សៀមរាប៖សំឡេងទះដៃអបអរសាទរបានលាន់រំពងឡើងនាសាល​ធំ​នៃសណ្ឋាគារ អង្គរអឺរ៉ា ខេត្តសៀមរាប នារសៀល​ថ្ងៃទី៦ ខែធ្នូ ឆ្នាំ​២០២៤ ខណៈគណៈអធិបតីប្រកាសបើកជាផ្លូវការ“ពិព័រណ៍​ទេស​ចរណ៍​កម្ពុជា-ចិន” ឆ្នាំ២០២៤។ ពិព័រណ៍ដ៏លេច ធ្លោនេះ កើតឡើងពី​កិច្ចសហការរវាងក្រសួងទេសចរណ៍នៃព្រះរាជាណាចក្រកម្ពុជា​ជាមួយ​ស្ថានទូត​នៃសាធារណរដ្ឋ ប្រជាមានិតចិនប្រចាំកម្ពុជា ដើម្បីអបអរ​សាទរការប្រារព្ធ «ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤»។

“ពិព័រណ៍ទេសចរណ៍កម្ពុជា-ចិន”នៅខេត្តសៀមរាប បានប្រារព្ធបើក​ក្រោមអធិបតីភាពឯកឧត្តម ហួត ហាក់ រដ្ឋមន្ត្រី​ក្រសួង​ទេសចរណ៍​កម្ពុជា និងឯកឧត្តម វ៉ាង វិនពីន ឯកអគ្គរដ្ឋទូតនៃសាធារណរដ្ឋ​ប្រជាមានិតចិនប្រចាំកម្ពុជា លោក ង៉ូវ សេងកាក់ អភិបាលរង​ខេត្តសៀមរាប។វត្តមានចូលរួមមានភ្ញៀវកិត្តិយសជាតិ អន្តរជាតិ ប្រតិភូអ្នកទិញ-អ្នក​លក់មកពី​ប្រទេស​ចិន ផ្នែកឯកជនក្នុងវិស័យ​ទេសចរណ៍កម្ពុជា-ចិន ភសិស្ស-និស្សិតយ៉ាងច្រើនកុះករ។

លោក ង៉ូវ សេងកាក់ មានប្រសាសន៍ថា តាមរយៈនយោបាយឈ្នះ​របស់សម្តេចតេជោ បានធ្វើឱ្យកម្ពុជាមានសន្តិភាព សុវត្ថិ​ភាព និងស្ថិរភាព នយោបាយពេញលេញ និងកិច្ចសហប្រតិបត្តិការជា​យុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន បាន​ធ្វើឱ្យខេត្ត​សៀមរាបមានលទ្ធភាពបង្កើតចំណងមេត្រីភាពជាមួយខេត្តក្រុងនៅប្រទេសចិនបានចំនួន ៣០។ចំណង​មេត្រី​ភាពនេះរួមចំណែកយ៉ាង​សំខាន់ដល់ការអភិវឌ្ឍខេត្តសៀមរាប។ តាមរយៈសមិទ្ធផលមួយ​ចំនួន​គួរឱ្យកត់សម្គាល់លើវិស័យ​ទេសចរណ៍ អប់រំ កសិកម្ម ពាណិជ្ជកម្ម សុខាភិបាល វប្បធម៌ និងវិនិយោគ ជាពិសេសអាកាសយានដ្ឋានអន្តរ​ជាតិសៀមរាប​អង្គរ សម្រាប់បម្រើឱ្យវិស័យទេសចរណ៍ដ៏មាន​សក្តា​នុពល និងជាខឿនសេដ្ឋកិច្ចដ៏សំខាន់ ។

លោកបានបង្ហាញតួលេខថា រយៈពេល១១ខែ ឆ្នាំ២០២៤ ខេត្តសៀម​រាបទទួលបានទេសចរប្រមាណ ២,៩លាននាក់ ក្នុងនោះ​មានជនជាតិ​ចិន ៧១,២ម៉ឺននាក់។លោកបន្តថា ពិព័រណ៍ទេសចរណ៍កម្ពុជា- ចិន នាពេលនេះ​ពិតជាមាន​សារៈសំខាន់​​ក្នុងជំរុញកិច្ចសហប្រតិបត្តិការ​ទ្វេភាគីរវាងកម្ពុជា-ចិន ក្លាយជាយន្តការ និងសក្ខីភាពសម្រាប់ប្រតិភូ​មកពី​ខេត្តក្រុង​សម្ព័ន្ធមេត្រីទាំងអស់ ឆ្លុះបញ្ចាំងពីសន្តិភាព សុវត្ថិភាព និងបដិសណ្ឋារកិច្ចល្អ ទើបខេត្តសៀមរាបទទួលបាន​ទេសចរយ៉ាងច្រើន ជាពិសេសជនជាតិចិន។

