ព្រៃវែង៖ឯកឧត្តម សួន សុម៉ាលីន អភិបាលខេត្តព្រៃវែង ក្រោយពីដឹកនាំ​កិច្ចប្រជុំស្ដីពីការគ្រប់គ្រង និងប្រើប្រាស់ទឹកសម្រាប់​បង្ក​បង្កើនផលស្រូវ​ក្នុងរដូវប្រាំងឆ្នាំ២០២៤នៅសាលាស្រុកស្វាយអន្ទរ កាលពីដើមសប្ដាហ៍​រួចមក ឯកឧត្តម​បានបន្តដឹកនាំ​មន្ត្រីជំនាញទាំងយប់ចុះបូមទឹក​សង្គ្រោះ​ស្រូវប្រាំងរបស់ប្រជាពលរដ្ឋ ។

ឯកឧត្តមអភិបាលខេត្តព្រៃវែងបានបញ្ជាក់ថា ស្រូវប្រាំង​ប្រមាណ ១៧០០ហិកតា ក្នុងស្រុកស្វាយអន្ទរ ត្រូវការអន្តរាគមន៍បូមទឹក​សង្គ្រោះបន្ទាន់ ។ដោះស្រាយបញ្ហានេះ​មន្ទីរធនធានទឹក និងឧតុ​និយមខេត្ត រៀបចំអន្តរាគមន៍​បូមទឹកបន្ទាន់ភ្លាមៗ ។

ឯកឧត្តមបានបន្តថា រដ្ឋបាលខេត្ត ស្រុក បានពិភាក្សាលើ​តម្រូវការ​នៃការប្រើប្រាស់ទឹក ដោយទាញយក​ទឹកពីទន្លេវៃគោ សម្រាប់ស្រោច​ស្រពស្រូវរដូវប្រាំងខាងមុខ ដែលមានចំនួន៥ស្រុក កន្លងមកបានជួប​បញ្ហាប្រឈម ក្នុងនោះមាន ស្រុកកញ្ជ្រៀច ស្រុកស្វាយអន្ទរ ស្រុកស៊ីធរកណ្តាល ស្រុកកំចាយមារ និងស្រុកមេសាង។

សូមបញ្ជាក់ថា ប្រភពទឹកនៃស្ថានីយបូមទឹកនេះ គឺយកមកពីបឹងកំពិត ដែលស្ថិតនៅក្នុងស្រុកអូររាំងឪ ខេត្តត្បូងឃ្មុំ តាមរយៈព្រែកមេវ៉ៃ​គោ​ជំហានទី១៕
ដោយ៖នុត នាង