(ភ្នំពេញ)៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានបញ្ជាក់ថា បច្ចុប្បន្ន ខេត្តព្រះសីហនុកំពុងដើរលើផ្លូវត្រូវ ប៉ុន្តែនៅតែរងការវាយប្រហារពីជនអគតិមួយចំនួនដែលមានចេតនាអាក្រក់ធ្វើឱ្យប៉ះពាល់ដល់កិត្តិយសខេត្ត ក៏ដូចជារាជរដ្ឋាភិបាល។ ដូច្នេះ ឯកឧត្តម បានណែនាំក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុត្រូវរួមគ្នាទប់ស្កាត់ការបង្កហេតុ ឬការញុះញង់ណាមួយទាក់ទិននឹងផ្នែកនយោបាយ ពីព្រោះនេះគឺជាឧបសគ្គនាំឱ្យរាំងស្ទះដល់ដំណើរការអភិវឌ្ឍន៍ជាតិ។

នេះជាប្រសាសន៍លើកឡើងរបស់ ឯកឧត្តមឧបនាយករដ្ឋមន្ត្រី សាយ សំអាល់ ថ្លែងក្នុងកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅអនុវត្តបន្ត របស់ក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ ដែលបានធ្វើឡើងនាថ្ងៃទី៧ ខែធ្នូ ឆ្នាំ២០២៤ ។

ឯកឧត្តមឧបនាយករដ្ឋមន្ត្រី សាយ សំអាល់ បានបន្តថា បច្ចុប្បន្នកម្ពុជាកំពុងទទួលបាននូវមរតកសុខសន្តិភាពពីសម្តេចតេជោ ហ៊ុន សែន ដូច្នេះយើងត្រូវបន្តរួមគ្នាថែរក្សាសុខសន្តិភាពនេះឱ្យបានគង់វង្ស បង្កើតបរិយាកាសគ្មានវិវាទ តាមរយៈការចុះបញ្ជីដីធ្លីបង្ហើយឱ្យបានចប់សព្វគ្រប់ និងរួមគ្នារៀបចំប្រទេសជាតិឱ្យបានល្អប្រសើរបន្ថែមទៀត សំរាប់ប្រជាពលរដ្ឋងាយស្រួលរស់នៅ មានទ្រនំសុភមង្គល មានការងារធ្វើ មានប្រាក់ចំណូលសមរម្យ មានម្ហូបអាហារហូបចុកគ្រប់គ្រាន់ ទទួលបានការសិក្សាអប់រំគ្រប់ៗគ្នា និងរស់នៅប្រកបដោយភាពសុខដុមរមនា ។

សូមបញ្ជាក់ថា ការបង្កើតក្រុមការងាររាជរដ្ឋាភិបាលចុះមូលដ្ឋាននេះ គឺក្នុងគោលបំណងដើម្បីផ្សព្វផ្សាយបញ្ជ្រាបការយល់ដឹងអំពីគោលនយោបាយ និងសមិទ្ធិផលផ្សេងៗរបស់រាជរដ្ឋាភិបាល ជាពិសេសផ្សារភ្ជាប់ទំនាក់ទំនងរវាងប្រជាពលរដ្ឋជាមួយរាជរដ្ឋាភិបាល តាមរយៈការរៀបចំវេទិកាសាធារណៈ និងសកម្មភាពរបស់ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ក្នុងការជួបប្រាស្រ័យទាក់ទងជាមួយប្រជាពលរដ្ឋ ដើម្បីស្វែងយល់ពីជីវភាពរស់នៅ និងស្ដាប់ពីសំណើរ សំណូមពរ និងបញ្ហាប្រឈមនានាក្នុងមូលដ្ឋាន ដើម្បីដោះស្រាយ និងកំណត់ទិសដៅ ដាក់ចេញនូវវិធានការឆ្លើយតបស្របតាមតម្រូវការរបស់ប្រជាពលរដ្ឋឱ្យបានឆាប់រហ័ស ប្រកបដោយសុក្រឹត្យ ប្រសិទ្ធភាព តម្លាភាព គណនេយ្យភាព បរិយាបន្ន សមធម៌ និងការជឿទុកចិត្តពីប្រជាពលរដ្ឋ ៕

ដោយ / គ្រី សម្បត្តិ