រដ្ឋបាលខេត្តសៀមរាប ផ្សព្វផ្សាយសារអប់រំសុខភាពលើតុ ដើម្បីលើកកម្ពស់អាហាររូបត្ថម្ភល្អ
សៀមរាប៖អង្គការរ៉ាចា( RACHA) សហការជាមួយមន្ទីរសុខាភិបាលខេត្តសៀមរាបនិងការឧបត្ថម្ភពីអង្គការយូនីសេហ្វ( UNICEF) កាលពីថ្ងៃទី២៩ ខែវិច្ឆិកា បានរៀបចំកម្មវិធីផ្សព្វផ្សាយសារអប់រំសុខភាពលើតុ ដើម្បីលើកកម្ពស់អាហាររូបត្ថម្ភតិចអំបិល តិចខ្លាញ់ និងតិចស្ករ នៅសណ្ឋាគារបាយ័ន អេរ៉ា។តំណាងអាជ្ញាធរឃុំ សង្កាត់ មន្រ្តីមន្ទីរសុខាភិបាល ក្រុមហ៊ុនសណ្ឋាគារ ភោជនីយដ្ឋាន និងអាហារដ្ឋានចំនួន១៥០ នាក់បានចូលរួមក្នុងកម្មវិធីនេះ ។
លោកស្រីវេជ្ជបណ្ឌិត ចាន់ ធានី នាយិកាប្រតិបត្តិអង្គការ RACHA បាន លើកឡើងអំពីសារៈសំខាន់ក្នុងការប្រើប្រាស់អាហារដែលតិចអំបិល តិចខ្លាញ់ និងតិចស្ករ ដើម្បីបន្ថយហានិភ័យជំងឺមិនឆ្លង ដូចជា ជំងឺបេះដូង ជំងឺរលាកសរសៃឈាម និងជំងឺប្រព័ន្ធរំលាយអាហារ។
លោក នាក់ ណេរ៉ុន អភិបាលរងខេត្តសៀមរាបដែលអញ្ជើញចូលរួមក្នុងកម្មវិធីនេះបានបញ្ជាក់ថា សារអប់រំនេះ មិនត្រឹមតែជួយឱ្យប្រជាពលរដ្ឋស្វែងយល់អំពីគ្រោះថ្នាក់នៃអំបិល ខ្លាញ់ និងស្ករជាច្រើនប៉ុណ្ណោះទេ តែថែមទាំងលើកស្ទួយសុខភាពសាធារណៈ និងកែប្រែអាហាររបស់អាជីវករ៕
ដោយ៖ប៊ុន រដ្ឋា
