កំពង់ឆ្នាំង៖យោងតាមរបាយការណ៍បញ្ជាក់ដោយអភិបាលខេត្តកំព​ង់ឆ្នាំងបានឱ្យដឹងថា ក្នុងឆ្នាំ​២០២៤ខេត្តកំពង់ឆ្នាំង​ករណីគ្រោះថ្នាក់​ចរាចរណ៍បានកើតឡើងចំនួន៧៣ ករណី ស្មើនឹង១០៣ភាគរយ និងបណ្ដាលឱ្យមនុស្សស្លាប់ចំនួន ៥៥នាក់  ។

ក្នុងពិធីទិវាជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៩ នៅមុខសាលាខេត្តកំពង់ឆ្នាំងកាលពី​រសៀលថ្ងៃទី១៨ ខែធ្នូ ឆ្នាំ២០២៤ ក្រោមវត្តមានឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួង​មហាផ្ទៃ និងជាប្រធាន គណៈកម្មា​ធិការ​ជាតិសុវត្ថិភាពចរាចរណ៍ផ្លូវគោក ,ឯកឧត្តម ស៊ុន សុវណ្ណារិទ្ធិ អភិបាលខេត្ត​កំពង់​​ឆ្នាំងបានរាយការណ៍ថា ឆ្នាំ២០២៤​គ្រោះថ្នាក់​ចរាចរណ៍ផ្លូវគោកនៅខេត្តនេះបានកើតឡើងចំនួន៧៣ករណី ខណៈឆ្នាំ​២០២៣កើតឡើងចំនួន៣៧ ករណី ។តួលេខនេះបង្ហាញថា ចំនួនគ្រោះថ្នាក់ឆ្នាំ២០២៤បានកើនឡើងស្មើនឹង១០៣​ភាគរយ​ ។គ្រោះថ្នាក់កើតឡើងចំនួន៧៣ករណី បណ្ដាលឱ្យមនុស្សស្លាប់ចំនួន ៥៥នាក់ , រងរបួសរបួសធ្ងន់ ៥៥ នាក់, រងរបួសស្រាល១០៩នាក់  ,ខូចខាតរថយន្តសរុបចំនួន៦៨ គ្រឿង ក្នុងនោះរថយន្តធុនធ្ងន់ ២៦ គ្រឿង រថយន្តធុនស្រាល​៤១ គ្រឿងនិងទោចក្រយានយន្ត​ចំនួន៦៣គ្រឿង ។

ជុំវិញករណីគ្រោះថ្នាក់ចរាចរណ៍នេះដែរ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ និងជាប្រធាន គណៈកម្មាធិការជាតិសុវត្ថិភាពចរាចរណ៍ផ្លូវគោក​មានប្រសាសន៍ថា គ្រោះថ្នាក់ចរាចរណ៍​នៅតែកើនឡើង​និងអូសបន្លាយរយៈពេលវែង ប្រសិនបើយើងមិនមានវិធានក្នុងការទប់ស្កាត់ប្រកបដោយតម្លាភាព ប្រសិទ្ធភាព និងកង្វះការ​ចូល​រួមអនុវត្តច្បាប់ពីអ្នកប្រើប្រាស់ផ្លូវគ្រប់ៗរូប ។ 

ឯកឧត្តមអភិសន្តិបណ្ឌិតបានបន្តថា ជាមួយនឹងការកសាង​សេចក្តី​ព្រាង​ច្បាប់ស្ដីពីចរាចរណ៍ផ្លូវគោកថ្មី ដើម្បីអនុវត្ត​​ស្រប​នឹងស្ថានភាព​ជាក់ស្ដែងនៃកសាងផែនការជាតិ ទសវត្សរ៍សុវត្ថិភាពចរា​ចរណ៍ផ្លូវ​គោក២០២០-២០៣០ រាជរដ្ឋាភិបាលកម្ពុជាក៏បានសម្រេច​ដាក់ចូលក្នុងគោលនយោបាយគ្រោះថ្នាក់នេះទៅនឹងគោលនយោបាយភូមិឃុំមានសុវត្ថិភាព។

ដើម្បីកាត់បន្ថយអត្រាគ្រោះថ្នាក់ចរាចរណ៍ឯកឧត្តមឧបនាយករដ្ឋមន្រ្តីបានណែនាំឱ្យអនុវត្តជាក់ស្តែងលើការងារចំពោះមុខមួយចំនួនដែលក្នុងនោះគឺការបង្កើនវិធានការអនុវត្តច្បាប់ចរាចរណ៍ផ្លូវគោកឱ្យបានច្បាស់លាស់ ពិសេសសម្រាប់ភូមិសាស្ត្រ​ដែលមានគ្រោះថ្នាក់ច្រើន ។ប្រធានអនុគណៈកម្មាធិការខេត្ត យកចិត្តទុកដាក់តម្រង់ទិស​ក្នុងការ​អនុវត្ត និងរិត​បន្តឹងច្បាប់​ចរាចរណ៍ផ្លូវគោកឱ្យបានទៀងទាត់ និងម៉ឺងម៉ាត់បំផុត ។នៅតាមសាលារៀន គួរតែបង្កើតឱ្យមានសួនសិប្ប​និម្មិត ស្ដីពី​សុវត្ថិភាពចរាចរណ៍ ទៅតាមស្តង់ដារមួយ ដើម្បីឱ្យសិស្ស​ស្វែង​យល់​ស្តីពីការប្រើប្រាស់ដងផ្លូវ ។ការដឹកជញ្ជូនកម្មកររោង​ចក្រ ,គ្រប់គ្រងដីចំណីក៏ស្ថិតក្នុងការយកចិត្តទុកត្រួតពិនិត្យឱ្យបានម៉ឹងម៉ាត់ផងដែរ៕

ដោយ៖សុខ គឹមសៀន