“ព្រឹត្តិការណ៍ពិព័រណ៍ពាណិជ្ជកម្មកម្ពុជាឆ្នាំ២០២៤”​ ក្រោមមូលបទ៖ “យុគសម័យថ្មីនៃពាណិជ្ជកម្ម”(Trade Renaissance) នឹងប្រារព្ធ​រយៈពេល​បួនថ្ងៃចាប់ពីថ្ងៃទី១៣ ដល់ថ្ងៃទី១៦ ខែធ្នូ ឆ្នាំ​២០២៤ នៅសាលសន្និបាត ភីអេច ហ្គ្រេន​ហល បុរីប៉េងហួត បឹងស្នោ រាជធានី​ភ្នំពេញ។សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះ​រាជា​ណា​ចក្រកម្ពុជា នឹងផ្ដល់កិត្តិយសអញ្ជើញចូលរួមជាអធិបតី​ដ៏ខ្ពង់ខ្ពស់ ក្នុងពិធីបើកសម្ពោធជាផ្លូវការនៅព្រឹកថ្ងៃទី១៣ ខែធ្នូ ។សូមជម្រាបថា ព្រឹត្តិការណ៍”ពិព័រណ៍ពាណិជ្ជកម្មកម្ពុជា” គឺជាការប្តូរ​ឈ្មោះពី”ពិព័រណ៍ផលិតផលខ្មែរ និងទំនិញ​នាំចេញ-នាំចូល”ដែល​ក្រសួងពាណិជ្ជកម្មបាន​ប្រារព្ធចាំចាប់តាំងពីឆ្នាំ២០០៦ មក។

ខណៈជំរុញវឌ្ឍនភាពការងាររៀបចំពិព័រណ៍ដ៏ធំនេះកាលពីថ្ងៃទី១០ ខែធ្នូនៅទីស្តីការក្រសួងពាណិជ្ជកម្ម ឯកឧត្តម សំហេង បូរ៉ា រដ្ឋលេខា​ធិការក្រសួងពាណិជ្ជកម្មបានអញ្ជើញដឹកនាំកិច្ចប្រជុំផ្សព្វផ្សាយអំពីនីតិវិធីក្នុងការ​ចូលរួម«ពិព័រណ៍ពាណិជ្ជ​កម្មកម្ពុជា»(CTE)។ក្នុងកិច្ចប្រជុំផ្សព្វ​ផ្សាយបានបង្ហាញពីកាលវិភាគ បញ្ញត្តិ និងបទបញ្ជាផ្ទៃក្នុងនៃការចូលរួម «ពិព័រណ៍​ពាណិជ្ជ​​កម្មកម្ពុជា»(CTE) និងមានការលើកឡើងជា​សំណួរ​ផ្សេងៗពីបងប្អូនពាណិជ្ជករ/អាជីវករ អំពីការរៀបចំស្តង់ ការផ្សព្វផ្សាយ ការលក់ និងការស្វែងរកដៃគូអាជីវកម្មក្នុងអំឡុងពេលពិព័រណ៍។

