(ភ្នំពេញ)៖កីឡាករកីឡាការិនីមកពីបណ្តាក្លឹបកូនគោលរាជធានីខេត្តចំនួន ២៥រូប បានចូលរួមក្នុងការប្រកួតជ្រើសរើសជើងឯកសហព័ន្ធកីឡា​វាយកូនគោលប្រចាំឆ្នាំ២០២៤ ដើម្បីប្រជែងដណ្តើមកៅអីជម្រើសជាតិ​ឆ្នាំ២០២៥ ហ្វឹកហាត់ត្រៀមចូលរួមប្រជែងមេដាយក្នុងព្រឹត្តិការណ៍​កីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ។

ការប្រកួតនេះ មានរយៈ៣ថ្ងៃចាប់ពីថ្ងៃទី២២ដល់២៥ ខែ ធ្នូ ឆ្នាំ២០២៥ នៅលើទីលានកីឡាវាយកូនគោល ហ្គ្រែន ភ្នំពេញ ។

លោក ឧញ៉ា ឡោក ដារិទ្ធ អគ្គលេធិការរង សហព័ន្ធកីឡាវាយកូនគោល​កម្ពុជា បានថ្លែងឱ្យដឹងថា នេះជាការប្រកួតជ្រើសរើសកីឡាករកីឡាការិនី​កូន​គោលឆ្នើមជុំដំបូង ដើម្បីចំរាញ់យកអ្នកមានសមត្ថភាពប្រមូលហ្វឹក​ហាត់បំប៉នជាមួយគ្រូសហព័ន្ធកីឡាវាយកូនគោលក្នុងដំណាក់កាលទី១ ហើយអ្នកជាប់ក្នុងវគ្គទី១នេះ និងត្រូវធ្វើតេសចំរាញ់ជាបន្តបន្ទាប់ទៀត រហូតចំរាញ់សល់៤រូបចូលរួមក្នុងព្រឹត្តិការណ៍កីឡាស៊ីហ្គេម នៅថៃក្នុងឆ្នាំ២០២៥តែម្តង ។

លោក ឧកញ៉ា បញ្ជាក់ទៀតថា រយៈពេល៣ថ្ងៃនៃការប្រកួតនេះ គណៈកម្ម ការនិងពិនិត្យវាយតម្លៃយ៉ាងលម្អិតមុននិងជាប់ក្នុងវគ្គជម្រុះជុំទី១។កីឡាករ កីឡាការិនីធ្វើការប្រកួត៣ថ្ងៃនេះ ពិន្ទុរបស់ពួកគេដែល​ធ្វើបានល្អនិងមាន ឱកាសជាប់ក្នុងតារាងចំណាត់កូនគោលពិភពលោក ដែលជួយឱ្យកីឡាករ កីឡាការិនីជាប់ទទួលបានឱកាស​ច្រើនចេញទៅប្រកួតនៅអន្តរជាតិ ដោយមិនបាច់ធ្វើការស្នើសុំ។

សម្រាប់ការប្រកួតកីឡាវាយកូនគោលជ្រើសរើសជើងឯកសហព័ន្ធកីឡាវាយកូនគោលប្រចាំឆ្នាំ២០២៤នេះ ទីលានកីឡាវាយកូនគោលហ្គ្រែនភ្នំពេញ ផ្តល់ជូនទីលាន និងទឹកបរិសុទ្ធកម្ពុជាជូនដល់កីឡាករឥតគិតថ្លៃ។ជាមួយ​គ្នានោះ ក៏មានការឧបត្ថម្ភពីBESTAផ្តល់ជូនទីលានហ្វឹក​សម្រាប់​កីឡាករ​ថ្នាល និងបង្វឹកកីឡាថ្នាលរៀងរាល់ថ្ងៃអាទិត្យ និងក្រុមហ៊ុន​ថាយលើស បញ្ចុះតម្លៃពិសេស សម្រាប់សម្ភារៈនិងខោអាវកីឡាករកីឡា​ការិនី​ចំពោះការប្រកួត។

គួរឱ្យដឹងដែរថាការប្រកួតកីឡា​​វាយ​កូន​គោល​ជ្រើសរើសជើងឯក​សហព័ន្ធ​កីឡាវាយកូនគោលប្រចាំឆ្នាំ២០២៤នេះ កីឡាករជ័យលាភីចំណាត់​លេខ១​អាចឈានទៅទទួលបានជាប់ក្នុងតារាចំណាត់ World Ranking ៣ជុំមានពិន្ទុមិនលើសពីបូក៦នោះទេ ។ ដោយឡែកសម្រាប់កីឡា​ការិនី​វិញ មានពិន្ទុមិនលើសពីបូក៨នោះទេ។

សូមបញ្ជាក់ដែរថា កាលពីការប្រកួតកីឡាជាតិលើកទីលើកទី៤ កីឡាករ​កីឡាការិនីដែលបានពិន្ទុជាប់នៅក្នុងតារាង World Amateur Golf Ranking មានកីឡាករ ពៅពេជ្រមេត្តា និងកីឡាការិនី យិន ហាម៉ានី៕

ដោយ ៖ ជាវ ចន្ធូ