ក្នុងព្រឹត្តិការណ៍នេះដែរ ឯកឧត្តម វ៉ាង វីនពីន ឯកអគ្គរដ្ឋទូតចិនប្រចាំ​កម្ពុជាបានលើកឡើងថា ចិន និងកម្ពុជាជា​ប្រទេសជិត​ខាង និង​មានទំនាក់ទំនងជាប្រវត្តិសាស្ត្រដ៏យូរលង់មកហើយ ត្រូវបានពង្រីក និងពង្រឹងរហូតមកដល់បច្ចុប្បន្ន។ ឯកឧត្តម​បានកោតសរសើរ និងអរគុណសម្តេចតេជោ ហ៊ុន សែន អតីតនាយករដ្ឋមន្ត្រី និងជា​ប្រធានព្រឹទ្ធសភា ដែលបានអញ្ជើញ​ទៅទស្សនកិច្ចនៅ​សាធារណរដ្ឋ​ប្រជាមានិតចិន កាលពីឆ្នាំ២០២ ក្នុងអំឡុងកូវីដ១៩ កំពុងផ្ទុះឡើង ដែលគ្មានប្រទេស​ណាទាំងអស់បានទៅទីនោះ។ការនេះពិតជា​សរបញ្ជាក់ឱ្យឃើញកាន់តែច្បាស់ពីទឹកចិត្តជាមិត្តដ៏ពិតប្រាកដគ្រប់កាលៈទេសៈ​ និងឥតងារករេ។ ក្នុងខែធ្នូនេះ សម្តេចតេជោក៏បានអញ្ជើញ​ទៅទស្សនកិច្ចផ្លូវការនៅក្នុងប្រទេសចិន ដើម្បីពង្រឹងចំណង​មិត្តភាព​ដែកថែប និងកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រុងជ្រោយ ជាពិសេសកិច្ចសហប្រតិបត្តិការ​ត្បូងពេជ្រដែលមានកំណើត​តាំងពីឆ្នាំ​២០២៣មក។

ឯកឧត្តមរដ្ឋមន្រ្តីក្រសួងទេសចរណ៍ ហួត ហាក់ បានថ្លែងថា «ពិព័រណ៍​ទេសចរណ៍កម្ពុជា-ចិន» ជាព្រឹត្តិការណ៍ដ៏អស្ចារ្យ​មួយក្នុងចំណោម​ព្រឹត្តិការណ៍សំខាន់ៗ ដែលស្ថិតក្នុងក្របខ័ណ្ឌនៃកិច្ចសហការកម្ពុជា-ចិន ដើម្បីអបអរសាទរការប្រារព្ធ «ឆ្នាំនៃការផ្លាស់ប្តូរប្រជាជននិង​ប្រជាជន កម្ពុជា-ចិន ២០២៤» ។គិតមកដល់ដើមខែធ្នូនេះ ក្រសួងទេស​ចរណ៍ក្នុងនាមជា​ស្ថាប័នដឹកនាំអនុវត្តយុទ្ធនាការ “ឆ្នាំនៃ​ការផ្លាស់ប្ដូរប្រជាជន និងប្រជាជន កម្ពុជា-ចិន” បានសហការ​ជាមួយស្ថាន​ទូតចិន​ប្រចាំកម្ពុជា និងបណ្តារដ្ឋបាល ប្រជាជននៃខេត្ត និងក្រុងនានានៃប្រទេសចិន រួមជាមួយដៃគូពាក់ព័ន្ធ រៀបចំព្រឹត្តិការណ៍​សំខាន់ៗ​ជាច្រើន រួមមាន ការសម្តែងក្បាច់គុនសៅលីញ និងល្បុក្កតោរួមគ្នា និងពិព័រណ៍វប្បធម៌ទេសចរណ៍កម្ពុជា-ចិន នៅមុខប្រសាទបាយ័ន “When Shaolin Meets Bokator at Angkor”, “វេទិកាទេសចរណ៍ កម្ពុជា-ចិន”, “មហោស្រព​ម្ហូបអាហារ កម្ពុជា-ចិន” រួមជាមួយការទទួលដំណើរទស្សនកិច្ចសិក្សា​គោលដៅ​ទេសចរណ៍ (FAM Trip) និងកម្មវិធី​ផ្សព្វផ្សាយ​គោលដៅទេសចរណ៍ (China Tourism Roadshow to Siem Reap) សម្រាប់បណ្តាញ​សារព័ត៌មានចិន និងអ្នកមានឥទ្ធិពលលើបណ្តាញសង្គមចិន (Social Influencers) និងព្រឹត្តការណ៍ជាមួយចំនួនទៀត។

