ភ្នំពេញ ៖ ក្រុមហ៊ុនអាកាសចរណ៍ Emirates ដែលជាក្រុមហ៊ុនអាកាសចរណ៍អន្តរជាតិដ៏ធំបំផុតរបស់ពិភពលោកមានសុទិដ្ឋិនិយមចំពោះអនាគតថានឹងមានកំណើនចំនួនអ្នកដំណើរទាំងក្នុងនិងក្រៅស្រុក នេះបើយោងតាមក្រុមប្រតិបត្តិរបស់ក្រុមហ៊ុនអាកាសចរណ៍នេះប្រចាំប្រទេសកម្ពុជា។
 
នៅក្នុងកិច្ចប្រជុំតុមូលជាមួយអ្នកសារព័ត៌មានកម្ពុជា លោក Mohammed Al Qassim ជាអ្នកគ្រប់គ្រងប្រចាំប្រទេសកម្ពុជានៃក្រុមហ៊ុន Emiratesបានលើកឡើងថា លោកមានសុទិដ្ឋិនិយមយ៉ាងខ្លាំងចំពោះកំណើនអ្នកដំណើរនៅគ្រប់បណ្តាញរបស់ក្រុមហ៊ុនអាកាសចរណ៍ដែលគ្របដណ្តប់លើ ១៤៨ គោលដៅក្នុងប្រទេសចំនួន ៨០។ លោក Al Qassim ក៏បានលើកឡើងអំពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាង កម្ពុជា និងអេមីរ៉ាតអារ៉ាប់រួម (CEPA) ដែលត្រួសត្រាយផ្លូវសម្រាប់យុគសម័យថ្មីនៃកិច្ចសហប្រតិបត្តិការពាណិជ្ជកម្ម និងវិនិយោគរវាងកម្ពុជា និងអេមីរ៉ាតអារ៉ាប់រួម (UAE)។ ក្រុមហ៊ុន Emirates បានបន្តសេវាកម្មប្រចាំថ្ងៃរវាងទីក្រុងភ្នំពេញ និងឌូបៃតាមរយៈសិង្ហបុរីកាលពីខែឧសភាឆ្នាំនេះ។ ការត្រលប់មកវិញរបស់ក្រុមហ៊ុនអាកាសចរណ៍ Emirates ត្រូវបានកត់សម្គាល់និងស្វាគមន៍ដោយមានពិធីស្វាគមន៍ជាផ្លូវការ ក្រោមអធិបតីភាព ឯកឧត្តម ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលកម្ពុជានៅអាកាសយានដ្ឋានអន្តរជាតិភ្នំពេញ (ពោធិ៍ចិនតុង)។
 
ប្រាំមួយខែបន្ទាប់ពីការបន្តជើងហោះហើរប្រចាំថ្ងៃរបស់ក្រុមហ៊ុនអាកាសចរណ៍នេះមកទីក្រុងភ្នំពេញ ក្រុមប្រតិបត្តិរបស់ក្រុមហ៊ុនអាកាសចរណ៍ Emirates ប្រចាំប្រទេសកម្ពុជាបានពិភាក្សាអំពីទស្សនវិស័យអាកាសចរណ៍សម្រាប់អនាគតរបស់ប្រទេសកម្ពុជា ភាពសុទិដ្ឋិនិយមលើចំនួនភ្ញៀវទេសចរណ៍ ការពង្រឹងសេវាកម្មរបស់ក្រុមហ៊ុនEmirates គំនិតផ្តួចផ្តើមស្តីពីនិរន្តភាព និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួម (CEPA)នៅក្នុងកិច្ចជុំតុមូលជាមួយសារព័ត៌មាននៅសណ្ឋាគារ Hyatt Regencyនៅរាជធានីភ្នំពេញ ថ្ងៃទី ២៩ ខែវិច្ឆិកា។ លោក Mohammed Al Qassim អ្នកគ្រប់គ្រងប្រចាំប្រទេសកម្ពុជានៃក្រុមហ៊ុន Emirates បានមានប្រសាសន៍ថា៖ «ចាប់តាំងពីយើងដំណើការជើងហោះហើររបស់យើងឡើងវិញក្នុងខែឧសភាឆ្នាំនេះ យើងបានកត់សម្គាល់ឃើញថា ទីក្រុងភ្នំពេញកំពុងក្លាយជាគោលដៅទាក់ទាញកាន់តែខ្លាំងឡើងសម្រាប់អ្នកដំណើរទូទាំងបណ្តាញសាកលរបស់យើងជាមួយនឹងកំណើនជើងហោះហើរទៅកាន់ប្រទេសសិង្ហបុរី»។

