មន្ត្រីជាន់ខ្ពស់សុខាភិបាលប្រាប់ថា ជំងឺទឹកនោមផ្អែម កំពុងប្រឈមខ្ពស់ជាងគេក្នុងចំណោមជំងឺមិនឆ្លង
កំពត៖រដ្ឋលេខាធិការក្រសួងសុខាភិបាលឯកឧត្តមវេជ្ជបណ្ឌិត ង៉ូវ កាង បានមានប្រសាសន៍ថា តាមរបាយការណ៍របស់អង្គការសុខភាពពិភពបានបញ្ជាក់ថា មានជំងឺមិនឆ្លងដែលកំពុងប្រឈមខ្ពស់ជាងគេចំនួន៤ ក្នុងនោះមាន ទី១.ជំងឺទឹកនោមផ្អែម, ទី២.ជំងឺបេះដូង និងសរសៃឈាម, ទី៣.ជំងឺមហារីក និងទី៤.គឺជំងឺត្បៀតទងសួតរាំរ៉ៃ។ ឯកឧត្តមវេជ្ជបណ្ឌិតក៏បានអំពាវនាវដល់ប្រជាពលរដ្ឋឱ្យយកចិត្តទុកដាក់លើបញ្ហាសុខភាព ពិសេសជំងឺទឹកនោមផ្អែម។
ថ្លែងក្នុងទិវាជំងឺទឹកនោមផ្អែមពិភពលោក ឆ្នាំ២០២៤ ក្រោមប្រធានបទ “ជម្នះឧបសគ្គ ដោះស្រាយបញ្ហាទឹកនោមផ្អែម និងសុខមាលភាព” កាលពីព្រឹកថ្ងៃទី២០ ខែវិច្ឆិកា ឆ្នាំ២០២៤នៅខេត្តកំពត ឯកឧត្តមវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាលលើកឡើងថា បច្ចុប្បន្នតាមរបាយការណ៍របស់អង្គការសុខភាពពិភពបានឱ្យដឹងថា មានជំងឺមិនឆ្លងដែលកំពុងប្រឈមខ្ពស់ជាងគេចំនួន៤ ក្នុងនោះមាន ទី១.ជំងឺទឹកនោមផ្អែម, ទី២.ជំងឺបេះដូង និងសរសៃឈាម, ទី៣.ជំងឺមហារីក និងទី៤.គឺជំងឺត្បៀតទងសួតរាំរ៉ៃ។ ឯកឧត្តមរដ្ឋលេខាធិការបានអំពាវនាវដល់ប្រជាពលរដ្ឋដែលមានវ័យប្រឈមនឹងជំងឺទឹកនោមផ្អែមគឺចាប់៤០ឆ្នាំឡើង ទៅធ្វើតេស្តជាតិស្ករនៅតាមមណ្ឌលសុខភាពដែលនៅជិត និងតាមដានរាល់រោគសញ្ញារបស់ជំងឺទឹកនោមផ្អែម និងធ្វើតាមការណែនាំរបស់គ្រូពេទ្យ ដើម្បីទប់ស្កាត់ការកើតជំងឺទឹកនោមផ្អែម។
ចំណែកលោកស្រីវេជ្ជបណ្ឌិត យូ សុគន្ធ ប្រធានមន្ទីរសុខាភិបាលខេត្តកំពតបានបញ្ជាក់ថា ១០ខែឆ្នាំ២០២៤នេះ ពលរដ្ឋដែលមកមកពិគ្រោះ និងព្យាបាលជំងឺទឹកនោមផ្អែម ចំនួន ៤ ២៧៥ នាក់ (ស្រី ២,៩៣៧នាក់)។ មន្ទីរបានធ្វើការបណ្តុះបណ្តាលស្តីពីសំណុំសកម្មភាពជាសារវន្តនៃជំងឺមិនឆ្លង (ជំងឺទឹកនោមផ្អែម និងជំងឺលើសសម្ពាធឈាម)ដល់មន្ត្រីមណ្ឌលសុខភាពទាំង៦៦មណ្ឌល និងបន្តធ្វើការបណ្តុះបណ្តាលដល់ក្រុមទ្រទ្រង់សុខភាពភូមិទាំង ៤៩១ភូមិរួចរាល់ផងដែរ។បច្ចុប្បន្នសេវាពិនិត្យ និងព្យាបាលជំងឺទឹកនោមផ្អែម និងលើសសម្ពាធឈាម មាននៅគ្រប់មណ្ឌលសុខភាព និងមន្ទីរពេទ្យបង្អែកទាំងអស់នៅទូទាំងខេត្តកំពត។
បន្ថែមកិច្ចការសុខភាពនេះដែរលោក ខៀវ រិទ្ធិភ័ណ អភិបាលរងខេត្ត បញ្ជាក់ថា បច្ចុប្បន្នរាជរដ្ឋាភិបាលកម្ពុជា កំពុងយកចិត្តទុកដាក់ចំពោះបញ្ហាប្រឈមសុខភាពសាធារណៈ ជាពិសេសការកើនឡើងនៃជំងឺមិនឆ្លង។ កម្ពុជាមានវិធានការបង្ការទប់ស្កាត់ ក្នុងគោលដៅជួយលើកកម្ពស់សុខភាពពលរដ្ឋឱ្យកាន់តែប្រសើរ ដើម្បីការអភិវឌ្ឍសេដ្ឋកិច្ចជាតិ គ្រួសារ និងការសម្រេចនូវគោលដៅអភិវឌ្ឍន៍ប្រកបដោយចីរភាព៕
អត្ថបទនិងរូបភាព៖សិលា សារិន
