បរទេស ៖ លោក ប្រធានាធិបតីអាមេរិក Donald Trump បានប្តេជ្ញាថា សហរដ្ឋអាមេរិក នឹងដណ្តើមយក ព្រែកជីក Panama មកគ្រប់គ្រងវិញ ក្នុងថ្ងៃស្បថចូលកាន់តំណែង ជាផ្លូវការ នៅព្រឹកថ្ងៃអង្គារនេះ។

គួរបញ្ជាក់ថា ព្រែកជីកប៉ាណាម៉ា ត្រូវបានសាងសង់ ដោយសហរដ្ឋអាមេរិក ដែលភាគច្រើន ប្រើប្រាស់កម្លាំងពលកម្ម Afro-Caribbean ហើយបានបើកដំណើរ នៅឆ្នាំ ១៩១៤។ សហរដ្ឋអាមេរិក បានប្រគល់ព្រែកជីកនេះ ឲ្យប្រទេស ប៉ាណាម៉ា នៅចុងឆ្នាំ១៩៩៩។

លោក Trump បាននិយាយថា ប្រទេសចិនកំពុងដំណើរការព្រែកជីក ប៉ាណាម៉ា ដោយអះអាងថា «យើងមិនបានប្រគល់ព្រែកជីកនេះ ឱ្យប្រទេសចិនទេ យើងប្រគល់វា ឱ្យប៉ាណាម៉ា»។

យ៉ាងណាមិញ ប្រធានាធិបតី ប្រទេសប៉ាណាម៉ា លោក Jose Raul Mulino បានបដិសេធភ្លាមៗពីរឿងប្រទេសណាផ្សេងទៀតកំពុងជ្រៀតជ្រែកលើព្រែកជីកនេះ ហើយលោកបាននិយាយថា ប្រទេសរបស់លោកដំណើរការ ដោយគោលការណ៍ អព្យាក្រឹត។ លោក អំពាវនាវឲ្យមានការពិភាក្សា ដើម្បីដោះស្រាយបញ្ហានេះ ដោយលោកអះអាងថា «ព្រែកជីកនេះគឺជារបស់ប្រទេសប៉ាណាម៉ា»។

ប៉ុន្តែ នៅឯពិធីសម្ពោធតំណែង លោក Trump បាននិយាយថា «សហរដ្ឋអាមេរិកបានប្រព្រឹត្តយ៉ាងធ្ងន់ធ្ងរ លើការផ្តល់អំណោយ ដ៏ល្ងង់ខ្លៅនេះ ដែលមិនគួរត្រូវបានធ្វើនោះទេ»៕

ប្រភពពី AFP ប្រែសម្រួល៖ សារ៉ាត