(ភ្នំពេញ)៖ លោក យឿន ភីយុទ្ធ អ្នករៀបចំព្រឹត្តិការណ៍កីឡាប្រណាំង​ទោចក្រ​យាន Flying Bikes Short Track MTB Challenge ឆ្នាំ២០២៤ ជាមួយ​លោក ព្យែរ អ៊ីវកាទ្រី បានគូសបញ្ជាក់ថា ព្រឹត្តិការណ៍​កីឡានេះមានចំនួន​កីឡាករ កីឡាការិនីតាំងពីវ័យកុមារដល់វ័យចំណាស់​ច្រើនជាង ២០០នាក់ បានចូលរួមប្រកួតប្រជែងលើ១០វិញ្ញាសា ហើយ​សិទ្ធផលរបស់ពួកគាត់​ក៏កើន​ឡើង​ខ្ពស់ៗ គួរឱ្យកត់សម្គាល់ដែរ។

ការប្រកួត Flying Bikes Short Track MTB Challenge ដែលបាន​ធ្វើឡើងនៅទីលានស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ នៅថ្ងៃទី២២ ខែធ្នូ ឆ្នាំ២០២៤ ដោយមានកីឡាករ កីឡាការិនីជាតិ និងអន្តរជាតិចូលរួមមានចំនួន ២៥០នាក់មកពីក្លឹប រាជធានីខេត្ត ក្នុងនោះមានកីឡាករ កីឡាការិនីបរទេសចំនួន ៣០នាក់ មកពីអាល្លឺម៉ង ហ្វីលីពីន បារាំង ស្វីសជាដើម។

លោក យឿន ភីយុទ្ធ បានសង្កត់ធ្ងន់ថា យើងបានរៀបចំនួន ១០វិញ្ញាសា​អាយុ​ចន្លោះពី ៨ដល់១១ឆ្នាំ ១២ឆ្នាំ ១៣-១៤ឆ្នាំ ១៧-១៨ឆ្នាំ ដោយមាន​កីឡាករ កីឡាការិនីចូលរួមប្រកួតច្រើនរហូតដល់ ១៤០នាក់ ១៩-២៩ ឆ្នាំ ៣០-៣៩ និងClass Master ចាប់ពី៤០ឆ្នាំឡើង កីឡាករវ័យចាស់ Class VIP និងកម្រិតអាជីព Class A ជាដើម។

បន្ថែមពីលើនេះ អ្នកជំនាញរៀបចំរូបនេះបន្ថែម ការរៀបចំការប្រកួត ឆ្នាំ២០២៤នេះ មានលក្ខណៈល្អប្រសើរខ្លាំង ដោយកីឡាករ កីឡាការិនី​ចូលរួមបង្ហាញគុណផលកម្រិតខ្ពស់ៗ បើទោះបីជាទីលានខ្លីក៏ពិតមែន ប៉ុន្តែស្ថានភាពរបស់កីឡាករ កីឡាការិនីមិនមានពេលសម្រាកនោះទេ ដោយពួកគាត់កាន់តែហត់ ដោយយើងហៅវិញ្ញាសាកង់ភ្នំ Short Track ដែលជាវិញ្ញាសាថ្មី។ ជាការកត់សម្គាល់ គឺកីឡាករ កីឡាការិនី ក្នុងកម្រិត​អាជីព និងពាក់កណ្តាលអាជីព ដែលកាលពីឆ្នាំមុន ធ្វើសម្រេចបាន​ជិត ២នាទី ប៉ុន្តែការប្រកួតឆ្នាំនេះ ពួកគាត់ធ្វើបានត្រឹមតែជាង ១នាទីស្តើង​ប៉ុណ្ណោះ។

លោក យឿន ភីយុទ្ធ ដែលស្ថិតនៅក្នុងសហព័ន្ធកីឡាទោចក្រយានកម្ពុជា​ដែរនោះ បានគូសបញ្ជាក់ថា វិញ្ញាសាកង់ភ្នំ Short Track នេះ គឺត្រូវនឹង​ទីលាននៅព្រែកលៀបនេះ សម្រាប់ការប្រកួត និងហ្វឹកហាត់ជាមួយនឹ​ងវិញ្ញាសា ដែលដាក់ឱ្យប្រកួតនៅក្នុងស៊ីហ្គេម លើកទី៣៣ នៅប្រទេសថៃ ដែលគ្រោងនឹងធ្វើឡើងនាចុងឆ្នាំ២០២៥ខាងមុខ។

តាមរយៈព្រឹត្តិការណ៍ Flying Bikes Short Track MTB Challenge ឆ្នាំ២០២៤នេះពិតជាមានសារៈសំខាន់ ក្នុងការផ្តល់ឱកាសជូនដល់​កីឡាករ កីឡាការិនីកម្ពុជាបានស្វែងយល់អំពីបច្ចេកទេស​នៃវិញ្ញាសា​នីមួយៗបានបញ្ចេញសមត្ថភាព ហើយសហព័ន្ធកីឡាទោចក្រយានកម្ពុជា​បាន​ជ្រើសរើសធនធានយុវជនថ្នាលក្រោមអាយុ១៨ឆ្នាំ និងក្រោម ២៣ឆ្នាំចូលរួមក្នុងក្រុមជម្រើសជាតិ។

ជាមួយគ្នានេះ លោក យឿន ភីយុទ្ធ ក៏បានថ្លែងអំណរគុណយ៉ាងជ្រាលជ្រៅ​ជូន​ចំពោះ​ប្រធានសហព័ន្ធកីឡាទោចក្រយានកម្ពុជា ឯកឧត្តម ប៉ាន សូរស័ក្តិ​ ដែលតែងតែអនុញ្ញាតឱ្យយើងខ្ញុំបានរៀបចំរាល់កម្មវិធី​ប្រកួត​ទាំងអស់ ដោយឯកឧត្តមប្រធានតែងតែជួយជ្រោមជ្រែងលើកទឹកចិត្ត ក្នុងដំណើរការអភិវឌ្ឍជំនាញកីឡាទោចក្រយានឱ្យមានការរីកចម្រើនកាន់តែប្រសើរបន្ថែមទៀត។ ជាមួយគ្នានេះ អ្នករៀបចំព្រឹត្តិការណ៍រូបនេះ​ក៏ថ្លែង​អំណរគុណដល់ក្រុមហ៊ុនដៃគូឧបត្ថម្ភទាំងអស់ដែលផ្តល់ការគាំទ្រដល់ព្រឹត្តិការណ៍ដំណើរការដោយរលូន និងជោគជ័យ។

គួរបញ្ជាក់ថា ឆ្លងកាត់ការប្រកួតយ៉ាងស្វិតស្វាញលើ១០វិញ្ញាសា គណៈ​កម្មការ​ជំនាញបានសម្រិតសម្រាំងបានម្ចាស់ជ័យលាភីទាំងអស់ ដោយ​គុណភាពបច្ចេកទេសរបស់ជ័យលាភីទាំងអស់បានបង្ហាញពីសក្តានុពលខ្លាំងៗផងដែរ សម្រាប់ជាធនធានសម្រាប់ជាតិ ក្នុងវិស័យកីឡាទោចក្រ​យាន​ផងដែរ៕

អត្ថបទ -រូបភាព ៖ ចាន់ វិចិត្រ និងងីម ឆៃហួត