លោក មឿន សម្បត្តិ ប្តេជ្ញាបន្តឧបត្ថម្ភធំកីឡាហាប់គីដូឱ្យកាន់តែអភិវឌ្ឈ និងរីកចម្រើន
(ភ្នំពេញ)៖ លោក មឿន សម្បត្តិ អ្នកគ្រប់គ្រងទូទៅ ក្រុមហ៊ុនដឹកអ្នកដំណើរ ឡារីតាបានបង្ហាញពីការប្តេជ្ញាខ្ពស់ថា ក្រុមហ៊ុនរបស់លោកនឹងបន្តការគាំទ្រ ក្នុងការជំរុញដល់ដំណើរការអភិវឌ្ឍជំនាញកីឡារបស់កម្ពុជាមួយនេះឱ្យកាន់តែរីកចម្រើន។
ការលើកឡើងរបស់អ្នកគ្រប់គ្រងរូបនេះ នៅក្នុងបទសម្ភាសន៍មួយ ក្រោយបញ្ចប់ការប្រកួតកីឡាហាប់គីដូ ជ្រើសរើសជើងឯកថ្នាក់ជាតិ ប្រចាំឆ្នាំ២០២៤ នៅពហុកីឡដ្ឋានជាតិអូឡាំពិក ដែលបិទបញ្ចប់ដោយជោគជ័យ កាលពីពេលថ្មីៗនេះ។
លោក មឿន សម្បត្តិ បានលើកឡើងទៀតថា ក្នុងនាមតំណាងក្រុមហ៊ុនលោកពិតជាមានក្តីរីករាយ ដែលបានចូលរួមឧបត្ថម្ភធំ ក្នុងព្រឹត្តិការណ៍កីឡាហាប់គីដូប្រចាំឆ្នាំនេះ ដើម្បីផលិតធនធានកីឡាករ កីឡាការិនីឱ្យកាន់តែមានគុណភាព សម្រាប់ជាតិ និងត្រៀមចូលរួមប្រកួតអន្តរជាតិនានា នាពេលបន្តបន្ទាប់ទៀត។ «ក្រុមហ៊ុនដឹកអ្នកដំណើរ ឡារីតា តែងតែចូលរួមឧបត្ថម្ភគាំទ្រគ្រប់សកម្មភាពកីឡាហាប់គីដូកម្ពុជា ក្នុងនោះមានដូចជាការប្រកួតជើងឯកថ្នាក់ជាតិ លើកទី១ កាលពីឆ្នាំ២០២៣ កន្លងទៅ និងការប្រកួតជើងឯកថ្នាក់ជាតិ លើកទី២ ឆ្នាំ២០២៤ ក៏ដូចជាឧបត្ថម្ភគាំទ្រដល់កីឡាករ កីឡាការិនីជម្រើសជាតិ ដែលបានចេញទៅប្រកួតកីឡាហាប់គីដូ ជើងឯកពិភពលោក ឆ្នាំ២០២៤ នៅប្រទេសថៃ ដោយដណ្តើមបានសមិទ្ធផលធំធេងជូនជាតិ ដោយឈ្នះមេដាយសរុប ៤០គ្រឿង។ ទាំងនេះ គឺជាមោទនភាពជាតិ ដែលជំរុញឱ្យវិស័យកីឡាហាប់គីដូកម្ពុជាកាន់តែមានភាពរីកចម្រើនតទៅមុខទៀត»។
«បច្ចុប្បន្ន រាល់សកម្មភាពកីឡាហាប់គីដូ យើងតែងតែចូលរួមឧបត្ថម្ភគាំទ្រ និងជួយផ្សព្វផ្សាយនៅតាមរាជធានីខេត្តនានាផងដែរ។ តាមពិតទៅ ក្រុមហ៊ុនផ្តោតសំខាន់លើការដឹកជញ្ជូនអ្នកដំណើរ ប៉ុន្តែក្រុមហ៊ុន ឡារីតា តែងតែចូលរួមជំរុញគាំទ្រដល់ដំណើការអភិវឌ្ឍជំនាញកីឡាមួយនេះរបស់កម្ពុជា ក្នុងគោលដៅលើកទឹកចិត្តដល់ក្រុមកីឡាករ កីឡាការិនីហាប់គីដូហ្វឹកហាត់ និងការប្រកួតនានា ពង្រឹងសមត្ថភាព និងរួមគ្នាគាំទ្រឱ្យមានភាពជោគជ័យដល់ប្រទេសជាតិរបស់យើង»។ លោក មឿន សម្បត្តិ បានគូសបញ្ជាក់បន្ថែម។
យ៉ាងណា អ្នកគ្រប់គ្រងរូបនេះប្តេជ្ញាចិត្តខ្ពស់ថា នឹងបន្តជួយជ្រោមជ្រែងឱ្យអស់ពីលទ្ធភាព ហើយក្នុងនាមជាក្រុមហ៊ុន ក៏សូមឱ្យអតិថិជនរបស់យើងទាំងអស់គ្នាសូមបន្តគាំទ្រសេវាដឹកជញ្ជូនអ្នកដំណើរ ដើម្បីឱ្យក្រុមហ៊ុន ឡារីតា បន្តជួយគាំទ្រដល់សកម្មភាពកីឡានេះ។
គួរបញ្ជាក់ថា ការប្រកួតកីឡាហាប់គីដូ ជើងឯកថ្នាក់ជាតិ លើកទី២ ឆ្នាំ២០២៤ មានប្រតិភូ គ្រូបង្វឹក កីឡាករ កីឡាការិនីចូលរួមប្រកួតប្រជែងមេដាយចំនួន ៨៧នាក់ ក្នុងនោះមានកីឡាករ កីឡាការិនី ៦៧នាក់ (កីឡាការិនី ២៧នាក់) ក្រោមការរៀបចំ និងចំណាយថវិកាផ្ទាល់ខ្លួនរបស់សហព័ន្ធខ្មែរកីឡាហាប់គីដូ និងក្រុមហ៊ុនដៃគូអភិវឌ្ឍមួយចំនួន ដោយក្រុមហ៊ុន ឡារីតា ជាម្ចាស់ឧបត្ថម្ភធំ។ លទ្ធផលការប្រកួត រួមមាន៖ ចំណាត់ថ្នាក់លេខ១ ក្លឹបក្រសួងមហាផ្ទៃ មេដាយសរុប ២៦គ្រឿង ក្នុងនោះមេដាយមាស ១២ ប្រាក់៧ និងសំរឹទ្ធ៧, លេខ២ ក្លឹបធីណា មេដាយសរុប ២២គ្រឿង មានមាស ៥ ប្រាក់៩ និងសំរឹទ្ធ៨, និងលេខ៣ ក្លឹបអូឡាំពិក មេដាយសរុប១៨ មានមាស៤ ប្រាក់៣ និងសំរឹទ្ធ១១, នឹងមានក្លឹបជាច្រើនទៀតឈ្នះមេដាយផងដែរ ៕
អត្ថបទ-រូបភាព ៖ លោក ចាន់ វិចិត្រ
