អាមេរិក៖ ប្រធានាធិបតីអាមេរិក លោក Joe Biden បាននិយាយថា លោកគ្រោងនឹងលុបចោលប្រាក់កម្ចីរបស់និស្សិតអាមេរិក ចំនួន៥៥,០០០នាក់បន្ថែមទៀត ដែលនឹងស្មើនឹងការលុបបំណុលសរុប ចំនួន ៤.២៨ពាន់លានដុល្លារ នៅក្នុងខែចុងក្រោយរបស់លោក សម្រាប់តំណែងជាប្រធានាធិបតីអាមេរិក។

នៅក្នុងសេចក្តីថ្លែងការណ៍មួយចេញដោយសេតវិមាន កាលពីថ្ងៃសុក្រ លោក Biden បានឲ្យដឹងថា ការលុបចោលបំណុលដ៏ធំនេះ គឺសម្រាប់ «គ្រូបង្រៀន គិលានុបដ្ឋាយិកា សមាជិកសេវាកម្ម មន្ត្រីអនុវត្តច្បាប់ និងបុគ្គលិកសេវាសាធារណៈដទៃទៀត ដែលបានលះបង់ជីវិតរបស់ពួកគេ ក្នុងការផ្តល់ត្រឡប់ ទៅសហគមន៍របស់ពួកគេវិញ» ។

ជាមួយនឹងផែនការថ្មីនេះ អ្នកទទួលផលពីការលុបបំណុលសរុបកើនដល់ជិត ៥ លាននាក់ ជាមនុស្សដែលត្រូវបានអនុម័តសម្រាប់ការបន្ធូរបន្ថយបំណុល ក្នុងអំឡុងពេលរដ្ឋបាលរបស់លោក Biden ។

ប្រធានាធិបតី ដែលផុតអាណត្តិ រូបនេះ បាននិយាយថា «ចាប់ពីថ្ងៃទីមួយ នៃការគ្រប់គ្រងរបស់ខ្ញុំ ខ្ញុំបានសន្យាថា នឹងធ្វើឱ្យប្រាកដថា ការអប់រំថ្នាក់ឧត្តមសិក្សា គឺជាសំបុត្រសម្រាប់វណ្ណៈកណ្តាល មិនមែនជាឧបសគ្គ ចំពោះឱកាសនោះទេ»។

រដ្ឋមន្ត្រីក្រសួងអប់រំសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយថា ការអនុម័ត កាលពីថ្ងៃសុក្រ បាននាំមកនូវចំនួនសរុបនៃការលុបបំណុលនិស្សិត អំឡុងពេលកាន់តំណែង រយៈពេល ៤ឆ្នាំ របស់លោក Biden បានកើនដល់ជិត ១៨០ពាន់លានដុល្លារ៕

ប្រភពពី AFP ប្រែសម្រួល៖ សារ៉ាត