សម្តេចតេជោ ហ៊ុន សែន បង្ហាញមោទនភាពជាមួយកិច្ចការដែលបានធ្វើមហាសន្និបាតក្នុងរយៈពេល ១២ដង ក្នុងនោះ កម្ពុជា មានឱកាសធ្វើជាម្ចាស់ផ្ទះបាន ២ដង
(ភ្នំពេញ)៖ សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស ប្រជាជនកម្ពុជា និងជាប្រធានកិត្តិយសមហាសន្និបាត ICAPP លើកទី១២ បានថ្លែងបង្ហាញនូវមោទនភាព ដែលកម្ពុជាបានធ្វើជាម្ចាស់ផ្ទះរហូតដល់ទៅ ២ដង ក្នុងខណៈដែលមហាសន្និបាតសន្និសីទអន្តរជាតិ នៃបណ្តាគណបក្សនយោបាយនៅអាស៊ី ហៅថា ICAPP បានធ្វើឡើងចំនួន ១២ដង ហើយ សម្តេចសង្ឃឹមថា កម្ពុជា នឹងមានឱកាសធ្វើលើកក្រោយទៀត ។
សម្តេចតេជោ ហ៊ុន សែន លើកឡើងដូច្នេះ ក្នុងឱកាសអញ្ជើញថ្លែងសុន្ទរកថាពិសេស ក្នុងពិធីបើកមហាសន្និបាត ICAPP លើកទី១២ ក្រោមប្រធានបទ «ការស្វែងរកសន្តិភាព និងការផ្សះផ្សា» នាព្រឹកថ្ងៃទី២២ ខែវិច្ឆិកា ឆ្នាំ២០២៤ ក្រោមអធិបតីភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អនុប្រធានគណបក្សប្រជាជនកម្ពុជា និងជាប្រធានមហាសន្និបាត ICAPP លើកទី១២ ដោយមានការចូលរួមពីសំណាក់គណៈប្រតិភូជាន់ខ្ពស់ ICAPP តំណាងគណបក្សនយោបាយ ៥២ប្រទេស ព្រមទាំងភ្ញៀវកិត្តិយសជាតិ និងអន្តរជាតិជាច្រើនរូប ។
សម្តេចតេជោ ហ៊ុន សែន បានថ្លែងថា «ខ្ញុំពិតជាមានមោទនភាពជាមួយនឹងកិច្ចការដែលបានធ្វើមហាសន្និបាតក្នុងរយៈពេល ១២ដង កម្ពុជាមានឱកាសធ្វើជាម្ចាស់ផ្ទះបាន ២ដង ដោយឡែកអាស៊ាន ខ្លួនខ្ញុំផ្ទាល់បានធ្វើជាប្រធានអាស៊ានរហូត ៣ដង ចឹងទេវាមិនចំឡែកទេនៅក្នុងការចូលរួមចំណែកនៅក្នុងក្របខណ្ឌមហាសន្និបាតសន្និសីទអន្តរជាតិ នៃបណ្តាគណបក្សនយោបាយនៅអាស៊ី ហៅថា (ICAPP) រយៈពេល ២ដងនេះ ហើយសង្ឃឹមថាលើកក្រោយនឹងអាចមានទី៣ និងទី៤ តទៅទៀត»។
សម្ដេចតេជោ ហ៊ុន សែន ថ្លែងទៀតថា ក្នុងនាមជាប្រធានគណបក្សប្រជាជនកម្ពុជា សម្តេចពិតជាមានកិត្តិយសដែលប្រទេសកម្ពុជាបានទទួលធ្វើជាម្ចាស់ផ្ទះស្វាគមន៍ ប្រទេសជាសមាជិកគណបក្សនយោបាយនៅអាស៊ី ហៅថា (ICAPP) និងស្ថាប័នដៃគូជាង ៥២ប្រទេស មកពីតំបន់ផ្សេងៗនៅលើពិភពលោក ។
សម្ដេចតេជោ ហ៊ុន សែន ក៏បានថ្លែងវាយតម្លៃខ្ពស់លើភាពខ្លាំងរបស់គណបក្សនយោបាយនៅអាស៊ី ហៅថា (ICAPP) ដែលបានកើនឡើងជាលំដាប់ ចាប់តាំងពីត្រូវបានបង្កើតឡើងនៅឆ្នាំ២០០០មក និងបានប្រែក្លាយខ្លួនទៅជាអង្គការ គណបក្សនយោបាយដ៏ធំបំផុតមួយ ទាំងទំហំ និងទាំងឥទ្ធិពលលើភូមិសាស្ត្រនយោបាយ។
សម្ដេចតេជោ ហ៊ុន សែន បានបន្ថែមថា សម្តេចក៏មានមោទនភាពផងដែរ ក្នុងការដឹកនាំគណបក្សប្រជាជនកម្ពុជា ចូលរួមចំណែកក្នុងសកម្មភាពនានារបស់បណ្តាគណបក្សនយោបាយនៅអាស៊ី ហៅថា (ICAPP) រួមទាំងមហាសន្និបាតរបស់ខ្លួន ក្នុងចំណោមគណបក្សនយោបាយចំនួន ៣០០ ដែលមានភាពចម្រុះគ្នាទាំងនិន្នាការនយោបាយ និងមនោគមវិទ្យា។
សម្ដេចតេជោ ហ៊ុន សែន បានបន្ថែមថា ក្នុងនាមជាម្ចាស់ផ្ទះនៃមហាសន្និបាតនេះ សម្តេចយល់ឃើញថា ប្រធានបទ «ការស្វែងរកសន្តិភាព និងការផ្សះផ្សា» គឺជាប្រធានបទដែលកម្ពុជា មានបទពិសោធន៍យ៉ាងធំធេង និងជំនាញដែលអាចធ្វើការចែករំលែកដោយទាញចេញពីតថភាពពិត ដែលកម្ពុជា បានខិតខំតស៊ូបញ្ចប់ជម្លោះអស់រយៈពេលជាច្រើនឆ្នាំ និងនាំមកនូវសន្តិភាព ក៏ដូចជាវិបុលភាពក្នុងរយៈពេលជាង ៣ទស្សវត្សមកនេះផងដែរ៕
ដោយ ៖ វណ្ណលុក
