ព្រះវិហារ៖ នាយទាហាន នាយទាហានរង និងពលទាហាន នៃកងពលតូច​អន្តរាគមន៍លេខ៩ ចំណុះកង​ពលធំអន្តរាគមន៍​លេខ៣ ប្រចាំទិសទី១ ប្រាសាទ​ព្រះវិហារចំនួន ២០០នាក់ បានស្ម័គ្រចិត្តបរិច្ចាគឈាម ដើម្បីយកទៅជួយ​សង្គ្រោះអាយុ​ជីវិតជនរងគ្រោះ ដែលត្រូវការឈាមជាចាំបាច់នៅក្នុងមន្ទីរពេទ្យ ១៦មករា និងមន្ទីរសុខាភិបាលខេត្តព្រះវិហារ ។សកម្មភាពនជក៏ដើម្បី​ចូលរួមអបអរសាទរខួបអនុស្សាវរីយ៍លើកទី៤៦ នៃទិវាជ័យជម្នះ៧មករា ( ៧មករា ១៩៧៩ – ៧មករា ឆ្នាំ២០២៥ )

ការបរិច្ចាគឈាមបានប្រព្រឹត្តទៅកាលពីថ្ងៃទី១៥ ខែមករា ឆ្នាំ២០២៥ នៅទី​បញ្ជាការកងពលតូចអន្តរាគមន៍លេខ៩ ក្រោមវត្តមានឯកឧត្តម គីម រិទ្ធី អភិបាលខេត្តព្រះវិហារ ឧត្តមសេនីយ៍ទោ អ៊ូ ណារិន មេបញ្ជាការរង និង​ជានាយសេនាធិការ កងពលធំអន្តរាគមន៍លេខ៣ ។

ឧត្តមសេនីយ៍ត្រី អាន់ លន មេបញ្ជាការរង និងជានាយសេនាធិការ កងពល​តូចអន្តរាគមន៍លេខ៩ បានបង្ហាញអារម្មណ៍​រំភើបដែលបានចូលរួម​បរិច្ចាគ​ឈាមចំនួន២០០នាក់គ្រប់តាមចំនួនស្នើសុំ និងបានត្រៀមកម្លាំងបម្រុង​មួយចំនួនផ្សេងទៀត ក្នុងករណីចាំបាច់ជាក់ស្តែងណាមួយ ។

ឯកឧត្តម គីម រិទ្ធី បានថ្លែងកោតសរសើរចំពោះភាពអង់អាចក្លាហាន​របស់​នាយទាហាន នាយទាហានរង និងពលទាហាន កងពលតូចអន្តរា​គមន៍លេខ៩ ក្នុងបុព្វហេតុការពារបូរណភាពទឹកដី ជាតិ សាសនា ព្រះមហាក្សត្រ និងនាយក​រដ្ឋមន្ត្រី ។ជាពិសេសបំផុតមេបញ្ជាការ មេបញ្ជាការរង នាយទាហាន និងពល​ទាហានទាំងអស់ ក៏បានស្ម័គ្រចិត្តបរិច្ចាគឈាមស្រស់ៗ សម្រាប់ជួយ​សង្គ្រោះ​ដល់ប្រជាជនគ្រប់រូប គ្រប់មជ្ឈដ្ឋាន គ្រប់ឋានៈ វណ្ណៈ មិនប្រកាន់ពូជសាសន៍ ដោយក្តីស្រឡាញ់​ពេញបេះដូង ៕
ដោយ៖ឡុង សំបូរ