សត្វផ្សោតពណ៌ផ្កាឈូក នៅសហគមន៍នេសាទព្រែកត្នោត បានកើនឡើងដល់ ៧០ក្បាល
(ភ្នំពេញ)៖គិតមកត្រឹមចុងឆ្នាំ២០២៤នេះ វត្តមានសត្វ ផ្សោតពណ៌ផ្កាឈូក នៅសហគមន៍នេសាទព្រែកត្នោត បានកើនឡើងដល់៧០ក្បាល ជ្រូកទឹកចំនួន ១ក្បាលស្នាក់នៅអចិន្ត្រៃយ៍ និងផ្សោតក្បាលត្រឡោកជាច្រើនក្បាលទៀត ។ នេះបើតាមការឱ្យដឹងពីសំណាក់ ក្រសួងកសិកម្មរុក្ខាប្រមាញ់ និងនេសាទ។
មានទីតាំងស្ថិតនៅក្នុងសង្កាត់ព្រែកត្នោត ក្រុងបូកគោ ខេត្តកំពត សហគមន៍នេសាទព្រែកត្នោត កំពុងប្រឹងប្រែងក្នុងកិច្ចការពារធនធានធម្មជាតិ ដូចជា៖ ព្រៃកោងកាង ផ្កាថ្ម ស្មៅសមុទ្រ ពិសេសប្រភេទសត្វសមុទ្រកម្រៗ ដូចជាផ្សោតពណ៌ផ្កាឈូក ផ្សោតក្បាលត្រឡោក ជ្រូកទឹក និងសេះសមុទ្រជាដើម ដែលមានវត្តមាននៅដែនគ្របដណ្តប់របស់សហគមន៍។
លោក អ៊ុក សុវណ្ណារិទ្ធ ប្រធាន សហគមន៍នេសាទព្រែកត្នោតបានលើកឡើងថា៖សហគមន៍មួយនេះមានសក្តានុពលធនធានធម្មជាតិច្រើនដោយសារមានធនធានជលផលច្រើនដូចជា ព្រៃកោងកាង ស្មៅសមុទ្រ និងផ្កាថ្មជាដើម។សហគមន៍មួយនេះមានផ្ទៃដី ១១៦៨ហិកតា មានព្រៃកោងកាង ២០ហិកតា តំបន់អភិរក្សផ្កាថ្ម ១១៤ហិកតា និងស្មៅសមុទ្រ ៧០០ហិកតា។
លោកបានបញ្ជាក់បន្ថែមថា ស្មៅសមុទ្រមានសារៈសំខាន់ណាស់ ពីព្រោះថា វាជាទីជម្រករបស់ជីវចម្រុះ និងវាក៏ជាចំណីរបស់ត្រីផងដែរ។ក្នុងនេះដូចជាត្រីកាតាំងវាស៊ីតែស្មៅសមុទ្រ និងស៊ីស្លែ ។ហេតុនេះកាលណាមានស្មៅនេះកាន់តែច្រើនវានឹងក្លាយជាទីជម្រកអចិន្រ្តៃយ៍របស់ជីវៈចម្រុះ នឹងវាអាចទប់លំនឹងទឹកសមុទ្របានថែមទៀត។ពិសេសសត្វតូចៗវាអាចគេចពីការប្រមាញ់សត្វសមុទ្រធំៗបានផង។
លោក ស សូរិន នាយខណ្ឌរដ្ឋបាលជលផល ខេត្តកំពតបានឱ្យដឹងថា កន្លងមករដ្ឋបាលជលផលបានជំរុញដល់សហគមន៍ឱ្យដាំដើមកោងកាងឡើងវិញ។ក្រៅពីនេះប្រជាសហគមន៍ក៏ត្រូវបានបណ្តុះបណ្តាលឱ្យចេះចិញ្ចឹមត្រី ចិញ្ចឹមក្តាម ជាពិសេសការបម្រើលើសេវាអេកូទេសចរណ៍ ដែលទទួលភ្ញៀវទេសចរ គេមកលេងដោយបង្កើតមុខរបរជូនពួកគាត់។យើងធ្វើបន្តបន្ទាប់ហើយបានច្រើនណាស់។ រហូតសត្វកម្រក៏យើងអភិរក្សបាននៅខេត្តកំពតយើងនេះដែរ ក្នុងនេះដូចជាជ្រូកទឹក ផ្សោតផ្កាឈូក តែម្តង។ អញ្ចឹងហើយយើងអាចបង្កើតតំនប់ទេសចរណ៍បាន ។ យើងអាចទាញភ្ញៀវទេសចរជាតិ និងអន្តរជាតិមកមើលកម្សាន្ត។
ជាមួយគ្នានេះលោកបានអំពាវនាវដល់ពលរដ្ឋចូលរួមថែរក្សា និង អភិរកធនធាន ធម្មជាតិដោយក្នុងនេះត្រូវចូលរួមដាំកោងកាង មិនបេះបោចស្មៅសមុទ្រ ពិសេសជាងនេះបើទិញក្តាម បើឃើញមានពងច្រើនគួរទិញលែងវានោះមានន័យថាយើងក្រៅពីជួយការពារ ហើយនៅជួយអភិរក្សសត្វកម្រយើងឱ្យនៅគង់វង្សយូរអង្វែងដល់កូនចៅជំនាន់ក្រោយបន្តទៀត។
ក្រសួងកសិកម្មបានលើកឡើងដែរថា៖ការថែរក្សាធនធានធម្មជាតិ ទាំងព្រៃកោងកាង ផ្កាថ្ម ស្មៅសមុទ្រ និងប្រភេទសត្វសមុទ្រកម្រៗ ជាច្រើនប្រភេទ បានរួមចំណែកផ្ដល់ការងារនិងប្រាក់ចំណូលដល់សមាជិកសហគមន៍នេសាទនៅក្នុងតំបន់ តាមរយៈការផ្ដល់សេវាកម្មដល់ភ្ញៀវទេសចរដែលទៅកម្សាន្ត ដូចជាការជិះទូកមើលផ្សោតនិងព្រៃកោងកាង និងការផ្គត់ផ្គង់អាហារស្រស់ៗ នេសាទបានពីដែនទឹករបស់សហគមន៍ផ្ទាល់៕
ដោយ ៖ ម៉ាដេប៉ូ
