មហាមិត្តខេត្តបន្ទាយមានជ័យ បង្ហាញគោលជំហរគាំទ្រ ការពារសន្តិភាព ក្នុងឱកាសបុណ្យឆ្នាំសកល
បន្ទាយមានជ័យ៖ខណៈមន្ត្រីរាជការជួបជុំគ្នាទទួលអាហារសាមគ្គីក្នុងឱកាសអបអរឆ្នាំថ្មីឆ្នាំសកល២០២៥ ក៏មានកម្មវិធីដូចគ្នានេះដែរ ដែលរៀបចំដោយក្រុមដែលមានឈ្មោះថា មហាមិត្ត BMCឬមហាមិត្តខេត្តបន្ទាយមានជ័យ ។
ក្នុងពិធីជួបជុំមហាមិត្តខេត្តបន្ទាយមានជ័យ ទទួលទានអាហារសាមគ្គី ឱកាសឆ្លងឆ្នាំចាស់ចូលឆ្នាំថ្មីសកល២០២៥ លោក ឡាយ គឹម លី ក្នុងនាមប្រធានក្រុមមហាមិត្តBMCបានថ្លែងរំលឹកថា អ្នកផឹកទឹក ឬបានជ្រកម្លប់កុំភ្លេចប្រភព ។ក៏មានន័យមួយបែបទៀតយើងទាំងអស់គ្នាដែលបានរស់នៅមានសុខសន្តិភាព ត្រូវតែរក្សាការពារសន្តិភាពឱ្យបាន ដ្បិតសន្តិភាពនៅកម្ពុជាបានមកដោយការលះបង់យកជីវិតធ្វើដើមទុនរបស់សម្តេចតេជោ ហ៊ុន សែន និងបន្តដោយប្រមុខថ្នាក់ដឹកនាំរាជរដ្ឋាភិបាលអាណត្តិទី៧ ។
លោក ជាម សុខ តំណាងលោកគ្រូ អ្នកគ្រូដែលអញ្ជើញចូលរួម ជាកិត្តិយសក្នុងពិធីនេះ បានថ្លែងអំណរគុណដល់ក្រុមមហាមិត្តBMCដែលបានរៀបចំឱ្យមានការជួបជុំគ្នារវាងអតីតសិស្សរួមជំនាន់ ,ការពិសាអាហារសាមគ្គី និងបានសម្ដែងការដឹងគុណគ្រូបង្រៀនជាមាតាបិតាទី២ក្នុងការផ្ដល់ចំណេះដឹង ពិសេសដឹងគុណសន្តិភាព។
ប្រធានក្រុមមហាមិត្ត BMC បានឱ្យដឹងថា ក្រុមមហាមិត្តខេត្តបន្ទាយមានជ័យបង្កើតឡើងដោយអតីតសិស្សរួមជំនាន់សិក្សានៅវិទ្យាល័យបន្ទាយមានជ័យកំឡុងទសវត្សរ៍ឆ្នាំ១៩៧០និងទសវត្សរ៍ឆ្នាំ១៩៨៥ ដើម្បីគោរពដឹងគុណអតីតជាគ្រូបង្រៀនរបស់ខ្លួនក៏ដូចជាដឹងគុណជានិច្ចជ័យជម្នះ៧មករា១៩៧៩ និងពិសេសសន្តិភាពដែលបានមកពីនយោបាយឈ្នះ ឈ្នះរបស់សម្ដេចតេជោ ហ៊ុន សែន៕
ដោយ៖គៀន ច័ន្ទហ៊ីន