ឯកឧត្តម ហួត ហាក់ បន្តថាសម្តេចធិបតីនាយករដ្ឋមន្ត្រី បានអនុញ្ញាត​ឱ្យក្រសួងទេសចរណ៍ រៀបចំពិធីបិទ «ឆ្នាំនៃការ​ផ្លាស់ប្តូរប្រជាជន​និង​ប្រជាជន កម្ពុជា-ចិន ២០២៤» នាដើមឆ្នាំ២០២៥ នៅខេត្តហឺណាន ប្រទេសចិន ។ទន្ទឹមនឹងនេះ សម្តេចធិបតីនាយករដ្ឋមន្ត្រី ក៏បានផ្តល់​គោល​ការណ៍ឯកភាពបឋម ក្នុងការកំណត់យកឆ្នាំ “២០២៥ ជាឆ្នាំទេសចរណ៍ កម្ពុជា-ចិន” ដើម្បីបន្តជំរុញកិច្ចិសហប្រតិបត្តិការ និងលំហូរទេសចរណ៍ប្រទេសទាំងពីរ ។ពិព័រណ៍ទេសចរណ៍កម្ពុជា-ចិន បានលើកកម្ពស់កិច្ចសហប្រតិបត្តិការលើវិស័យទេសចរណ៍ វប្បធម៌ អរិយធម៌ និងប្រពៃណីរវាងប្រទេសទាំងពីរ ជាពិសេស​ការបង្ហាញ​ពីសក្តានុពលទេសចរណ៍ដ៏សម្បូរបែប ការពង្រឹងទំនាក់ទំនង​ពាណិជ្ជកម្ម និងការតភ្ជាប់ប្រតិបត្តិករ​ទេសចរណ៍​កម្ពុជា និងចិន ឱ្យកាន់តែទូលំទូលាយ ពិសេសការភ្ជាប់ទំនាក់ទំនង (Business Networking) រវាងវិស័យឯកជនក្នុង​វិស័យទេស​ចរណ៍នៃ​ប្រទេសទាំងពីរ។

ឯកឧត្តមបញ្ជាក់ថា ក្រសួងទេសចរណ៍កម្ពុជា និងក្រុមហ៊ុន China Tourism Group Corporation Limited (CTG) បានចុះ​អនុស្សរណៈនៃការយោគយល់គ្នា (MoU) ស្តីពី កិច្ចសហ​ប្រតិបត្តិការទេសចរណ៍ និងការរៀបចំកញ្ចប់ទស្សន កិច្ច ទេសចរណ៍រវាងក្រសួងទេសចរណ៍កម្ពុជា ដែលនឹងរួមចំណែក​ជំរុញលំហូរភ្ញៀវទេសចរឱ្យកាន់តែច្រើនបន្ថែម ទៀតរវាង កម្ពុជា-ចិន ។

ឯកឧត្តមរដ្ឋមន្រ្តីថ្លែងអំណរគុណដល់ ឯកឧត្តម វ៉ាង វិនពីន ដែលបានផ្តួចផ្តើមឱ្យមានយន្តការត្រី​ភាគីរវាង​ក្រសួង​ទេសចរណ៍កម្ពុជា ស្ថានទូតចិនប្រចាំកម្ពុជា និងក្រុមហ៊ុន CTG នាពេលនេះ។ ទៅថ្ងៃអនាគតយន្តការនេះ អាចនឹងមានការ​ចូលរួមពីក្រុមហ៊ុន​អាកាសចរណ៍ និងក្រុមហ៊ុនដែលមានសក្តានុពលផ្សេងទៀត។
ឯកឧត្តមបញ្ជាក់នូវសារថា ” ម្នាក់ៗ ជាអ្នកផ្សព្វផ្សាយទេស​ចរណ៍កម្ពុជា-ចិន ម្នាក់! ,ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍! “៕
ដោយ៖ ប៊ុន រដ្ឋា