សម្តេចតេជោ ហ៊ុន សែន ស្នើឱ្យគ្រប់គ្នាស្ងាត់ស្ងៀម ករណីកោះគុត ទុកឱ្យរដ្ឋាភិបាលកម្ពុជា និងថៃ ជាអ្នកដោះស្រាយ
(ភ្នំពេញ)៖ សម្តេចតេជោ ហ៊ុន សែន បានបញ្ជាក់ថា កោះគុត ស្ថិតនៅតំបន់ត្រួតស៊ីគ្នារវាងកម្ពុជា និងថៃ ដោយសម្តេចធ្លាប់ពិភាក្សាជាមួយសមភាគីថៃ តាំងពីជំនាន់លោកនាយករដ្ឋមន្ត្រី Chatichai Choonhavan លើអាជីវកម្មខួងយកប្រេង។ សម្តេចបានលើកឡើងថា តាំងពីមានអនុស្សារណៈនៃការយោគយល់គ្នាមួយ (MOU) នាឆ្នាំ២០០១ ភាគីទាំងពីរមិនទាន់បានជជែកគ្នាចប់សព្វគ្រប់ឡើយ ។ ជាមួយនេះ សម្តេចតេជោ បានស្នើឱ្យគ្រប់គ្នាស្ងាត់ស្ងៀម ដោយទុកឱ្យរដ្ឋាភិបាលកម្ពុជា និងថៃ ជាអ្នកដោះស្រាយ ។
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានថ្លែងដូច្នេះ ក្នុងឱកាសអញ្ជើញជាព្រះរាជតំណាងដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងបរទេស លើកទី៣២ នៅវិទ្យាស្ថានគរុកោសល្យ និងវិក្រឹត្យការ រាជធានីភ្នំពេញ នាព្រឹកថ្ងៃទី២១ ខែវិច្ឆិកា ឆ្នាំ២០២៤ នៅវិទ្យាស្ថានជាតិអប់រំ ។
សម្ដេចប្រធានព្រឹទ្ធសភា បានអះអាងថា វាមិនទាន់ដល់ពេលនោះឡើយ ដែលលើកយកករណី «កោះគុត» ដែលស្ថិតនៅតំបន់ត្រួតស៊ីគ្នា រវាងភូមិសាស្ត្រខេត្តកោះកុង និងខេត្តត្រាត របស់ថៃ ទៅកាន់តុលាការអន្តរជាតិ ទៅតាមការញុះញង់របស់ចលនាប្រឆាំងជ្រុលនិយម ។ សម្ដេច ថា កម្ពុជា ត្រូវរក្សាទំនាក់ទំនងល្អជាមួយប្រទេសជាតិខាង ខណៈយន្តការចរចាទ្វេភាគីកំពុងដំណើរការ ។
សម្តេចតេជោ បន្តថា ជាដំបៅមិនឈឺ យកឈើចាក់ ។ សម្តេច ក៏បានសម្ដែងក្ដីព្រួយបារម្ភពីការផ្ទុះអាវុធដែលអាចកើតមានឡើងរវាងកម្ពុជា-ថៃ ដោយសារតែញុះញង់ឱ្យមានចលនាបាតុកម្មទូទាំងប្រទេស ។ តែយ៉ាងណា សម្ដេចតេជោ ហ៊ុន សែន បញ្ជាក់ថា នៅតំបន់កោះគុតនេះ គ្មានការចាំបាច់ ក្នុងការចល័តកងទ័ពនោះទេ ។
សម្តេចតេជោ ហ៊ុន សែន ដែលជាអតីតនាយករដ្ឋមន្ត្រី មានបទពិសោធជោគជាំលើការដឹកនាំប្រទេស បានស្នើឱ្យគ្រប់គ្នា ទុកចិត្តលើរដ្ឋាភិបាល ដោយប្រើលទ្ធភាពចរចាជាមួយប្រទេសជិតខាង ជៀសវាងការមើលមុខគ្នាមិនចំ និងថា មិនទាន់ដល់ពេលនោះឡើយ ដែលយកបញ្ហានេះ ទៅកាន់តុលាការអន្តរជាតិ ព្រោះគ្រប់យ៉ាង អាចនៅចរចាគ្នាបាន រវាងរដ្ឋាភិបាលទាំងពីរ កម្ពុជា-ថៃ ។ សម្តេចថា រឿងនេះ បើពលរដ្ឋនៅមិនស្ងៀមទេ អាចនឹងមានបញ្ហាដល់ផ្ទៃក្នុង ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
