បរទេស ៖ ឡើងកាន់តំណែង នៅថ្ងៃដំបូងភ្លាម ប្រធានាធិបតីអាមេរិក លោក ដូណាល់ ត្រាំ បាននិយាយថា លោក វ្ល៉ាឌីមៀ ពូទីន ប្រធានាធិបតីរុស្ស៊ី កំពុងតែ «បំផ្លាញរុស្ស៊ី» ដោយមិនធ្វើឲ្យមានកិច្ចព្រមព្រៀង ដើម្បីបញ្ចប់សង្រ្គាម ជាមួយអ៊ុយក្រែន។

«គាត់គួរតែធ្វើកិច្ចព្រមព្រៀងមួយ.. ខ្ញុំគិតថា គាត់កំពុងបំផ្លាញប្រទេសរុស្ស៊ី ដោយមិនធ្វើកិច្ចព្រមព្រៀង..ខ្ញុំគិតថា រុស្ស៊ីនឹងជួបបញ្ហាធំ» នេះគឺជាអ្វីដែលលោក ត្រាំ បាននិយាយប្រាប់អ្នកយកព័ត៌មាន ក្នុងពេលដែលលោកត្រឡប់ ទៅការិយាល័យ Oval Office វិញ នៅព្រឹកថ្ងៃអង្គារនេះ ដែលត្រូវនឹងយប់ថ្ងៃចន្ទ ម៉ោងនៅអាមេរិក។

លោក ដូណាល់ ត្រាំ បានបន្ថែមថា លោកនឹងជួបជាមួយលោក លោក វ្ល៉ាឌីមៀ ពូទីន ក្នុងអាណត្តិដំបូងរបស់លោក ជាជំនួបកំពូលមួយ ដោយបន្ថែមថា «ខ្ញុំបានរួមដៃ ជាមួយគាត់ល្អណាស់ ខ្ញុំនឹងសង្ឃឹមថា គាត់ចង់ធ្វើកិច្ចព្រមព្រៀង ឲ្យចេញជារូបរាង»។

លោក ដូណាល់ ត្រាំ ក៏បាននិយាយផងដែរថា ប្រធានាធិបតីអ៊ុយក្រែន លោក Volodymyr Zelensky បានប្រាប់លោកថា «គាត់ចង់បានកិច្ចព្រមព្រៀងសន្តិភាព ដើម្បីបញ្ចប់សង្រ្គាម ដែលបានចាប់ផ្តើមក្នុងពេលរុស្ស៊ីបានឈ្លានពានអ៊ុយក្រែន ក្នុងខែកុម្ភៈ ឆ្នាំ ២០២២»៕

ប្រភពពី AFP ប្រែសម្រួល៖ សារ៉ាត