បាត់ដំបង ៖ រដ្ឋបាលខេត្តបាត់ដំបង នឹងរៀបចំនូវព្រឹត្តិការណ៍ពិព័រណ៍​ម្ហូបអាហារខ្មែររយៈពេល ៣ថ្ងៃចាប់ពីថ្ងៃទី២៩ ដល់ថ្ងៃទី៣១ ខែ​ធ្នូ​ឆ្នាំ២០២៤ នៅកំណាត់ផ្លូវលេខ១ ចាប់ពីរដ្ឋាករទឹកខេត្ត ដល់សួននាគ​សន្តិភាព មុខអគារសារមន្ទីរប្រវត្តិសាស្រ្ត ខេត្តបាត់ដំបង (សាលាខេត្ត​ចាស់) ។ព្រឹត្តិការណ៍នេះរៀបចំឡើងដើម្បីអបអរពិធី​បុណ្យឆ្លង​ឆ្នាំសកល​២០២៤-២០២៥​ផង និងដើម្បី​ផ្តល់ឱកាសដល់ចុង​ភៅចំណានៗដែលធ្លាប់មានស្នាដៃ ក្នុងការចំអិនមុខម្ហូបអាហារ និងបង្អែមខ្មែរ នៅតាមផ្ទះ តាមភោជនីយដ្ឋាន និងអាហារដ្ឋាន​នានាក្នុងក្រុង ខេត្ត បានចូលរួមបង្ហាញស្នាដៃ ក៏ដូចជាបានចែករំលែក​នូវបទពិសោធន៍​ល្អៗពីគ្នាទៅវិញទៅមកផង។ពិសេសជាងនេះគឺ​បង្កើតភាពសប្បាយរីករាយ ប្លែកភ្នែក ប្លែកអារម្មណ៍ដល់ទេសចរជាតិ និងអន្តរជាតិ ដែលមកកម្សាន្តខេត្តបាត់ដំបង។

បន្ទាប់ពីទទួលជោគជ័យ និងមានការចាប់អារម្មណ៍ខ្លាំងពីប្រជាពលរដ្ឋ ភ្ញៀវជាតិ អន្តរជាតិ ក្នុងការប្រារព្ធកាលពី​ឆ្នាំ​២០២២និងឆ្នាំ២០២៣​កន្លងទៅ នៅឆ្នាំ២០២៤នេះ រដ្ឋបាលខេត្តបាត់ដំបងនឹងរៀបចំ​ពិរព័រណ៍​ម្ហូបអាហារខ្មែរម្តងទៀត​ដើម្បីអបអរ​សាទរ​ពិធីបុណ្យ​ឆ្លងឆ្នាំ​សកល ២០២៤ឈានចូលឆ្នាំថ្មីសកល២០២៥ខាងមុខ ហើយឆ្នាំនេះ​កាន់តែប្លែកជាង​ឆ្នាំមុនទៀតផង ។

បើតាមផែនការរបស់ឯកឧត្តម សុខ លូ អភិបាលខេត្តបាត់ដំបង បង្ហាញក្នុង​កិច្ចប្រជុំស្តីពីការតាំងពិរព័រណ៍ម្ហូបអាហារខ្មែរ​ឆ្នាំ ២០២៤នឹងប្រព្រឹត្តធ្វើរយៈពេលបីថ្ងៃចាប់ពីថ្ងៃទី២៩ ដល់ថ្ងៃទី៣១ ខែធ្នូ ដែលជាថ្ងៃបញ្ចប់ឆ្នាំចាស់២០២៤ ឆ្លងចូលឆ្នាំ២០២៥ ។ព្រឹត្តិការណ៍​នេះរៀបចំដោយរដ្ឋបាលខេត្តបាត់ដំបង សហការជាមួយសហ​ភាពសហព័ន្ធយុវជនកម្ពុជាខេត្ត។

ឯកឧត្តម​ សុខ​ លូ​ បញ្ជាក់ថា ព្រឹត្តការណ៍ឆ្នាំនេះធ្វើឱ្យបានល្អ មានភាពប្លែកស្អាត និងគួបផ្សំបញ្ចូលបន្ថែមនូវសិល្បៈវប្ប
ធម៌​និងមុខម្ហូបថ្មីៗ ឱ្យកាន់តែមានភាពសម្បូរបែប និងកាន់​តែប្លែកជាងបណ្តាឆ្នាំកន្លងទៅ។

ជុំវិញព្រឹត្តិការណ៍ម្ហូបអាហារនេះដែរ លោក ហម អរុណ អនុប្រធានមន្ទីរ និងជាអ្នកនាំពាក្យមន្ទីរទេសចរណ៍ខេត្តបាត់ដំបង បញ្ជាក់ថា រដ្ឋបាលខេត្តបានរៀបចំនូវព្រឹត្តិការណ៍ពិព័រណ៍ម្ហូបអាហារខ្មែរចំនួនពីរឆ្នាំជាប់ៗគ្នារួចមកហើយ នៅឆ្នាំ២០២២​និង២០២៣ដោយមានភ្ញៀវ​ទេសចរជាតិ អន្តរជាតិ និងអ្នកចូលរួមយ៉ាងច្រើនកុះករ ។ដោយឡែក​សម្រាប់ឆ្នាំ២០២៤ លោក ហម អរុណ បានបញ្ជាក់ថា​ការរៀបចំកាន់​តែធំ និងកាន់តែប្លែកជាងឆ្នាំមុន។

សូមជម្រាបថា រដ្ឋបាលខេត្តបាត់ដំបងអនុវត្តតាមការណែនាំដ៏​ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រដ្ឋបាលខេត្តបានបង្កើតនូវព្រឹត្តិការណ៍​ផ្សេងៗ ដើម្បីទាក់ទាញដល់ភ្ញៀវទេសចរ​និងដើម្បីបង្កនូវ​ភាពសប្បាយរីករាយជូនបងប្អូនប្រជាពលរដ្ឋក្នុងខេត្ត និងក្រៅខេត្តក្រោមម្លប់នៃសន្តិភាព៕

អត្ថបទ-រូបភាព៖ អ៊ុក សំអាន