(ភ្នំពេញ)៖ សមាគមដើម្បីការអភិវឌ្ឍ និងការគាំទ្រឧស្សហកម្មច្នៃប្រតិដ្ឋ​នៃកម្ពុជា (សមាគមស៊ីកាដា) បានរៀបចំ «សន្និសីទ សារព័ត៌មាន ស្តីពី យុទ្ធនាការកៀរគរការគាំទ្រ ដល់សិល្បករ និងប្រតិបត្តិករវប្បធម៌» តាម​រយៈការណែនាំនូវ សំណៅពិគ្រោះ «នៅពីក្រោយឆាក និងវាំងនន៖ ភាព​ងាយរងគ្រោះ ការរើសអើង យេនឌ័រ និងការបៀតបៀនក្នុងវិស័យ​វប្បធម៌​និងឧស្សាហកម្ម ច្នៃប្រតិដ្ឋនៅកម្ពុជា»។

សន្និសីទសារព័ត៌មាននេះ មានចូលរួមដោយ សិល្បករ និងអ្នកធ្វើការ ក្នុងវិស័យវប្បធម៌ និងច្នៃប្រតិដ្ឋ មកពីតាមបណ្តាខេត្ត និងរាជធានី វិស័យ​រដ្ឋាភិបាល អង្គការ សមាគម សង្គមស៊ីវិល ស្ថានទូត និងស្ថាប័ន​ម្ចាស់​ជំ​នួយ ប្រមាណជា ៨០នាក់ រៀបចំឡើងនៅ ថ្ងៃទី១៣ ខែធ្នូ ឆ្នាំ២០២៤ នៅវិទ្យាស្ថានបារាំង។

លោកស្រី លឹម សូលីន សមាជិកគណៈកម្មការនាយក សមាគមសីកាដា បញ្ជាក់ថា សមាគមស៊ីកាដា បង្កើតឡើងក្នុងឆ្នាំ ២០២២ ដោយមាន គោលបំណងធ្វើជាតំណាង និងស្វែងរក ការគាំទ្រដល់ឧស្សាហកម្ម​ច្នៃប្រ​តិដ្ឋ និងវប្បធម៌ដើម្បីអភិវឌ្ឍប្រកបដោយនិរន្តរភាព និងបរិយាបន្នមួយ​ដែលធានាថាឧស្សាហកម្មច្នៃ ប្រតិដ្ឋ និងវប្បធម៌គឺជាបេះដូងនៃការ​សម្រេច​ចិត្តក្នុងគោលនយោបាយ សេដ្ឋកិច្ច និងសង្គម។ នាពេលបច្ចុប្បន្ននេះ សមាគមមាន សមាជិកចំនួន ១៣៥ នាក់ មកពីវិស័យវប្បធម៌ និងច្នៃប្រតិដ្ឋ​ចម្រុះ ។

លោកស្រី បានបន្តទៀតថា សមាគមស៊ីកាដា រំពឹងទុកថា សំណៅពិគ្រោះ (Policy Paper) នឹងបានផ្តល់ជាអនុសាសន៍មួយចំនួនដល់ក្រសួង និង មន្ទីរវប្បធម៌ និងវិចិត្រសិល្បៈ អង្គការ សមាគម សហគ្រាស និងក្រុមហ៊ុន​នានា ក្នុងវិស័យសិល្បៈ និងវប្បធម៌ បានឈ្វេងយល់អំពី ស្ថានភាព​សិល្ប​ករ និងអនុសាសន៍របស់ពួកគេ ដើម្បីទទួលបាន​អត្ថប្រយោជន៍កិច្ចគាំពារ​សង្គម ដែលផ្តល់ដោយរាជរដ្ឋាភិបាល ក៏ ដូចជាអនុសាសន៍មួយ​ចំនួន​ទាក់ទង​នឹងការអនុវត្តលើការផ្តល់តម្លៃ និងការគោរពដល់សិល្បករ និង​ប្រតិបត្តិ​ករវប្បធម៌ ដែលជា ពលរដ្ឋសកម្មក្នុងការចូលរួមថែរក្សាប្រពៃណី វប្បធម៌របស់កម្ពុជា និងជាផ្នែកចូលរួមដល់សេដ្ឋកិច្ចជាតិ។

អ្នកស្រី សូ ភីណា នាយិកា នៃសមាគមស៊ីកាដា បានមានប្រសាសន៍ថា «ជាការចាំបាច់ណាស់ក្នុងការមានការពិគ្រោះ យោបល់នានាជាប្រចាំ​ជាមួយសិល្បករ និងប្រតិបត្តិករវប្បធម៌ ដើម្បីស្ដាប់ ចងក្រង ពិភាក្សា និងកំណត់អនុសាសន៍នានាដើម្បី ឈានទៅរកការគាំទ្រដល់សិល្បករ និងប្រតិបត្តិករវប្បធម៌ ដែលនឹងបន្តជួយឱ្យពួកគាត់កាន់តែចូលរួម​អភិវឌ្ឍវិស័យដ៏សំខាន់នេះ និងទាញយកមកនូវអត្ថប្រយោជន៍កាន់តែ​ប្រសើរសម្រាប់សង្គមជាតិរបស់យើង ។

គួរបញ្ជាក់ថា ក្រោមជំនួយហិរញ្ញវត្ថុពី កម្មវិធីយូណេស្កូ Aschberg សម្រាប់សិល្បករ និងប្រតិបត្តិករវប្បធម៌ សមាគមស៊ីកាដាបាន រៀបចំសិក្ខាសាលាពិគ្រោះយោបល់ជាមួយសិល្បករ និងប្រតិបត្តិករវប្បធម៌ សិល្បៈចម្រុះចំនួន ៩៥ នាក់ (ស្រី ៥២) នៅខេត្ត បាត់ដំបង សៀមរាប កំពង់ធំ កំពង់ចាម កំពត ត្បូងឃ្មុំ និងរាជធានីភ្នំពេញ និងបានចងក្រង​សរសេរជាសំណៅពិគ្រោះមួយ (Policy Paper) ស្តីពីស្ថានភាពសិល្បករ និងប្រតិបត្តិករវប្បធម៌ ដោយផ្តោតលើប្រធានបទសំខាន់ពីរគឺ ការទទួល​បាន​កិច្ចគាំពារ សង្គម និងការយល់ឃើញទៅលើការផ្តល់​តម្លៃមកលើ​ការងារ​ជាសិល្បករ និងប្រតិបត្តិករវប្បធម៌៕

ដោយ ៖ ង៉ាន់ ទិត្យ
រូបភាព ៖ រិន រចនា