លោកបានមានប្រសាសន៍បន្ថែមថា៖ «យើងសង្កេតឃើញថា ក្រុមហ៊ុនអាកាសចរណ៍កាន់តែច្រើនកំពុងបន្ថែមប្រទេសកម្ពុជាទៅក្នុងបណ្តាញហោះហើររបស់ពួកគេដែលសកម្មភាពនេះនឹងគាំទ្រដល់ចក្ខុវិស័យរបស់ក្រសួងទេសចរណ៍កម្ពុជាក្នុងការជំរុញការអភិវឌ្ឍន៍ទេសចរណ៍នៅក្នុងប្រទេសស្របតាមយុទ្ធសាស្ត្រ BUILD Plus 3Ds »។
លោក Al Qassim ក៏បានលើកឡើងអំពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជានិងអាមីរ៉ាតអារ៉ាប់រួម (CEPA)ដោយលោកបានមានប្រសាសន៍ថា ក្រុមហ៊ុន Emirates ជាក្រុមហ៊ុនសមស្របមួយដែលជាតម្រូវការដល់អាជីវកម្មអេមីរ៉ាតអារ៉ាប់រួមដែលកំពុងមានប្រតិបត្តិការនៅកម្ពុជា។ កិច្ចព្រមព្រៀងដែលបានចូលជាធរមាននៅថ្ងៃទី ៣១ ខែមករា ឆ្នាំ ២០២៤ បានជួយជម្រុញពាណិជ្ជកម្មរវាងកម្ពុជា និងអេមីរ៉ាតអារ៉ាប់រួមដោយមាន ការកាត់បន្ថយពន្ធនាំចូល កាត់បន្ថយការរឹតបន្តឹងពាណិជ្ជកម្ម និងជម្រុញពាណិជ្ជកម្មទំនិញ សេវាកម្ម និងការវិនិយោគ។ សេដ្ឋកិច្ចគ្រប់ជ្រុងជ្រោយរវាងកម្ពុជានិងអាមីរ៉ាតអារ៉ាប់រួម (CEPA) ត្រូវបានគេរំពឹងថានឹងបង្កើនពាណិជ្ជកម្មរវាងកម្ពុជា និងអេមីរ៉ាតអារ៉ាប់រួម។ បច្ចុប្បន្ន ក្រុមហ៊ុន Emirates កំពុងផ្តល់តម្លៃសំបុត្រយន្តហោះដ៏ទាក់ទាញទៅកាន់ទីក្រុងឌូបៃ ប្រទេសសិង្ហបុរី និងប្រទេសជាច្រើនទៀត។ អ្នកដំណើរកម្ពុជាឥឡូវនេះអាចចំណាយពេលកាន់តែតិចដោយធ្វើដំណើរតាមបណ្តាញជើងហោះហើរដ៏ធំរបស់ Emirates តាមរយៈប្រទេសសិង្ហបុរីដើម្បីធ្វើដំណើរទៅកាន់តំបន់ពេញនិយមនៅទូទាំងទ្វីបអឺរ៉ុប មជ្ឈិមបូព៌ា អាមេរិកខាងជើង និងអាហ្វ្រិក។
 
ក្រុមហ៊ុន Emirates ក៏កំពុងពង្រឹងវត្តមានក្រុមហ៊ុនអាកាសចរណ៍របស់ខ្លួនពីការរិយាល័យកណ្តាលនៅអគារ The Peak នៅកណ្តាលទីក្រុងភ្នំពេញផងដែរដើម្បីឆ្លើយតបទៅនឹងតម្រូវការរបស់អ្នកដំណើរពីប្រទេសកម្ពុជា ។ ហាងទំនិញរបស់ក្រុមហ៊ុន Emirates ថ្មី រំពឹង ថា នឹង បើកដំណើការ នៅ ឆ្នាំ ២០២៥។ ថ្មីៗនេះ ក្រុមហ៊ុនអាកាសចរណ៍ Emirates បានឈ្នះពានរង្វាន់ «ក្រុមហ៊ុនអាកាសចរណ៍ល្អបំផុតក្នុងពិភពលោក» នៅកម្មវិធី “The ULTRAs2024” ដ៏ល្បីល្បាញ។ ក្រុមហ៊ុនអាកាសចរណ៍មួយនេះ ត្រូវបានទទួលស្គាល់ដោយអ្នកធ្វើដំណើរទូទាំងពិភពលោករាប់លាននាក់ចំំពោះផលិតផលគុណភាពខ្ពស់ សេវាកម្មប្រកបដោយភាពច្នៃប្រឌិត និងតម្លៃសំបុត្រសមរម្យ។

