បរទេស៖ ប៉ូលីសបាននិយាយថា មនុស្ស២នាក់បានស្លាប់ និង ១៨នាក់ផ្សេងទៀត បានរងរបួស បន្ទាប់ពីយន្តហោះខ្នាតតូចមួយគ្រឿង បានធ្លាក់ចូលទៅក្នុងអគារពាណិជ្ជកម្ម Fullerton នៅភាគខាងត្បូង រដ្ឋកាលីហ្វ័រញ៉ា សហរដ្ឋអាមេរិក នេះបើតាមកាសែត BBC ចេញផ្សាយ នៅថ្ងៃសុក្រនេះ។

យោងតាមរដ្ឋបាលអាកាសចរណ៍សហព័ន្ធបានឱ្យដឹងថា យន្តហោះម៉ាស៊ីនតែមួយ RV-10 ផលិតដោយក្រុមហ៊ុន Van បានធ្លាក់ នៅពេលរសៀល ថ្ងៃព្រហស្បតិ៍ ប៉ុន្តែ
មន្ត្រីមិនបានផ្តល់ព័ត៌មានលម្អិតបន្ថែមទៀត ជុំវិញរបៀបនៃការធ្លាក់នោះទេ ហើយគេក៏មិនទាន់ដឹងច្បាស់ថា តើអ្នកស្លាប់ទាំងពីរនាក់ គឺជាបុគ្គលិកធ្វើការក្នុងអគារ ឬ ជាអ្នកជិះយន្តហោះ។ យ៉ាងណាមិញ ប៉ូលិសបានជម្លៀសមនុស្សពីអគារនានា នៅក្នុងតំបន់ ហើយស្នើឱ្យសាធារណជន នៅឱ្យឆ្ងាយពីកន្លែងធ្លាក់យន្តហោះ។

បើតាមលោក Lou Correa សមាជិកសភា ប្រចាំតំបន់ Orange County នៃទីក្រុង Los Angeles បានអះអាង តាមរយៈបណ្តាញសង្គម X ថា អគារដែលត្រូវបានវាយប្រហារ គឺជាអាជីវកម្មផលិតគ្រឿងសង្ហារឹម។ លោក Correa បាននិយាយថា មានជនរងគ្រោះរាប់សិបនាក់ ដែលជាអ្នកធ្វើការ នៅរោងចក្រ។

ខ្សែអាត់វីដេអូសន្តិសុខ ដែលថតបានពីអគារមួយ នៅតាមផ្លូវ បានបង្ហាញពីការផ្ទុះយ៉ាងខ្លាំង នេះបើយោងតាមសារព័ត៌មានក្នុងស្រុក។ យោងតាមកាសែត Orange County Register បានឱ្យដឹងថា មនុស្សប្រហែល ១០០ នាក់ត្រូវបានជម្លៀសចេញ ពីរោងចក្រគ្រឿងសង្ហារឹម Michael Nicholas Designs ។

ជាមួយគ្នានេះ បុគ្គលិកជានារីម្នាក់បានប្រាប់ថា គេបានលឺសំលេងខ្លាំងៗ មុនពេលឃើញដុំភ្លើងដ៏ធំមួយហោះមករករូបគេ ដោយនាងអះអាងថា មានអារម្មណ៍ ដូចជា នៅក្នុងសុបិន។

បើតាមកាសែត BBC បានឲ្យដឹងថា នេះជាយន្តហោះទី២ ដែលធ្លាក់ក្នុងតំបន់នេះ ត្រឹមរយៈពេល២ខែ។ កាលពីថ្ងៃទី ២៥ ខែវិច្ឆិកា យន្តហោះមួយគ្រឿង បានធ្លាក់ចូល ទៅក្នុងដើមឈើ ចម្ងាយប្រហែលមួយប្លុក ពីការធ្លាក់ចុងក្រោយនេះ៕

ប្រភព៖ BBC ប្រែសម្រួល៖ សារ៉ាត