីឡាបេស្បលជ្រើសរើសជើងឯកថ្នាក់ជាតិឆ្នាំ២០២៤ បានដំណើរការប្រកួតជាផ្លូវការហើយ ចាប់ពីថ្ងៃទី១៣ដល់ថ្ងៃទី១៦ ខែ វិច្ឆិកា ឆ្នាំ២០២៤ ដោយមាន៧ក្លឹបចូលរួមប្រកួតប្រជែង នៅទីលានកីឡាបាល់ទាត់វិទ្យាល័យជាស៊ីមឈូកវ៉ា រាជធានីភ្នំពេញ។

លោក ឆែម ដារ៉ា ប្រធានសហព័ន្ធកីឡាបេសប្បលកម្ពុជា បានថ្លែងឱ្យដឹងថា ការប្រកួតកីឡាបេស្បលជ្រើសរើសជើងឯកថ្នាក់ជាតិឆ្នាំ២០២៤នេះ បានដំណើរចាប់ពីថ្ងៃទី១៣ដល់ថ្ងៃទី១៦ ខែ វិច្ឆិកា ឆ្នាំ២០២៤ មាន៧ក្លឹបចូលរួមប្រកួត មកពីកែវ កំពង់ឆ្នាំង កំពង់ធំ និងរាជធានីភ្នំពេញ ដោយធ្វើការប្រកួតលើ៤វិញ្ញាសា ។

លោក ឆែម ដារ៉ា បានគូសបញ្ជាក់ថា ព្រឹត្តិការណ៍ជើងឯកថ្នាក់ជាតិនេះគឺជាលើកទី៨ហើយដែលសហព័ន្ធកីឡាបេស្បលកម្ពុជាបានរៀបចំព្រឹត្តិការណ៍ប្រចាំឆ្នាំ ដើម្បីជ្រើសរើសក្លឹប និងកីឡាករ កីឡាការិនីឆ្នើមៗ ដើម្បីរួមចំណែកនៅក្នុងការអភិវឌ្ឍវិស័យកីឡានៅក្នុងព្រះរាជាណាចក្រកម្ពុជា តាមទស្សនវិស័យដែលបានកំណត់ដោយរាជរដ្ឋាភិបាលកម្ពុជា នោះគឺប្រជាជនម្នាក់លេងកីឡាមួយប្រភេទយ៉ាងតិចប្រចាំជីវិត នៅក្នុងបរិបទកីឡារស់ក្នុងសន្តិភាព។

ព្រឹត្តិការណ៍នេះកើតឡើងដោយសារការឧបត្ថម្ភគាំទ្រខាងថវិការបស់រាជរដ្ឋាភិបាលកម្ពុជា តាមរយៈក្រសួងអប់រំ យុវជន និងកីឡា ក្នុងទឹកប្រាក់ប្រមាណ៦០លានរៀលក្នុងមួយឆ្នាំសម្រាប់គាំទ្រការចំណាយទៅលើកិច្ចការរដ្ឋបាល ការបណ្ដុះបណ្ដាលប្រចាំឆ្នាំ និងការប្រកួតជ្រើសរើសជើងឯកប្រចាំឆ្នាំ។ តាងនាមសហព័ន្ធកីឡាបេស្បលកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា តាមរយៈក្រសួងអប់រំ យុវជន និងកីឡា ដែលបានជួយឧបត្ថម្ភគាំទ្រសហព័ន្ធកីឡាបេស្បលកម្ពុជាយើង ទាំងខាងថវិកា និងស្មារតី ដែលបានធ្វើឱ្យវិស័យកីឡា បេស្បលនៅក្នុងព្រះរាជាណាចក្រកម្ពុជាយើងបានរីកលូតលាស់ទាំងបរិមាណ និងគុណភាព ចាប់តាំងពីមានវត្តមានជាលើកដំបូងនៅក្នុងព្រះរាជាណាចក្រកម្ពុជាយើងនៅដើមទសវត្ស២០០០មក។

សូមបញ្ជាក់ថា ការប្រកួតជ្រើសរើសជើងឯកកីឡាបេស្បលថ្នាក់ជាតិឆ្នាំ២០២៤នេះ ដំណើរការរយៈពេល៧ថ្ងៃ មានក្លឹបកីឡាបេស្បលចំនួន០៧បានចូលរួមប្រកួតក្នុងការប្រកួតកីឡាបេស្បលជ្រើសរើសជើងឯកថ្នាក់ជាតិឆ្នាំ២០២៤។ ក្លឹបទាំងនោះរួមមាន៖ 1- White Pigeon មកពីវិទ្យាល័យច្បារអំពៅ រាធធានីភ្នំពេញ 2- Hàng Meas មកពីវិទ្យាល័យទ័ពស្រូវ កំពង់ឆ្នាំង3- Chhnang Meas មកពីវិទ្យាល័យទ័ពស្រូវ កំពង់ឆ្នាំង4- Hanuman មកពីខេត្ត តាកែវ
5- White Rabbit មកពីខេត្ត កំពង់ធំ6- Wild Buffalo មកពីវិទ្យាល័យជាស៊ីមឈូកវ៉ា រាជធានីភ្នំពេញ7- Lions មកពីវិទ្យាល័យឥន្រ្ទទេវី រាជធានីភ្នំពេញ៕

ថតដោយ ៖ ងីម ឆៃហួត
អត្ថបទ ៖ ជាវ ចន្ធូ