ក្រុមហ៊ុន Emirates ក៏ត្រូវបានទទួលស្គាល់ដោយពានរង្វាន់ជាង ២០ផ្សេងទៀតនៅឆ្នាំនេះ រួមទាំង «ក្រុមហ៊ុនអាកាសចរណ៍ល្អបំផុតលើពិភពលោក» ដោយ Telegraph Travel Emirates ក៏កំពុងផ្តោតលើកិច្ចខិតខំប្រឹងប្រែងរបស់ខ្លួនលើគំនិតផ្តួចផ្តើមប្រកបដោយនិរន្តភាពរួមទាំងការបង្កើនប្រសិទ្ធភាពថាមពល និងនិរន្តភាពផងដែរ។ ថ្មីៗនេះ ក្រុមហ៊ុនអាកាសចរណ៍ Emirates បានចាប់ដៃគូជាមួយក្រុមហ៊ុន Etihad Clean Energy Developmentដើម្បីចាប់ផ្តើមគម្រោងថាមពលពន្លឺព្រះអាទិត្យទ្រង់ទ្រាយធំនៅមជ្ឈមណ្ឌលវិស្វកម្ម Emirates ក្នុងទីក្រុងឌូបៃ។
 
គម្រោងនេះ រួមមានការអភិវឌ្ឍន៍ វិស្វកម្ម លទ្ធកម្ម ការសាងសង់ ការតេស្ដសាកល្បង និងការដាក់ឱ្យដំណើរការប្រព័ន្ធសូឡា photovoltaic (PV) នៅមជ្ឈមណ្ឌលវិស្វកម្ម Emirates រួមជាមួយនឹងសេវាប្រតិបត្តិការ និងថែទាំរយៈពេល ២០ ឆ្នាំ។ កម្មវិធីតំឡើងបន្ទះស្រូបពន្លឺព្រះអាទិត្យប្រមាណ ៣៩,៩៦០ ដែលផ្គត់ផ្គង់ ៣៧% នៃតម្រូវការថាមពលប្រចាំឆ្នាំរបស់រោងចក្រ និងកាត់បន្ថយការបញ្ចេញកាបូនជាង ១៣,០០០ តោនក្នុងមួយឆ្នាំ។ បន្ទះស្រូបពន្លឺព្រះអាទិត្យនេះនឹងផលិតថាមពលរហូតដល់ ២៣,១៧៧ គីឡូវ៉ាត់ និងប៉ាន់ស្មាននឹងផលិតថាមពល ៣៤,៣០១, ៩៦០ គីឡូវ៉ាត់ម៉ោងក្នុងមួយឆ្នាំ។
 
បន្ថែមពីនេះ ក្រុមហ៊ុន Emirates កំពុងប្រើប្រាស់វេទិកា (Platform) របស់ខ្លួនដើម្បីផ្សព្វផ្សាយពីប្រទេសកម្ពុជាជាគោលដៅទេសចរណ៍។ គេហទំព័រ www.emirates.com របស់ក្រុមហ៊ុនអាកាសចរណ៍កំពុងលើកទឹកចិត្តអ្នកធ្វើដំណើរអន្តរជាតិឱ្យស្វែងយល់ពីភាពទាក់ទាញជាច្រើនរបស់ប្រទេសកម្ពុជា រួមទាំងប្រវត្តិសាស្រ្ត សិល្បៈ និងវប្បធម៌ខ្មែរនៅក្នុងរាជធានីភ្នំពេញ ក៏ដូចជាទេសភាព និងឆ្នេរសមុទ្រដ៏គួរឱ្យទាក់ទាញរបស់កម្ពុជាផងដែរ៕ អត្ថបទ ៖ ឈឹម ទីណា