សៀមរាប​៖ខណៈរដ្ឋបាលខេត្តសៀមរាប សហការជាមួយមន្ទីរវប្បធម៌ និងវិចិត្រសិល្បៈខេត្ត នឹងរៀបចំនូវព្រឹត្តិការណ៍​បង្ហោះ​ខ្លែងឯក រយៈ​ពេល៣ថ្ងៃ ចាប់ពីថ្ងៃទី២៧-២៩ ខែធ្នូ ឆ្នាំ២០២៤ខាងមុខនៅ​ទីតាំង​អតីតអាកាសយានដ្ឋានអន្តរជាតិ​សៀម​រាប​ យុវជនមួយចំនួន ក៏បាន​បង្ហាញពីក្តីបារម្ភក្នុងការបាត់បង់បន្តិចម្តងៗនូវខ្លែងឯក ដែលជាសម្បត្តិ​វប្បធម៌ដ៏មានតម្លៃដោយសារអ្នកចេះដឹងអំពីខ្លែងឯក កាន់តែតិចទៅៗ។

មុនព្រឹត្តិការណ៍បង្ហោះខ្លែងមកដល់ យុវជនមួយក្រុម បានទៅចូលរួម​រៀន​ជំនាញធ្វើខ្លែងឯក​ដោយផ្ទាល់ពីព្រឹទ្ធាចារ្យនៅតំបន់​សៀមរាប។ លោក ហូ សម័យ ប្រធានក្រុមការងារយុវជនខេត្តសៀមរាបបាន​និយាយថា ក្រុមយុវជនបានរៀនពីវិធីសាស្រ្តធ្វើខ្លែងឯក ដូចជា វិធីបិតឫស្សី និងការធ្វើកន្ទុយត្បាញស្លឹកត្នោត។ ក្រុមយុវជនជាង ៣០នាក់បានចូលរួមរៀនពីលោកតាស៊ន់ ដែលនៅ​ភូមិព្រំកុដ្ឋ សង្កាត់បល័្លង្ក ។

ចំណែកលោក លឺ ភារុណ ប្រធានក្រុមការងារយុវជនក្រុងរុនតាឯកតេ​ជោសែន ស្រុកបន្ទាយស្រី ខេត្តសៀមរាបបានផ្តល់សារសំខាន់លើ​ការ​រៀនជំនាញធ្វើខ្លែងឯកបន្តពីព្រឹទ្ធាចារ្យដែលមានជំនាញពិតប្រាកដ ។លោកថា ការរៀនសូត្រនេះមិន​ត្រឹមតែជាសកម្មភាពស្រាវជ្រាវ​ប៉ុណ្ណោះទេ ប៉ុន្តែជាវិធីសាស្រ្តអភិរក្ស និងផ្សព្វផ្សាយវប្បធម៌ប្រពៃណី​មួយនេះដល់សម័យ​ក្រោយ។

លោក ខៀវ ប្រសើរ ប្រធានផែនការនិងរបាយការណ៍បានអំពាវនាវ​ដល់យុវជនឱ្យចូលរួមថែរក្សាមរតកវប្បធម៌ប្រពៃណី ដោយស្វែង​យល់និងសិក្សាអំពីវប្បធម៌ដែលស្ទើរតែបាត់បង់នេះ។លោកបន្តថា សារមន្ទីរខ្លែងខ្មែរត្រូវបានបង្កើតតាំងពីឆ្នាំ ២០០៣ តែការចាប់អារម្មណ៍​ពីសំណាក់យុវជននៅតែមានកម្រិតតិច។

ព្រឹត្តិការណ៍​បង្ហោះ​ខ្លែងឯករយៈពេល៣ថ្ងៃនៅចុងខែធ្នូ ខាងមុខ​នឹងផ្ដល់ឱកាសឱ្យខ្លែងឯកប្រមាណ១០០ និងខ្លែងសេរី​ចូលរួមដើម្បីបង្ហាញ និងលើកស្ទួយវប្បធម៌ខ្មែរ។ព្រឹត្តិការណ៍នេះ ដើម្បីរក្សានូវកេរ្តិ៍មរតកដូនតាខ្មែរ និងផ្សព្វផ្សាយពី​ប្រវត្តិ​ខ្លែងឯក​ខ្មែរដែលដូនតាបានចារឹកនៅតាមប្រាង្គប្រាសាទ និងរក្សានូវទំនៀម​ទម្លាប់ប្រពៃណី វប្បធម៌ អរិយធម៌របស់ដូនតា​ខ្មែរ។

យុវជនខេត្តសៀមរាបក៏បានរំពឹងថាខ្លែងឯកនេះនឹងត្រូវចុះក្នុងបញ្ជីសម្បត្តិបេតិកភណ្ឌពិភពលោកក្នុងរយៈពេលឆាប់ៗខាងមុខក្រោមការគាំទ្ររបស់រាជរដ្ឋាភិបាលកម្ពុជា និងក្រសួងវប្បធម៌ និងវិចិត្រសិល្បៈ៕
អត្ថបទនិងរូបភាព៖​ ប៊ុន​រដ្ឋា