ផ្លូវក្នុងទីប្រជុំជនក្រុងបាត់ដំបង នឹងកែលម្អឡើងវិញបន្ទាប់ពីបញ្ចប់គម្រាងប្រព័ន្ធលូក្រោមដី
បាត់ដំបង៖ជាការកត់សម្គាល់ ជាច្រើនខែចុងក្រោយនេះ ផ្លូវមួយចំនួននៅទីប្រជុំជនក្រុងបាត់ដំបង មានសភាពខូចខាតដោយអន្លើៗ ។មន្រ្តីជំនាញបានទទួលស្គាល់ស្ថានភាពនេះ ហើយបានពន្យល់ថានេះដោយសារតែអនុវត្តជីកដាក់ប្រព័ន្ធលូរំដោះទឹកកខ្វក់ចេញពីក្នុងក្រុង ទាំងខាងកើតស្ទឹង និងខាងលិចស្ទឹង ។ប៉ុន្តែបណ្ដាផ្លូវទាំងនេះនឹងត្រូវធ្វើការកែលម្អឡើងវិញឆាប់ៗ បន្ទាប់ពីបញ្ចប់គម្រាងប្រព័ន្ធលូក្រោមដីរួចរាល់ជាស្ថាពរ ជាពិសេសប៉ែកខាងកើតស្ទឹងសង្កែ ។
លោក ហ៊ាន លីហុង ប្រធានគ្រប់គ្រងការដ្ឋាននៃគម្រោងទឹកកខ្វក់ក្នុងក្រុងបាត់ដំបង បានលើកឡើងពីកំណាត់ផ្លូវជាតិលេខ៥ ចាប់ពីចំណុចរង្វង់មូលព្រាបស រហូតមកដល់រង្វង់មូលលោកតាដំបងគ្រញូង ដែលមានសភាពខូចខាតកន្លងមកនេះ ។លោកថា នេះដោយសារការជីកគាស់ ដើម្បីអនុវត្តគម្រោងសាងសង់ប្រព័ន្ធលូរំដោះទឹកកខ្វក់។ដូចនេះសូមបងប្អូនប្រជាពលរដ្ឋកុងក្រុងមានការយោគយល់ និងអធ្យាស្រ័យខណៈការដ្ឋានកំពុងដំណើរការ ។តែផ្លូវនេះនឹងត្រូវសាងសង់ឡើងវិញ ក្រោយពីបញ្ចប់គម្រោងខាងលើ។
លោកបានបន្ថែមថា ការអនុវត្តគម្រោងសាងសង់ប្រព័ន្ធលូរំដោះទឹកកខ្វក់នៅប៉ែកខាងកើតស្ទឹងសង្កែ សម្រេច១០០ភាគរយហើយ។ចំណែកផ្លូវដែលរងការខូចខាតកន្លងមក ក៏នឹងត្រូវរៀបចំជួសជុលកែលម្អឡើងវិញជាបន្តបន្ទាប់ទៅតាមស្ថានភាពដើមរបស់ផ្លូវនីមួយៗ។ចំពោះកំណាត់ផ្លូវជាតិលេខ៥ចាប់ពីចំណុចរង្វង់មូលព្រាបស រហូតមកដល់លោកតាដំបងគ្រញូងនឹងត្រូវសាងសង់ឡើងវិញនៅចន្លោះពាក់កណ្តាលខែមករា ឆ្នាំ២០២៥។
សូមជម្រាបថា នៅក្នុងទីប្រជុំនៃក្រុងបាត់ដំបង បច្ចុប្បន្នបាន និងកំពុងអនុវត្តនូវគម្រោងស្តារប្រព័ន្ធលូរំដោះទឹកកខ្វក់ និង អាងប្រព្រឹត្តកម្មទឹកកខ្វក់ ចេញក្រៅក្រុង ដែលគាំទ្រដោយហិរញ្ញប្បទានពីធនាគារអភិវឌ្ឍន៍អាស៊ី (ADB) និងអនុវត្តគម្រោងដោយក្រសួងសាធារណការ និងដឹកជញ្ជូន។នៅក្នុងដំណាក់កាលនៃការសាងសង់នេះ ប្រជាពលរដ្ឋពិតជាជួបការលំបាកចៀសមិនផុត។ក៏ប៉ុន្តែរដ្ឋបាលខេត្ត រដ្ឋបាលក្រុង និងប្រតិបត្តិករនៃគម្រោង បាននិងកំពុងខិតខំជួសជុល និងពន្លឿនការសាងសង់ផ្លូវដែលខូចខាតឡើងវិញដោយយកចិត្តទុកដាក់។
មន្រ្តីគ្រប់គ្រងការដ្ឋានបញ្ជាក់ថា នៅពេលដែលគម្រោងប្រព័ន្ធលូរំដោះទឹកកខ្វក់ត្រូវបានបញ្ចប់ និងធ្វើតេស្តតាមបច្ចេកទេសរបស់គម្រោងរួចរាល់ រដ្ឋបាលខេត្តនឹងជំរុញឱ្យក្រុមហ៊ុនជួសជុលផ្លូវដែលខូចខាតទាំងអស់នោះ ឱ្យប្រសើរឡើងវិញដោយ
មិនបង្អែរបង្អង់ឡើយ៕
អត្ថបទ-រូបភាព៖ អ៊ុក សំអាន បប.
