ធ្វើផ្លូវក្រវាត់ព្រំដែន៖ បោសសម្អាតមីន និងយុទ្ធភណ្ឌមិនទាន់ផ្ទុះ សម្រេចបានលើផ្ទៃដីជាង ២សែន ម៉ែត្រការ៉េក្នុងភូមិសាស្ត្រខេត្តរតនគិរី
រតនគិរី៖ការដ្ឋានសាងសង់ហេដ្ឋារចនាសម្ព័ន្ធព្រំដែនក្នុងខេត្តរតនគិរី ការបោសសម្អាតមីន និងយុទ្ធភណ្ឌមិនទាន់ផ្ទុះ សម្រេចបានលើផ្ទៃដី ២៣៧ ៥០០ ម៉ែត្រការ៉េ ។នេះជាលទ្ធផលរបស់កងកម្លាំងវិស្វកម្មកម្ពុជាបានរកឃើញ។ចំពោះមុខ កម្លាំងជំនាញកំពុងរាវរកគ្រាប់មិនទាន់ផ្ទុះតាមគោលដៅរបស់ខ្លួនជាបន្តបន្ទាប់ ដើម្បីសម្រួលដល់ការកសាងផ្លូវក្រវាត់ព្រំដែន ។
អភិបាលខេត្តរតនគិរី ឯកឧត្តម ញ៉ែម សំអឿន បានប្រាប់អ្នកសារព័ត៌មានកាលពីពេលថ្មីៗកន្លងមកនេះថា ថវិកាមូលនិធិខ្សែក្រវាត់ព្រំដែននេះ ជាកញ្ចប់ថវិការបស់សម្តេចធិបតី ហ៊ុន ម៉ាណែត ដែលបានមកពីការចូលរួមចំណែករបស់ប្រជាពលរដ្ឋក្នុង និងក្រៅប្រទេស ដើម្បីកសាងហេដ្ឋារចនាសម្ព័ន្ធជាតិ ។ឯកឧត្តមបន្តថា ផ្លូវក្រវាត់ព្រំដែនមានប្រវែងជាង ១០០គីឡូម៉ែត្រចាប់រាប់ពីបង្គោលលេខ ០០ មុំ៣ នៅតំបន់កន្ទុយនាគផ្នែកខាងលើជាប់ព្រំដែនកម្ពុជា-ឡាវ មកដល់បង្គោលលេខ ៣០ ជាផ្នែកទី១។ ចំណែកផ្នែកទី២ ព្រំប្រទល់រវាងខេត្តរតនគិរី និងខេត្តមណ្ឌលគិរី និងផ្នែកទី៣ ជាប់ខេត្តស្ទឹងត្រែង និងខេត្តរតនគិរី ។
ឯកឧត្តមបន្តថា កម្លាំងកងវិស្វកម្មកម្ពុជា កំពុងប្រឹងប្រែងធ្វើផ្លូវក្រវាត់ព្រំដែននេះយ៉ាងសស្រោកសស្រាំ ។ឯកឧត្តមអភិបាលខេត្តបានរំលឹកថា កាលពីមុនកូវីដ១៩ កងវិស្វកម្ម បានស្ថាបនាផ្លូវក្រវាត់ព្រំដែននេះម្តងរួចមកហើយ ចាប់ពីបង្គោលលេខ៣០ នៅត្រង់ច្រកទ្វាព្រំដែន ស្រុកអូរយ៉ាដាវ សំដៅទៅទិសខាងជើងមុំ៣ ។កាលណោះធ្វើបាន៨០គីឡូម៉ែត្រ ប៉ុន្តែបានផ្អាករយៈពេល ៤ឆ្នាំគិតមកដល់ពេលនេះ។
បើតាមការរៀបរាប់របស់ឯកឧត្តមអភិបាលខេត្ត ដោយសារការផ្អាកជាច្រើនឆ្នាំនេះ ជាហេតុធ្វើឱ្យព្រៃឈើក៏ដុះឡើងវិញ ហើយផ្លូវលំដែលបានធ្វើរួចរាល់ ត្រូវបានខូចខាតដោយភ្លៀងនៅរដូវវស្សា ។ស្ថានភាពផ្លូវឥឡូវនេះ មិនអាចធ្វើដំណើរបានទេ។កងវិស្វកម្មកម្ម កំពុងជួសជុលផ្លូវជង្ហុក ផ្លូវបាក់ស្រុតដោយសារទឹកភ្លៀងហូរដាច់។ ដោយឡែក ក្នុងពេលបច្ចុប្បន្ន កម្លាំងកងវិស្វកម្ម បានរៀបចំគ្រឿងចក្រសម្រាប់ធ្វើផ្លូវបន្តពីបង្គោលលេខ៣០ និងបង្គោលលេខ១០ ទៅមុខទៀតយ៉ាងមមាញឹក។កម្លាំងដែលធ្វើត្រូវបានចែកចេញជា២ ទៅ ៣ក្រុម ឆ្ពោះឆ្លងកាត់ជ្រោះ និងចង្កេះភ្នំ នៅក្នុងភូមិសាស្ត្រខេត្តរតនគិរី ជាប់ព្រំដែនវៀតណាម៕
ដោយ៖ឡុង សំបូរ
