ប្រធានរដ្ឋសភា ផ្ញើសារលិខិតអបអរសាទរសម្ដេចធិបតី ហ៊ុន ម៉ាណែត នាឱកាសទទួលបានពានរង្វាន់ “ភាពជាដឹកនាំឆ្នើមពិភពលោក” ពីវិទ្យាស្ថាន KSI
(ភ្នំពេញ)៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ផ្ញើសារលិខិតអបអរសាទរសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាឱកាសដ៏មហានក្ខត្តឫក្សវិសេសវិសាល និងជាមហាកិត្តិយសដ៏ឧត្តុង្គឧត្តមបំផុតដែល សម្ដេចធិបតី ទទួលបានពានរង្វាន់ “ភាពជាដឹកនាំឆ្នើមពិភពលោក” ពីវិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក (KSI) នៅថ្ងៃទី២៦ ខែវិច្ឆិកា ឆ្នាំ ២០២៤ ។
ក្នុងសារលិខិតអបអរសាទរ សម្តេចធិបតី នាយករដ្ឋមន្ត្រី សម្តេចប្រធានរដ្ឋសភា សូមសម្តែងនូវសេចក្តី សោមនស្សរីករាយយ៉ាងក្រៃលែង និងសូមសម្តែងនូវអំណរសារទរដោយស្មោះអស់ពីដួងចិត្ត ជូនចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នាឱកាសដ៏មហា នក្ខត្តឫក្សវិសេសវិសាល និងជាមហាកិត្តិយសដ៏ឧត្តុង្គឧត្តមបំផុតដែល សម្តេចធិបតី ទទួលបានពានរង្វាន់ “ភាពជាដឹកនាំឆ្នើមពិភពលោក” ពីវិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក (KSI) នៅថ្ងៃទី២៦ ខែវិច្ឆិកា ឆ្នាំ ២០២៤។
ពានរង្វាន់នេះពិតជាទទួលស្គាល់តួនាទី និងការរួមចំណែកយ៉ាងសំខាន់បំផុតរបស់ សម្តេចធិបតី ដែលជានាយករដ្ឋមន្ត្រីនៃព្រះរាជាណាចក្រកម្ពុជាដ៏ឆ្នើមមួយរូប ប្រកបដោយសក្តានុពល ទាំងចំណេះដឹង និងសមត្ថភាព ស្វាហាប់រស់រវើក ទំនួលខុសត្រូវខ្ពស់ និងបានលះបង់យកអស់កម្លាំងកាយចិត្ត ដឹកនាំប្រទេសឱ្យកាន់តែមានវិបុលភាព និងការរីកចម្រើនលើគ្រប់វិស័យបន្តពី សម្តេចអគ្គមហាសេនាបតីតេជោ ហ៊ុន សែន ដែលបានធ្វើពលិកម្មគ្រប់បែបយ៉ាងសូម្បីជីវិត សម្តេចតេជោ ផ្ទាល់ក្នុងបុព្វហេតុជាតិមាតុភូមិ និងប្រជាជនកម្ពុជា។
ការទទួលពានរង្វាន់នេះ គឺពិតជាស័ក្តិសមបំផុតចំពោះលក្ខណៈសម្បត្តិនៃការដឹកនាំ និងសមិទ្ធផលទាំងឡាយដែលបានកើតចេញពីស្នាដៃនៃការដឹកនាំប្រកបដោយកិត្តិបណ្ឌិតឈ្លាសវៃ និងប៉ិនប្រសព្វ ពោរពេញដោយឆន្ទៈមនសិការ ភក្ដីភាពយ៉ាងមុតមាំចំពោះជាតិ និងប្រជាជន ក្នុងការដឹកនាំប្រទេសរយៈពេលជាងមួយឆ្នាំកន្លងមកនេះព្រមទាំងការបន្តរក្សាបានយ៉ាងរឹងមាំនូវសុខសន្តិភាព ស្ថិរភាពនយោបាយ និងជំរុញកំណើនសេដ្ឋកិច្ចចេញពីវិបត្តិសាកល ដោយរក្សាបានយ៉ាងល្អនូវស្ថានភាពម៉ាក្រូសេដ្ឋកិច្ច។ ជាពិសេស សមិទ្ធផលនៃការដឹកនាំរបស់ សម្តេចធិបតី នាំឱ្យមានការពេញចិត្តខ្លាំងពីសំណាក់ប្រជាពលរដ្ឋ។
យើងខ្ញុំមានជំនឿជាក់យ៉ាងមុតមាំថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំ ដ៏ខ្ពង់ខ្ពស់របស់ សម្តេចធិបតី នឹងបន្តបំពេញបេសកកម្មជាតិដ៏ថ្លៃថ្លាប្រកបដោយឧត្តមគតិ និងការប្តេជ្ញាចិត្ត ដ៏មុះមុត តាមរយៈការជំរុញអនុវត្តឱ្យបានជោគជ័យនូវ “យុទ្ធសាស្ត្របញ្ចកោណ” ព្រមទាំងកម្មវិធីគោល នយោបាយអាទិភាព និងវិធានការគន្លឹះផ្សេងៗ ដើម្បីបន្តពុះពារបម្រើ និងការពារនូវឧត្តមប្រយោជន៍ជាតិ និងប្រជាជនកម្ពុជាគ្រប់កាលៈទេសៈ ស្របតាមឆន្ទៈ និងបំណងប្រាថ្នារបស់ប្រជាជន ក៏ដូចជាលើកស្ទួយ កិត្យានុភាពជាតិទាំងនៅក្នុងតំបន់ និងលើឆាកអន្តរជាតិ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
