ក្រសួងបរិស្ថានសម្រេចឱ្យក្រុមហ៊ុនជីងលូ យ័ន នៅស្រុកគងពិសី បញ្ឈប់ជាបន្ទាន់ការបង្ហូរកាកសំណល់រាវ ចូលទៅក្នុងប្រឡាយ និងរៀបចំប្រព័ន្ធត្រួតពិនិត្យ
កំពង់ស្ពឺ៖ក្រសួងបរិស្ថានបានសម្រេចឱ្យក្រុមហ៊ុនជីងលូ យ័ន បញ្ឈប់ការបង្ហូរកាកសំណល់រាវ(ទឹកកខ្វក់)ចូលទៅក្នុងប្រឡាយ៦១ជាបណ្តោះអាសន្ន ដើម្បីរៀបចំឧបករណ៍បច្ចេកទេសតាមដានជាថ្មី ពិសេសបញ្ជៀសផលប៉ះពាល់ធ្ងន់ធ្ងរដល់សុខភាពប្រជាពលរដ្ឋរស់នៅតាមបណ្តោយសណ្តស្ទឹងព្រែកត្នោត និងជីវចម្រុះ ។
ការសម្រេចបែបនេះធ្វើឡើងក្រោយមានការចុះត្រួតពិនិត្យប្រព័ន្ធប្រព្រឹត្តិកម្មទឹកកខ្វក់ក្នុងរោងចក្រនិងប្រព័ន្ធលូបង្ហូរកាកសំណល់រាវចេញពីរោងចក្រទៅក្នុងប្រឡាយលេខ៦១ ហើយបន្តធ្លាក់ចូលទៅក្នុងស្ទឹងតូច ស្ថិតក្នុងភូមិក្រាំងទ្រា ឃុំព្រះនិព្វាន ស្រុកគងពិសី ខេត្តកំពង់ស្ពឺកាលពីថ្ងៃទី១៩ ខែធ្នូ ឆ្នាំ២០២៤។
លោក សារុន សំបូរ ប្រធាននាយកដ្ឋានបរិស្ថានបានរៀបរាប់ថា ក្រុមការងារក្រសួងបរិស្ថានបានចុះពិនិត្យតាមដានការអនុវត្តវិធានការកែប្រែបច្ចេកទេសលើការគ្រប់គ្រងសំណល់រាវ និងទឹកកខ្វក់របស់សួនឧស្សាហកម្ម JIN LU YAUN ENERGY ENVIRONMENT PROTECTION CO.,LTD ដែលកំពុងបង្កផលប៉ះពាល់យ៉ាងធ្ងន់ធ្ងរដល់ប្រជាពលរដ្ឋរស់នៅក្នុងឃុំចំនួន១២ ក្នុងស្រុកកណ្តាលស្ទឹង ខេត្តកណ្តាល ។ប្រជាពលរដ្ឋបានបញ្ជាក់ថាមានការបង្ហូរកាកសំណល់រាវ(ទឹកកខ្វក់)ចូលទៅក្នុងប្រឡាយទឹក និងស្ទឹង ពិសេសនៅពេលយប់ ។ប្រជាពលរដ្ឋបានសុំឱ្យមានការអន្តរាគមន៍បន្ទាន់ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាថែមទៀតផង។
មន្ត្រីដដែលបន្តទៀតថា ក្រោយពីមានការស្នើសុំនេះ សម្តេចធិបតី ហ៊ុន ម៉ាណែត ក៏បានដាក់បទបញ្ជាទៅដល់អាជ្ញាធរខេត្តកំពង់ស្ពឺ និងខេត្តកណ្តាល ពិសេសក្រសួងបរិស្ថានត្រូវចុះបន្ទាន់ទៅដល់ទីតាំងរោងចក្រ ។នៅពេលក្រុមការងារចម្រុះនៃអាជ្ញាធរខេត្ត និងស្រុកទាំងពីរ ដឹកនាំដោយក្រសួងបរិស្ថានចុះពិនិត្យជាក់ស្តែង បានរកឱ្យឃើញនូវមូលហេតុដែលបង្កឱ្យទឹកមានពណ៌ក្រមៅ និងមានក្លិនស្អុយខ្លាំង មិនអាចប្រើប្រាស់ក្នុងការស្រោចស្រពដំណាំកសិកម្មបាន ពិសេសការប្រើប្រាស់ប្រចាំថ្ងៃរបស់មនុស្ស ព្រមទាំងសត្វផង ។
មន្រ្តីដដែលបញ្ជាក់ថា កាកសំណល់រាវដែលបង្ហូរចេញពីរោងចក្របោកគក់ខាងលើ ពិតជាបានបង្កឱ្យទឹកប្រឡាយនិងស្ទឹងព្រែកត្នោតប្រែជាខ្មៅ និងមានក្លិនស្អុយអូសាវែលទៅក្នុងទឹកធ្វើឱ្យប៉ះពាល់ធ្ងន់ធ្ងរដល់ការប្រើប្រាស់ប្រចាំថ្ងៃ ពិសេសពលរដ្ឋក្នុងទាំង១២ក្នុងស្រុកកណ្តាលស្ទឹង។ដោយមូលហេតុនេះ ក្រសួងបានសម្រេចផ្អាកការបង្ហូរកាកសំណល់រាវ(ទឹកកខ្វក់)ចេញពីរោងចក្របោកគក់នេះជាបណ្តោះអាសន្នសិនចាប់ពីថ្ងៃទី១៩ ខែធ្នូ នេះតទៅដើម្បីរៀបចំប្រព័ន្ធបច្ចេកទេសត្រួតពិនិត្យ និងទុកពេលឱ្យទឹកអាចវិលទៅរកសភាពដើម ។ប៉ុន្តែរោងចក្រអាចដំណើរបានជាធម្មតា គ្រាន់តែការរៀបចំប្រព័ន្ធបច្ចេកទេសត្រួតពិនិត្យទឹកជាថ្មី ៕
ដោយ៖ ម៉ុន សំអាត
