(ភ្នំពេញ)៖ ឯកឧត្តមបណ្ឌិត ចាយ បូរិន ប្រធានផ្នែកឃោសនាអប់រំ នៃយុវជនគណបក្សថ្នាក់កណ្តាល បានចាត់ លោក ទួន យ៉ាត អនុប្រធានផ្នែកឃោសនាអប់រំ ជាតំណាង ដឹកនាំប្រតិភូសួរសុខទុក្ខ និងនាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តមរស់ រ៉េន ទីប្រឹក្សារាជរដ្ឋាភិបាល ដល់គេហដ្ឋាន ស្ថិតនៅសង្កាត់ច្រាំង ចំរេះទី១ ខណ្ឌឬស្សីកែវ រាជធានីភ្នំពេញ ថ្ងៃទី៨ខែធ្នូ ឆ្នាំ២០២៤។

លោក ទួន យ៉ាត មានប្រសាសន៍ពាំនាំនូវការផ្តាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចធិបតីហ៊ុន ម៉ាណែត និងលោកជំទាវបណ្ឌិតពេជ ចន្ទមុន្នីហ៊ុនម៉ាណែត ព្រមទាំងឯកឧត្តមបណ្ឌិត ចាយ បូរិន ជូនដល់ឯកឧត្តម រស់ រ៉េន និងក្រុមគ្រួសារ ។

ឯកឧត្តម រស់ រ៉េន បង្ហាញក្តីរំភើបរីករាយឥតឧបមា និងពិតជាមានការពេញចិត្តយ៉ាងខ្លាំងចំពោះសកម្មភាពចុះសួរសុខទុក្ខរបស់ក្រុមការងារយុវជនគណបក្សថ្នាក់កណ្ដាល ក្រោមការដឹកនាំដ៏ខ្ពង់ខ្ពស់របស់សម្តេចធិបតីហ៊ុន ម៉ាណែត ដែលបានដឹកនាំតាមប្រពៃណីដ៏ល្អផូរផង់បន្តពីសម្តេចតេជោ ហ៊ុន សែន គឺការយកចិត្តទុកដាក់ពីសុខទុក្ខ ជីវភាពរស់នៅ ផ្តល់ភាពកក់ក្តៅ និងក្តីសង្ឃឹមដល់ចាស់ព្រឹទ្ធាចារ្យ ទាំងអស់ដែលមានគុណបំណាច់ចំពោះគណបក្ស និងប្រទេសជាតិ។

ឯកឧត្តមបានរម្លឹកពីប្រវត្តិការងារ និងអនុស្សាវរីយ៍ជាច្រើន ក្រោយថ្ងៃរំដោះ ៧ មករា ឆ្នាំ១៩៧៩ បានចូលបំរើការងារជាអនុប្រធានមន្ទីរក្រសួងឃោសនាការ ព័ត៌មាននិងវប្បធម៌ ប្រធាននាយកដ្ឋាន វប្បធម៌មហាជននិងបោះពុម្ភផ្សាយ ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ទទួលបន្ទុកការងារវប្បធម៌ អនុរដ្ឋលេខាធិការក្រសួងទេសចរណ៍ចំនួន២អាណត្តិ រដ្ឋលេខាធិការក្រសួងទេសចរណ៍ចំនួន២អាណត្តិ បច្ចុប្បន្នជាទីប្រឹក្សារាជរដ្ឋាភិបាល ហើយក៏បានផ្តល់ទស្សនទានមួយចំនួន ដល់គណៈប្រតិភូ គាំទ្រជានិច្ចនិងចូលរួមថែរក្សាសន្តិភាពជាមួយរាជរដ្ឋាភិបាល ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ជាអ្នកបន្តវេនពោពេញដោយសមត្ថភាព និងគុណធម៌ ដើម្បីបន្តដឹកនាំប្រទេសជាតិ។

លោកទួន យ៉ាត និងក្រុមការងារក៏បានក៏បានប្រគល់ជូននូវអំណោយដ៏ថ្លៃថ្លារបស់សម្តេចធិបតីហ៊ុន ម៉ាណែត និងលោកជំទាវបណ្ឌិតពេជ ចន្ទមុន្នី ហ៊ុនម៉ាណែតជូនដល់ ឯកឧត្តមរស់ រ៉េន និង សូមបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធក្នុងលោក សូមតាមជួយបីបាច់រក្សាឯកឧត្តមមានសុខភាពល្អ កម្លាំងមាំមួន និងមានជន្មាយុយឺនយូរ៕

ដោយ ៖ ហេង សម្បត្តិ