តំបន់ភ្នំប្រង់ ដែនជម្រកសត្វព្រៃបឹងពែរ មិនមានការលួចកាប់ព្រៃទន្រ្ទានយកដីជាថ្មីទេ
កំពង់ធំ៖បញ្ជាក់ពីការយកចិត្តទុកដាក់ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធាន អចិន្ត្រៃយ៍គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ និងសហការីកាលពីព្រឹកថ្ងៃទី១៦ ខែមករា ឆ្នាំ២០២៥ បានអញ្ជើញសួរសុខទុក្ខនិងដើម្បីពិនិត្យការងាររបស់កងកម្លាំងចម្រុះដែលកំពុងប្រចាំការការពារ ទប់ ស្កាត់ និងបង្ក្រាបបទល្មើសធនធានធម្មជាតិ នៅទីបញ្ជាការស្រាលតំបន់ភ្នំប្រង់ ដែនជម្រកសត្វព្រៃបឹងពែរ នៅឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ ។
លោក ញឹម ចន្ធី មន្ត្រីឧទ្យានុរក្សបរិស្ថាន និងជាប្រធានទីបញ្ជាការស្រាលប្រចាំការនៅតំបន់ភ្នំប្រង់ បានជម្រាបឧត្តមសេនីយ៍ទោ សោម ស៊ុន ពីស្ថានភាពរួមនៃតំបន់ភ្នំប្រង់ ដែនជម្រកសត្វព្រៃបឹងពែរថាក្នុងយុទ្ធនាការពារទប់ស្កាត់ និងបង្ក្រាបបទល្មើសធនធានធម្មជាតិរយៈពេល ៨ខែកន្លងមកនេះ កងកម្លាំងចម្រុះរបស់ទីបញ្ជាការស្រាល បានការពារទប់ស្កាត់មិនឱ្យមានការកាប់ទន្ទ្រានព្រៃឈើយកដីធ្វើកម្មសិទ្ធិជាថ្មីទៀតទេ ។កម្លាំងបានចល័តផ្លាស់ប្ដូរតាមសភាពការណ៍ជាក់ស្ដែងក្នុងភូមិសាស្ត្រទាំងក្នុងរដូវប្រាំងនិងក្នុងរដូវវស្សា ។
ចំណែកការស្នាក់នៅនិងរស់នៅវិញ លោក ញឹម ចន្ធីបញ្ជាក់ថា បច្ចុប្បន្នទីបញ្ជាការស្រាលបានរៀបចំកសាងកន្លែងស្នាក់នៅសមរម្យ នៅចំណុចអាភ្លោះ ក្នុងតំបន់ភ្នំប្រង់ ។ចំពោះអាហារទទួលទាន និងការប្រើប្រាស់ប្រេងឥន្ធនៈ បានការជួយឧបត្ថម្ភពីគណៈកម្មការ ការពារទប់ស្កាត់ និងបង្ក្រាបបទល្មើសធនធានធម្មជាតិ របស់ខេត្ត បានជាបន្តបន្ទាប់បង្កលក្ខណៈឱ្យកងកម្លាំងចម្រុះអាចធ្វើសកម្មភាពបានជាប្រចាំ ។ប៉ុន្តែនៅក្នុងរដូវប្រាំងមានការខ្វះខាតទឹកប្រើប្រាស់ប្រចាំថ្ងៃ។នេះជាបញ្ហាប្រឈមមួយដែរ ។
ក្នុងឱកាសនេះឧត្តមសេនីយ៍ទោ សោម ស៊ុន បានកោតសរសើរកងកម្លាំងចម្រុះទាំងអស់ដែល បានខិតខំប្រឹងប្រែងក្នុងការបំពេញភារកិច្ចទទួលបានជោគជ័យ ដោយមិនខ្លាចនឿយហត់ ទោះបីជួបការលំបាកយ៉ាងណាក្តី ដោយគោរព យ៉ាងម៉ឺងម៉ាត់តាមបទបញ្ជារបស់សម្ដេចធិបតី ហ៊ុន ម៉ាណែត ប្រមុខរាជរដ្ឋាភិបាល ,បទបញ្ជារបស់ថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ ព្រមទាំងបទបញ្ជានិងការដឹកនាំរបស់ឯកឧត្តម នួន ផារ័ត្ន អភិបាលខេត្ត ប្រធានគណៈ កម្មការបការពារទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ ។
នៅទីនោះឧត្តមសេនីយ៍ទោ សោម ស៊ុន បានចូលរួមពិសារអាហាររួមគ្នាជាមួយកងកម្លាំងចម្រុះ ដើម្បីលើកទឹកចិត្តដល់បងប្អូនក្នុងការបំពេញភារកិច្ចបន្តទៀតឱ្យទទួលបានជោគជ័យ៕
ដោយ៖ ប៊ុន រដ្ឋា
