(ភ្នំពេញ)៖ ព្រឹត្តិការណ៍ «សាទរកម្ពុជា» ឬ «Celebrating Cambodia» គឺជាព្រឹត្តិការណ៍ជួបជុំមហាគ្រួសារខ្មែរថ្មីមួយទៀត ដែលត្រូវបានរៀបចំដោយ សហភាពសហព័ន្ធយុវជនកម្ពុជា (ស.ស.យ.ក.)។

ព្រឹត្តិការណ៍ជួបជុំមហាគ្រួសារខ្មែរនេះនឹងធ្វើឡើងនៅបរិវេនសួនច្បារមុខព្រះបរមរាជវាមងក្នុងថ្ងៃឆ្លងឆ្នាំសកល ជាការបង្ហាញការអបអរសាទរកម្ពុជា សូមត្រៀមខ្លួនចូលរួមក្នុងព្រឹត្តិការណ៍ដ៏ធំ ចាប់ពីរសៀលថ្ងៃទី៣១ ខែធ្នូ ឆ្នាំ២០២៤នេះ។

ថ្លែងនៅក្នុងសន្និសីទសារព័ត៌មាន ស្តីពី ៖ការត្រៀមរៀបចំព្រឹត្តិការណ៍ «សាទរកម្ពុជា» ឆ្នាំ២០២៤ នាថ្ងៃទី១៩ ខេធ្នូ ឆ្នាំ២០២៤នេះ ឯកឧត្តម សុខ សប្បាយណា សមាជិកគណៈអចិន្ត្រៃយ៍គណៈកម្មាធិការកណ្តាល សហភាពសហព័ន្ធយុវជនកម្ពុជា បានគូសបញ្ជាក់ថា ព្រឹត្តិការណ៍ «សាទរកម្ពុជា» គឺជាព្រឹត្តិការណ៍ដ៏ធំមួយ ដែលសហភាពសហព័ន្ធយុវុជនកម្ពុជា មិនធ្លាប់បានរៀបចំ ទាំងទិដ្ឋភាព ទាំងគោលគំនិតផងដែរ ។

ឯកឧត្តម គូសបញ្ជាក់បន្ថែម ព្រឹត្តិការណ៍ សាទរកម្ពុជា គឺជាគំនិតផ្តូចផ្តើមដោយ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ចាប់តាំងពីឆ្នាំ២០២៧មក ជាមួយនិងការផ្តល់ឱកាសដល់ក្រុមការងារ រៀបចំបទពិសោធន៍ គោលគំនិត ក៏ដូចឆន្ទៈ និងយល់ពីបុព្វហេតុរួមនេះផងដែរ។

ឯកឧត្តម សុខ សប្បាយ គូសបញ្ចាក់ថា «ព្រឹត្តិការណ៍ សាទរកម្ពុជា គឺជារបស់យើងទាំងអស់គ្នា មិនមែនជារបស់ ស.ស.យ.ក តែម្នាក់ឯងនោះទេ»។

ឯកឧត្តម បន្ថេមថា ស.ស.យ.ក គ្រាន់តែរៀបចំជាវេទិការធ្វើជាឱកាស ទៅដល់គ្រប់កោសិកានៃសង្គម ដើម្បីអាចចូលរួម បង្ហាញអត្តសញ្ញាណខ្លួនដោយមានមោទនភាព ទាំងប្រជាជាតិ ក៏ដូចជាអន្តរជាតិផងដែរ។ ព្រឹត្តិការណ៍នេះ ក៏និងនាំមកនូវស្នាមញញឹម ការរួបរួមជាធ្លុងមួយ ប្រកបដោយមោទនាភាពជាតិ ក្រោមទង់នៃព្រះរាជាណាចក្រកម្ពុជាតែមួយ។

គួរបញ្ជាក់ថា ព្រឹត្តិការណ៍ «សាទរកម្ពុជា» បានបែងចែកចេញជាកម្មវិធីធំៗចំនួន៦ ក្នុងនោះ ៖ ទី១ មានក្បូនដង្ហែរ«សាទរកម្ពុជា»ដោយមានអ្នកចូលរួមជាង៣ពាន់នាក់ ដែលសុទ្ធសឹងជាអត្តសញ្ញាណជាតិ ទី២ កម្មវិធីដង្ហែរ និងបង្ហូតទង់ជាតិ ទី៣ ការសំដែងសិល្បៈ ពីតារាល្បីៗចំនួន៥៧នាក់ ទី៤គឺជាការតុបតែងឱ្យមានការទាក់ទាញ ទី៥គឺជាការឆ្លងឆ្នាំសកលរួមគ្នា និងទី៦ ការបាញ់កាំជ្រូចឆ្លងឆ្នាំជុំគ្នាជាដើម៕

អត្ថបទ ៖ ង៉ាន់ ទិត្យ
រូបភាព ៖ រិន រចនា