(ភ្នំពេញ)៖ ឯកឧត្តម ប៉ាន សូរស័ក្តិ ប្រធានសហព័ន្ធកីឡាទោចក្រយានកម្ពុជាបានដឹកនាំកិច្ចប្រជុំគណៈកម្មាធិការប្រតិបត្តិរបស់ខ្លួន ដើម្បីពិភាក្សាលើផែនការយុទ្ធសាស្រ្តសំខាន់ៗចំនួន៣ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី១០ ខែធ្នូ ឆ្នាំ២០២៤។

លោក នូ ចំរើន អគ្គលេខាធិការ សហព័ន្ធកីឡាទោចក្រយានកម្ពុជាគូសបញ្ជាក់ថា របៀបវារៈសំខាន់ៗចំនួន៣នេះ គឺទី១.សហព័ន្ធបានពិភាក្សាគ្នាលើការត្រៀមលក្ខណៈរៀបចំការប្រកួតកីឡាទោចក្រយាន ជ្រើសរើសជើងឯកថ្នាក់ជាតិ ប្រចាំឆ្នាំ២០២៤ នៅខេត្តកំពត ដែលគ្រោងនឹងធ្វើឡើង នាថ្ងៃ២៤-២៦ ខែមករា ឆ្នាំ២០២៥។ ទី២.មានកិច្ចពិភាក្សាគ្នាលើផែនការយុទ្ធសាស្ត្រត្រៀមចូលរួមប្រកួតកីឡាស៊ីហ្គេម លើកទី៣៣ នៅប្រទេសថៃ នាឆ្នាំ២០២៥ខាងមុខ រួមទាំងការប្រមូលផ្តុំហ្វឹកហាត់របស់កីឡាករ កីឡាការិនីជម្រើសជាតិកម្ពុជា នៅខេត្តកំពត ត្រៀមស៊ីហ្គេម ២០២៥។ កិច្ចពិភ្សាទី៣ គឺផ្តោតលើយុទ្ធសាស្ត្រត្រៀមឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី លើកទី៥ នាឆ្នាំ២០២៩ ខាងមុខ នៅកម្ពុជា ហើយក្នុងនោះសហព័ន្ធជ្រើសរើសយកខេត្តកំពតត្រៀមរៀបចំទទួលធ្វើម្ចាស់ផ្ទះ ការប្រកួតកីឡាយុវជនអាស៊ី លើកទី៥ នាឆ្នាំ២០២៩ ផងដែរ។

លោក នូ ចំរើន បានលើកឡើងទៀតថា សម្រាប់ផែនការចំពោះមុខ ការប្រកួតជើងឯកថ្នាក់ជាតិ នាដើមឆ្នាំ២០២៥ឆាប់ៗនេះ គឺមានការប្រកួតកង់គួក និងកង់ភ្នំ ដែលជារៀងរាល់ឆ្នាំមានកីឡាករ កីឡាការិនីចូលរួមប្រកួតប្រមាណ ២០០ទៅ ៣០០នាក់។

លោកអគ្គលេខាធិការបញ្ជាក់ថា សម្រាប់ការប្រកួតនៅថ្ងៃទីមួយ នៅថ្ងៃទី២៥ ខែមករា ឆ្នាំ២០២៥ គឺពេលព្រឹកនឹងប្រកួតកង់គួក ដែលគ្រោងនឹងចេញដំណើរពីខាងមុខសាលាខេត្តកំពតទៅបញ្ចប់ទី នៅលើភ្នំបូកគោ។ នៅពេលរសៀលនឹងត្រូវប្រកួតកង់ភ្នំ នៅស្រុកឈូក ខេត្តកំពត។ ចំពោះថ្ងៃទីពីរ នៅថ្ងៃទី២៦ ខែមករា ឆ្នាំ២០២៥ សម្រាប់បុរស គឺកីឡាករទាំងអស់អាចចូលរួមប្រកួត ដោយចាប់ពីអាយុ១៦ឆ្នាំឡើង ដោយកន្លែងចេញដំណើរ និងដល់ទី នៅមុខសាលាខេត្តកំពត ដោយត្រូវជិះកង់ ៣០ជុំ ស្មើនឹង ៣០គីឡូម៉ែត្រ។

លោកអគ្គលេខាធិការបន្ថែមថា ការប្រកួតកីឡាទោចក្រយាន ជើងឯកថ្នាក់ជាតិ ជារៀងរាល់ឆ្នាំតែងតែមាន៣០ទៅ៤០ក្រុម ដែលមានកីឡាករ កីឡាការិនីប្រមាណ ២០០ទៅ ៣០០នាក់ ហើយក៏មានក្រុមគាំទ្រ គណៈកម្មការបច្ចេកទេសរបស់សហព័ន្ធ និងក្រុមការងាររបស់ខេត្ត ដែលមានចំនួនសរុបប្រមាណ ៥០០នាក់ ។

ក្នុងនាមតំណាងសហព័ន្ធ លោកអគ្គលេខាធិការក៏បានអំពាវនាវដល់បណ្តាក្រុមហ៊ុន ឬសប្បុរសជននានា ដែលមានបំណងចង់ចូលរួមឧបត្ថម្ភគាំទ្រដល់ដំណើការរៀបចំការប្រកួតជើងឯកថ្នាក់ជាតិដ៏ធំប្រចាំឆ្នាំ២០២៤ សូមមេត្តាទំនាក់ទំនងមកកាន់សហព័ន្ធ ដើម្បីចូលរួមជំរុញដល់ដំណើរការអភិវឌ្ឍវិស័យកីឡាទោចក្រយានកម្ពុជាឱ្យមានដំណើរការដោយរលូន និងជោគជ័យ ៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