ក្រសួងពាណិជ្ជកម្មបានបរិយាយថា ពិព័រណ៍ពាណិជ្ជកម្មកម្ពុជា​២០២៤ក្រោមមូលបទ”យុគសម័យនៃពាណិជ្ជកម្ម” គឺ​ដើម្បីលើកកម្ពស់សកម្មភាពពាណិជ្ជកម្មនិង វិនិយោគ ផ្សារភ្ជាប់ទំនាក់ទំនងពាណិជ្ជកម្មអន្តរជាតិ។ កម្មវិធីនេះនឹងមាន​រៀបចំស្តង់តាំងបង្ហាញផលិតផល និងសេវាកម្មជាច្រើនប្រភេទ រួមមាន៖ ផលិតផលសក្តានុពលកម្ពុជា ផលិតផលសម្គាល់​ភូមិសាស្ត្រទំនិញ ផលិតផលឧស្សាហកម្ម សេវាកម្ម ធនាគារ និងវិនិយោគ ព្រមទាំងមានកម្មវិធីអមសំខាន់ៗដូចជា វេទិកា​ពាណិជ្ជកម្មឌីជីថល វេទិកាធុរកិច្ចនិង វិនិយោគកម្ពុជា-សាធារណរដ្ឋកូរ៉េ ជំនួបពាណិជ្ជកម្ម សិក្ខាសាលាស្តីពីការជំរុញ​ការនាំចេញ និងការប្រគំតន្ត្រី។ព្រឹត្តិការណ៍នេះនឹងចាប់ផ្តើមពីម៉ោង ១០ព្រឹក ដល់ម៉ោង ៨ យប់ជារៀងរាល់ថ្ងៃ ដោយផ្តល់​ពេលវេលា​គ្រប់គ្រាន់សម្រាប់អ្នកទស្សនា និងអ្នកតាំងពិព័រណ៍​ដើម្បីទទួលបាន​ការផ្តល់ជូនដ៏សម្បូរបែប។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យ​ក្រសួង​ពាណិជ្ជកម្ម ក្នុងកម្មវិធីជំនួប​ជាមួយ​អ្នកសារព័ត៌មាន ស្ដីពីការរៀបចំ «ពិព័រណ៍ពាណិជ្ជកម្មកម្ពុជា (CTE)»កាលពីថ្ងៃទី៩ ខែធ្នូ នៅទីស្ដីការក្រសួងបានបញ្ជាក់ថា ​ព្រឹត្តិការណ៍​ពិព័រណ៍នេះ នឹងផ្តល់ឱកាសក្នុងការដាក់តាំងបង្ហាញផលិតផលសក្តានុពលជាច្រើនមុខរបស់កម្ពុជា ក៏ដូចជាបង្ហាញពីរបត់​នៃការធ្វើពាណិជ្ជកម្មក្នុងយុគ​សម័យថ្មីតាមប្រព័ន្ធឌីជីថល ដែលជាឱកាសច្បាមយកការពង្រីក​ទីផ្សារបន្ថែម ស្របតាម​យុទ្ធសាស្រ្ត​របស់រាជរដ្ឋាភិបាល និងក្រសួង​ពាណិជ្ជកម្ម ក្នុងការពង្រឹងទីផ្សារចាស់ និងពង្រីកទីផ្សារថ្មី។

ព្រឹត្តិការណ៍ពិព័រណ៍នេះនឹងមានការតាំងបង្ហាញនូវផលិតផលចម្រុះ ដែលជាផលិតផលសក្តានុពលរបស់កម្ពុជា ទំនិញ​នាំចេញ-នាំចូល ដែលមានគុណភាពខ្ពស់ និងសេវាកម្មដែលមានលក្ខណៈពិសេស របស់បណ្តាអ្នកផ្គត់ផ្គង់កម្ពុជា និង​បរទេស។ ក្រៅពីមានការតាំងបង្ហាញ​ផលិតផល និងសេវាកម្មដ៏សម្បូរបែប ពិព័រណ៍នេះ ក៏ជាវេទិកាសម្រាប់​ពង្រឹង​ទំនាក់​ទំនងពាណិជ្ជកម្មរវាងកម្ពុជាជាមួយទីផ្សារអន្តរជាតិ​ផងដែរ។

ឯកឧត្តមអ្នកនាំពាក្យ បន្តថា ពិព័រណ៍ពាណិជ្ជកម្មកម្ពុជា (CTE) ធ្វើឡើងក្នុងគោលបំណងដើម្បីជំរុញសកម្មភាព​ពាណិជ្ជ​កម្មកម្ពុជា និងធ្វើឱ្យកាន់តែប្រសើរឡើង នូវបរិយាកាស និងឱកាសធុរកិច្ច និងវិនិយោគ ព្រមទាំងជំរុញសកម្មភាព​ការនាំ​ចេញ-នាំចូល និងការផ្សារ​ភ្ជាប់ទំនាក់ទំនងពាណិជ្ជកម្ម និងការសាងបណ្តាញរវាងអ្នក​តាំងពិ​ព័រណ៍​ក្នុងស្រុក និងអន្តរជាតិអ្នក​ទស្សនាពិព័រណ៍ និងអ្នកចូលរួម​ពិព័រណ៍។

