(ភ្នំពេញ)៖ ក្រុមហ៊ុនអាកាសចរណ៍ AirAsia Cambodia ដែលជាក្រុមហ៊ុនអាកាសចរណ៍ ឈានមុខគេមួយនៅកម្ពុជា និងក្នុងតំបន់អាស៊ាន បានបើកសម្ពោធជើងហោះហើរត្រង់ជាលើកដំបូង ពីរាជធានីភ្នំពេញ ទៅកាន់ទីក្រុងហាណូយ ។

ក្រុមហ៊ុនអាកាសចរណ៍ AirAsia Cambodia គឺជាក្រុមហ៊ុនអាកាសចរណ៍ ដែលផ្តល់ជូនអ្នកដំណើរនូវតម្លៃសមរម្យ និងជាក្រុមហ៊ុនដែលទទួលបានការគាំទ្រច្រើនពីអតិថិជន ។ ការសម្ពោធជើងហោះហើរត្រង់ពីរាជធានីភ្នំពេញ ទៅកាន់ទីក្រុងហាណូយនេះ ត្រូវគេបញ្ជាក់ថា បានបង្ហាញពីជំហានដ៏មានសក្តានុពល ក្នុងការពង្រីកផែនការទីផ្សារអន្តរជាតិ ។ ជុំវិញការផ្តល់ជូនអតិថិជននូវសេវកម្មហោះហើរត្រង់ថ្មីទៅកាន់ទីក្រុងហាណូយនេះ ត្រូវបានអ្នកនាង ហាយ កក្កដា ប្រ ធានគ្រប់គ្រងផ្នែកប្រតិបត្តិការលើផ្ទៃដី នៃក្រុមហ៊ុន Air Asia Cambodia បានថ្លែងនៅក្នុងពិធីសម្ពោធ នៅព្រឹកថ្ងៃទី២៤ ខែមករា ឆ្នាំ២០២៥ នៅអាកាសយានដ្ឋានអន្តរជាតិភ្នំពេញ យ៉ាងនេះ

កម្ពុជា និងវៀតណាម គឺជាប្រទេសមានភូមិផងរបងជាមួយគ្នា ដែលសម្បូរទៅដោយប្រវត្តិសាស្ត្រ និងវប្បធម៌ដ៏ល្អ ដែលបានទាក់ទាញកំណើនភ្ញៀវទេសចរយ៉ាងច្រើនកុះករមកពីជុំវិញពិភពលោក។ ក្រុមហ៊ុនអាកាសចរណ៍ AirAsia Cambodia បានសំដែងនូវភាពរីករាយស្វាគមន៍អ្នកដំណើរក្នុងការបំពេញសេវាកម្មជូនភ្ញៀវទេសចរណ៍ជាតិ និងអន្តរជាដែលធ្វើដំណើរពីរាជធានីភ្នំពេញទៅទីក្រុងហាណូយ និងពីក្រុងហាណូយមករាជធានីភ្នំពេញ ដើម្បីស្វែងយល់ពីភាពអស្ចារ្យនៃប្រទេសកម្ពុជា និងប្រទេសវៀតណាម។

ជើងហោះហើរត្រង់ថ្មីនេះ ត្រូវគេបញ្ជាក់ថា នឹងដើរតួយ៉ាងសំខាន់ក្នុងការតភ្ជាប់គោលដៅដ៏ពេញនិយមនៃប្រទេសទាំង តាមរយៈការផ្តល់ជូននូវការធ្វើដំណើរប្រកប ដោយភាពងាយស្រួល និងសុវត្ថិភាព និងជាឱកាសក្នុងការស្វែងរកបទពិសោធន៍ថ្មីនូវវប្បធម៌ និងសេដ្ឋកិច្ចរវាងប្រទេសទាំងពីរ។

ការសម្ភោធជើងហោះហើរត្រង់ថ្មីនេះ បានឆ្លុះបញ្ចាំងឱ្យឃើញអំពីការប្តេជ្ញាចិត្តនៃក្រុមហ៊ុនអាកាសចរណ៍ AirAsia Cambodia ក្នុងការផ្សារភ្ជាប់ទំនាក់ទំនង និងពង្រឹងការតភ្ជាប់ការហោះហើរត្រង់រវាងប្រទេសនៅក្នុងសហគមន៍អាស៊ាន ព្រមទាំងជំរុញកំណើនភ្ញៀវទេសចរណ៍ទូទាំងតំបន់អាស៊ានមកកាន់កម្ពុជា ឱ្យកាន់តែច្រើនកុះករថែមទៀត ។ ការតភ្ជាប់ជើងហោះហើរនេះ ក៏ជាចំណែកមួយនៃការជំរុញឱ្យទំនាក់ទំនងឲ្យកាន់តែរឹងមាំ និងកំណើនទេសចរណ៍នៃប្រទេសទាំងពីរកម្ពុជា-វៀតណាម និងក៏ជាការគាំទ្រដល់សេដ្ឋកិច្ចក្នុងតំបន់ផងដែរ ៕

អត្ថបទ ៖ គង់ សុផុល
វីដេអូ ៖ រិន រចនា