ចលនាបរិច្ចាគឈាមដោយស្ម័គ្រចិត្តនៅខេត្តព្រះវិហារ ដែលចូលរួមផ្ទាល់ដោយឧបនាយករដ្ឋមន្រ្តី ហ៊ុន ម៉ានី
ព្រះវិហារ៖ដោយប្រើប្រាស់ឱកាសអញ្ជើញចូលរួមសម្ពោធដាក់ឱ្យប្រើប្រាស់ជាផ្លូវការមណ្ឌលផ្តល់ឈាមសហភាពសហព័ន្ធយុវជនកម្ពុជា(ស.ស.យ.ក)ខេត្តព្រះវិហារ និងបញ្ចុះបឋមសិលាសាងសង់ទីស្នាក់ការស.ស.យ.កខេត្ត នៅភូមិឡអិដ្ឋ សង្កាត់កំពង់ប្រណាក ក្រុងព្រះវិហារ ខេត្តព្រះវិហារកាលពីថ្ងៃទី៣០ ខែវិច្ឆិកា ឆ្នាំ២០២៤ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានស.ស.យ.ក កម្ពុជា បានចូលរួមដោយផ្ទាល់ក្នុងការបរិច្ចាគឈាមជាលើកទី១៣ ដើម្បីសង្រ្គោះជីវិតអ្នកមានតម្រូវការឈាម ។
ចូលរួមដោយផ្ទាល់ជាមួយអ្នកបរិច្ចាគឈាម ក្នុងមណ្ឌលផ្តល់ឈាមស.ស.យ.ក ខេត្តព្រះវិហារឯកឧត្តមឧបនាយរដ្ឋមន្ត្រី ហ៊ុន ម៉ានី មានប្រសាសន៍រំលឹកដល់ថ្នាក់ដឹកនាំស.ស.យ.ក ខេត្ត សមាជិកសមាជិកាស.ស.យ.ក ខេត្តទាំងអស់ថា ក្រោយពីមានអគារមណ្ឌលផ្តល់ឈាមនេះហើយ គឺត្រូវធ្វើយ៉ាងណាឱ្យមានសកម្មភាពផ្តល់ឈាមជានិច្ច ដើម្បីចូលរួមជួយដល់ប្រជាពលរដ្ឋដែលត្រូវការចាំបាច់ដើម្បីសង្គ្រោះអាយុជីវិត។
ឯកឧត្តមបន្តថា មិនត្រូវមានក្តីព្រួយបារម្ភពីសុវត្ថិភាពក្នុងការបរិច្ចាគឈាមនោះទេ ព្រោះមណ្ឌលផ្តល់ឈាម នៃស.ស.យ.ក ខេត្តព្រះវិហារ ត្រូវបានសាងសង់ឡើងដោយស្តង់ដាបច្ចេកទេសវេជ្ជសាស្ត្រត្រឹមត្រូវ។វត្តមាននៃមណ្ឌលផ្តល់ឈាមគឺដើម្បីជំរុញចលនាបរិច្ចាគឈាមដោយស្ម័គ្រចិត្ត ពីសំណាក់សាធារណជនឱ្យកាន់តែមានចំនួនច្រើនឡើង ដើម្បីបំពេញតម្រូវការឈាមសម្រាប់ជួយសង្រ្គោះ ដល់អាយុជីវិត ប្រជាពលរដ្ឋខេត្តព្រះវិហារដែលត្រូវការឈាមជាបន្ទាន់ ។
អគារមណ្ឌលផ្តល់ឈាមរបស់ស.ស.យ.ក ខេត្តព្រះវិហារ ដែលដាក់សម្ពោធមានទំហំ ៤ម៉ែត្រ គុណនឹង ១៦ម៉ែត្រ ។ក្នុងនេះ មានកន្លែងផ្តល់ឈាម កន្លែងប្រឹក្សាយោបល់ កន្លែងរង់ចាំ បន្ទប់ពិនិត្យសុខភាព បន្ទប់ប្រជុំ និងបានបំពាក់ឧបករណ៍ បរិក្ខាមួយចំនួនដូចជា ទូទឹកកកសម្រាប់រក្សាឈាមធម្មតា និងទូទឹកកកសម្រាប់ទុកប្លាស្មា ។អគារនេះចំណាយអស់ថវិកា ៣៥ .០០០ដុល្លារអាមេរិក។ឯកឧត្តម គីម រិទ្ធី អភិបាលខេត្តព្រះវិហារមានប្រសាសន៍ថា វត្តមាននៃអគារនេះបង្កភាពងាយស្រួលមិនបាច់ចល័តយកមកឈាមពីភ្នំពេញ និងពីខេត្តសៀមរាបទៀតទេ៕
អត្ថបទ និងរូបភាព៖ឡុង សំបូរ
