(ភ្នំពេញ)៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និង​នេសាទ កាលពីថ្ងៃទី២៣ ខែធ្នូ ឆ្នាំ២០២៤ ក្នុងពិធីបើកកិច្ចប្រជុំបូកសរុប​លទ្ធផល​ការងារ​ឆ្នាំ២០២៤ និងលើកទិសដៅអនុវត្តការងារឆ្នាំ២០២៥ របស់អគ្គ​នាយកដ្ឋានកៅស៊ូ ឯកឧត្តមរដ្ឋមន្ដ្រី បានគូសបញ្ជាក់ថា ការងារ​កៅ​ស៊ូនេះ ត្រូវពិចារណាគិតគូរឱ្យបានវែងឆ្ងាយ មានភាពម្ចាស់ការ មាន​អំណាចទៅ​លើ​ទីផ្សារ និងទាក់ទាញការវិនិយោគលើការកែច្នៃ​ផលិតផល​សម្រេច​ឱ្យ​មានភាពរឹងមាំ សំដៅជំរុញការពង្រឹងនូវផលិតកម្ម ដោយ​មិន​មានការពង្រីក​ឡើយ។

ឯកឧត្តមរដ្ឋមន្ដ្រី បានសម្តែងនូវការស្វាគមន៍យ៉ាងកក់ក្តៅ និងក្តីសោមនស្ស​រីក​រាយ​ក្នុង​ការចូលរួមកម្មវិធីនាថ្ងៃនេះ ដើម្បីតម្រង់ទិសអគ្គនាយកដ្ឋាន​កៅ​ស៊ូ​​សម្រាប់ទិសដៅអនុវត្តការងារឆ្នាំ២០២៥។ លើសពីនេះ ឯកឧត្តមរដ្ឋ​មន្ដ្រី ឌិត ទីណា បានណែនាំដល់អង្គពិធីត្រូវចូលរួមពិភាក្សាលើ​ផែនការ​ថវិកា ការប្រើ​ប្រាស់ថវិកា និងលទ្ធផលសូចនាករទាំងអស់ប្រៀបធៀប​នឹងផែន​ការរំពឹងទុក ព្រមទាំងពិនិត្យវាយតម្លៃឱ្យបានច្បាស់លាស់ ឆ្លើយតប​ទៅនឹងកិច្ចសន្យាសមិទ្ធកម្មជាមួយក្រសួងសេដ្ឋកិច្ច និងហរិញ្ញវត្ថុ ដែលជាបទពិសោធសម្រាប់ការអនុវត្តការងារឆ្នាំ២០២៥ កាន់តែមានប្រសិទ្ធភាព និងដាក់អាទិភាពចំគោលដៅ។

ឯកឧត្តមរដ្ឋមន្ដ្រី បានកោតសរសើរ និងវាយតម្លៃខ្ពស់នូវការខិតខំប្រឹងប្រែង​របស់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់នៃអគ្គនាយកដ្ឋានកៅស៊ូ ក្នុងការបំពេញការងារពេញលេញ ជំរុញការស្រាវជ្រាវបង្កើតបាននូវក្លូន​កៅស៊ូ CRRI12 និងCRRI19 បានដោយជោគជ័យ និងបន្តបញ្ចេញក្លូននេះ​ដល់បណ្តាអ្នកដាំកៅស៊ូទាំងអស់ ដើម្បីជំរុញក្លូនកៅស៊ូនេះឱ្យកាន់តែមាន​ប្រ​សិទ្ធភាព និងប្រសិទ្ធផលខ្ពស់។

ទន្ទឹមនឹងនេះ ឯកឧត្តមរដ្ឋមន្ដ្រី ឌិត ទីណា បានផ្តល់អនុសាសន៍​ណែនាំដល់​អង្គពិធីត្រូវគិតគូរពីវិស័យកៅស៊ូស្របតាមគោលនយោបាយរបស់រាជរដ្ឋាភិបាល មានសេដ្ឋកិច្ចមាត្រដ្ឋាន រៀបចំមូលដ្ឋានច្បាប់ បច្ចេកទេសច្បាស់​លាស់ សិក្សាពីតម្រូវការទីផ្សារ កាត់បន្ថយថ្លៃដើមផលិត និងផ្តល់ផល​ចំ​នេញ​សេដ្ឋកិច្ចពិតប្រាកដដល់ប្រជាពលរដ្ឋ។

ឯកឧត្តមរដ្ឋមន្ដ្រី បានលើកទឹកចិត្តដល់អង្គប្រជុំត្រូវផ្តោតការពិភាក្សា​លើការ​កសាង​​សហគមន៍កសិកម្មទំនើប ដែលប្រមូលផ្តុំនូវអ្នកដាំដុះកៅស៊ូ ជា​បណ្តុំ​​មួយមានភាពរឹងមាំ មានផែនការវិនិយោគ និងផលិតកម្មច្បាស់លាស់ ព្រមទាំងឆ្លើយតបទៅតាមតម្រូវការទីផ្សារ និងមានប្រសិទ្ធភាពសេដ្ឋកិច្ចពិត​ប្រាកដ ៕

ប្រភព ៖ ក្រសួងកសិកម្ម