(ភ្នំពេញ)៖ គ្រូបង្វឹកកីឡាប្រដាល់សកល មកពីក្លឹបកីឡាប្រដាល់សកល រាជធានី​ខេត្ត ចំនួន៣៦នាក់ បានបញ្ចប់ វគ្គបណ្តុះបណ្តាលគ្រូបង្វឹកថ្នាក់ជាតិកីឡាប្រ​ដាល់​សកលឆ្នាំ២០២៤ ដោយទទួលបានលទ្ធផលនិទ្ទេសល្អច្រើន ដែលបាន​បញ្ជាក់ពីការយល់ដឹងខ្ពស់។

នេះបើយោងតាមការវាយតម្លៃពីសំណាក់គ្រូឧទ្ទេស អន្តរជាតិ លោក Russell stutely ថ្លែងបញ្ជាក់ ក្នុងពិធីបិទវគ្គ បណ្តុះបណ្តាលគ្រូបង្វឹកថ្នាក់ជាតិកីឡា​ប្រដាល់សកលឆ្នាំ២០២៤ នាល្ងាចថ្ងៃ ២៨ ខែ វិច្ឆិកា ឆ្នាំ២០២៤ នៅអាគារគណៈកម្មាធិការជាតិអូឡាំពិកកម្ពុជា។

លោក Russell stutely បានគូសបញ្ជាក់ឱ្យដឹងទៀតថា ឆ្លងកាត់ការ​សិក្សារយៈ​ពេល ៤ថ្ងៃកន្លងមកនេះ សិក្ខាកាមដែលជាគ្រូបង្វឹកមកពីបណ្តាក្លឹប​ប្រដាល់សលរាជធានី ខេត្ត ទាំងអស់ បានខិតខំយកចិត្តទុកដាក់ក្រេប​ជញ្ជក់យកចំណេះដឹងយ៉ាងខ្លាំង ដើម្បីនាំយកចំណេះជំនាញយកទៅអភិវឌ្ឍន៍​ធនធានតាមបណ្តាក្លឹប។

គ្រូឧទ្ទេសអន្តរជាតិរូបនេះ បានអះអាងទៀតថា វគ្គបណ្តុះបណ្តាលរយៈពេល៤ថ្ងៃនេះ ការបង្ហាត់មានទាំងទ្រឹស្តី និងការអនុវត្តផ្ទាល់ អំពីរបៀបបង្ហាត់កីឡាករកីឡាការិនីអាជីពប្រដាល់សកល ។ លោកថា គ្រូបង្វឹកដែលបានឆ្លងកាត់ការបណ្តុះបណ្តាលនេះ ប្រសិនយកចំណេះជំនាញដែលបានសិក្សារៀនសូត្រទៅអនុវត្តក្នុងការបង្ហាត់សិស្សនៅតាមបណ្តាក្លឹបដោយយកចិត្តទុកដាក់នោះ ធនធានកីឡាករកីឡាការិនីប្រដាល់សកលអាជីពនៅកម្ពុជានឹងមានសក្កានុពល។

សូមបញ្ជាក់ថា វគ្គបណ្តុះបណ្តាលគ្រូបង្វឹកថ្នាក់ជាតិកីឡាប្រដាល់​សកល​ឆ្នាំ២០២៤ ដែលរៀបចំដោយសហព័ន្ធកីឡាប្រដាល់សកលកម្ពុជា ក្រោម​ការឧបត្ថម្ភគាំទ្រថវិកាពីក្រសួងអប់រំយុវជននិងកីឡា រយៈពេល៤ថ្ងៃ មានសិក្ខា​កាមដែលជាគ្រូបង្វឹកក្លឹបកីឡាប្រដាល់សកលរាជធានីខេត្តចូលរួមចំនួន៣៦នាក់ ក្នុងនោះ គ្រូបង្វឹក២៦រូបទទួលបាននិទ្ទេសល្អ និង១០រូបទទួលបា​ននិទ្ទេសមធ្យម ៕

ថត ៖ ជីម ភារ៉ា
អត្ថបទ ៖ ជាវ ចន្ធូ