អ្នកនាំពាក្យដដែលបញ្ជាក់ថា ក្រៅពីដាក់តាំងបង្ហាញផលិត​ផលសក្តានុពលរបស់កម្ពុជា ទំនិញនាំចេញ-នាំចូលដែល​មានគុណភាពខ្ពស់ ក៏នឹងមានរៀបចំកម្មវិធីអមនានា រួមមាន៖ ថ្ងៃទី១-វេទិកាពាណិជ្ជកម្មឌីជីថលលើកទី១ និងពិព័រណ៍​អនឡាញ, ថ្ងៃទី២-វេទិកាពាណិជ្ជកម្ម និងការវិនិយោគកម្ពុជា-កូរ៉េ, ថ្ងៃទី៣-កម្មវិធីជំនួបពាណិជ្ជកម្មស្តីពីការអភិវឌ្ឍ​ទីផ្សារផលិតផល​សក្តានុពល​កម្ពុជា, ថ្ងៃទី៤-វេទិកាស្តីពីការនាំចេញរបស់កម្ពុជា និងការប្រគំ​តន្ត្រីខា្នតតូច​នៅខាងមុខសាល​រៀបចំពិព័រណ៍ជារៀងរាល់ថ្ងៃ ចាប់ពីម៉ោង៦៖០០ល្ងាច ដល់ម៉ោង៨៖០០យប់ ដើម្បីបង្កើនភាព​ទាក់ទាញនិងផ្សព្វផ្សាយ​ពីសិល្បៈវប្បធម៌ ដែលមានការសម្តែង​បែបប្រពៃណី ការសម្តែងបែប Acoustic និងការប្រគំតន្ត្រី​សម័យជាដើម។

ពិព័រណ៍នេះគ្រោងនឹងរៀបចំស្តង់ពិព័រណ៍ចំនួន ២៤៦ស្តង់ សម្រាប់ពាណិជ្ជករក្នុងស្រុក និងក្រៅប្រទេស។ អំឡុង​ពេល​បួនថ្ងៃ នៃការតាំងពិព័រណ៍ និងកម្មវិធីអមនានា ក្រសួងពាណិជ្ជកម្មរំពឹងថា នឹងទទួលបានអ្នកចូលរួមទស្សនាប្រមាណ ៥០,០០០នាក់ រួមមាន មន្ត្រីជាន់ខ្ពស់នៃរាជរដ្ឋាភិបាល ដៃគូអភិវឌ្ឍន៍ អ្នកទស្សនាជាតិ និងអន្តរជាតិ សាធារណជនទូទៅ​ជាពិសេសអ្នកទិញ និងអ្នកចែកចាយមកពីបណ្តាប្រទេសនានា។

សូមរំលឹកថា ពិព័រណ៍នេះ គឺជាព្រឹត្តិការណ៍ពិព័ណ៍ពាណិជ្ជកម្មកម្រិត​អន្តរជាតិប្រចាំឆ្នាំ របស់ក្រសួងពាណិជ្ជកម្ម ដើម​ឡើយមានឈ្មោះថា «ពិព័រណ៍ផលិតផលខ្មែរ និងទំនិញនាំចេញ-នាំចូល» និងបានរៀប​ចំធ្វើរៀងរាលពាក់កណ្ដាលខែធ្នូ​ចាប់តាំង​ពីឆ្នាំ២០០៦មក។ការផ្លាស់ប្តូរឈ្មោះពិព័រណ៍ CTE ក្នុងគោលបំណងធ្វើឱ្យពិព័រណ៍នេះ កាន់តែមានភាពសាមញ្ញ​ងាយ​ស្រួលចងចាំ។ ឆ្លុះបញ្ចាំងពីគោល​គំនិតឧត្ដមភាព និងប្រកបដោយភាពទាក់ទាញ ក្នុងទីផ្សារសម័យថ្មី​ដែល​មានភាពរស់រវ៉ើក និងការយកចិត្តទុកដាក់ទៅលើគុណភាព និងភាពច្នៃប្រឌិតខ្ពស់៕

ដោយ៖មុនី